జాగ్రత్తగా ఆలోచించండి.!

మీకు సులువుగా పనిపూర్తి కావాలంటే ఎనీడెస్క్‌ యాప్‌ డౌన్‌లోడ్‌ చేసుకోండి.. అంటూ ముక్కు ముఖం తెలియని వ్యక్తులు చెబితే .. అది పక్కాగా మోసమని గుర్తించాలి. విశ్రాంత ఉద్యోగులు, ఇంటర్‌నెట్‌పై అవగాహన లేని వారిపైనే సైబర్‌ నేరగాళ్లు ఫోకస్‌ చేసి.. రిమోట్‌ యాప్‌లతో ఆయా బ్యాంకు ఖాతాలను ఖాళీ చేస్తున్నారు.

• ఏది పడితే అది డౌన్‌లోడ్‌ చేయకండి
• అవగాహన ఉంటేనే లింకులపై క్లిక్‌ చేయండి
• రిమోట్‌ యాప్‌తో జర భద్రం..
• కరెంట్‌ బిల్లులు, కేవైసీ అప్‌డేట్‌ పేరుతో ఫోన్లు
• గుర్తుతెలియని వ్యక్తులు చెప్పే యాప్‌లు డౌన్‌లోడ్‌ చేయొద్దు

సిటీబ్యూరో, నవంబర్‌ 18 (నమస్తే తెలంగాణ): మీకు సులువుగా పనిపూర్తి కావాలంటే ఎనీడెస్క్‌ యాప్‌ డౌన్‌లోడ్‌ చేసుకోండి.. అంటూ ముక్కు ముఖం తెలియని వ్యక్తులు చెబితే .. అది పక్కాగా మోసమని గుర్తించాలి. విశ్రాంత ఉద్యోగులు, ఇంటర్‌నెట్‌పై అవగాహన లేని వారిపైనే సైబర్‌ నేరగాళ్లు ఫోకస్‌ చేసి.. రిమోట్‌ యాప్‌లతో ఆయా బ్యాంకు ఖాతాలను ఖాళీ చేస్తున్నారు. ఇటీవల విద్యుత్‌ బిల్లుల కట్టలేదని ఫోన్లు చేసి, వెంటనే బిల్లు కట్టాలంటే ఎనీడెస్క్‌ యాప్‌ను డౌన్‌లోడ్‌ చేసుకోమని చెప్పడం.. కస్టమర్‌ కేర్‌కు ఫోన్‌ చేస్తే.. మీరు రిమోట్‌ యాప్‌ను డౌన్‌లోడ్‌ చేసుకోవాలని సూచనలు చేయడం.. కేవైసీ అప్‌డేట్‌.. ఇలా పలు రకరకాల పేర్లతో ఇంటర్‌నెట్‌పై ఆధారపడే వారిని లక్ష్యంగా చేసుకున్న సైబర్‌ నేరగాళ్లు.. అమాయకలతో రిమోట్‌ యాప్‌లను డౌన్‌లోడ్‌ చేయిస్తూ బ్యాంక్‌ ఖాతాల్లోకి చొరబడుతున్నారు. అందినంత దోచుకుంటున్నారు.

రిమోట్‌ యాప్స్‌తో ఇలా మోసం..

• ఎక్కడో ఉండి.. ఇక్కడ ఉండే వారి కంప్యూటర్‌, సెల్‌ఫోన్‌ను రిమోట్‌ యాప్స్‌ను ఉపయోగించి వాడుకోవచ్చు.
• మొదట ఫోన్‌చేసి మీ కరెంట్‌ కట్‌ అవుతుందని, మీ కేవైసీ అప్‌డేట్‌ కాకపోవడంతో బ్యాంకు ఖాతా బ్లాక్‌ అవుతుందని, కస్టమర్‌ కేర్‌కు మీరు ఫోన్‌ చేశారు.. ఫలాన యాప్‌ను మీరు డౌన్‌లోడ్‌ చేసి వివరాలు అందులో పొందుపర్చండి.. మీకు మేం సహాయపడుతామంటూ నమ్మిస్తూ.. ఎనీ డెస్క్‌, టీమ్‌ వ్యూహర్‌, క్విక్‌ సపోర్టు తదితర పేర్లతో ఉండే రిమోట్‌ యాప్‌లను డౌన్‌లోడ్‌ చేయిస్తారు.
• ఈ యాప్‌తో మన చేతిలో ఉండే సెల్‌ఫోన్‌ను ఎక్కడో ఉండే వాళ్లు ఆపరేట్‌ చేసేందుకు వీలు ఉంటుంది. అయితే, యాప్‌ డౌన్‌లోడ్‌ అయిన తర్వాత ఒక కోడ్‌ వస్తుంది. ఆ కోడ్‌ అవతలి వాళ్లకు తెలిస్తేనే మన సెల్‌ఫోన్‌, కంప్యూటర్‌ను అవతలి వాళ్లు చూసే అవకాశం ఉంటుంది.
• సైబర్‌ నేరగాళ్లు బాధితులను మాటల్లో పెట్టి.. సహాయం చేస్తామనడంతోనే వెనుకా ముందు ఆలోచించకుండా రహస్యంగా ఉంచుకోవాల్సిన ఆ కోడ్‌ను చెప్పేస్తున్నారు. కోడ్‌ చెప్పగానే రిమోట్‌ యాప్‌తో మన సెల్‌ఫోన్‌ను సైబర్‌ నేరగాడు తన కంట్రోలోకి తీసుకుంటాడు.
• ఆ తర్వాత మన సెల్‌ఫోన్‌లో ఉండే గూగుల్‌ పే, ఫోన్‌ పే, పేటీఎం, ఇంటర్‌నెట్‌ బ్యాంకింగ్‌తో రూ. 5 పంపించండి.. మీ సమస్య వెంటనే పరిష్కారమవుతుందని చెబుతారు. ఐదు రూపాయ లే కదా.. అని బాధితులు వెంటనే పంపిస్తారు. అలా పంపించగానే.. సైబర్‌ నేరగాళ్లు మన బ్యాంక్‌ ఖాతా వివరాలు.. యూజర్‌ ఐడీ, పాస్‌వర్డ్‌ గమనిస్తారు. కొద్ది నిమిషాల వ్యవధిలోనే బాధితుల బ్యాంకు ఖాతాల్లోకి వెళ్లి డబ్బులన్నీ కాజేస్తారు.

తెలియని వ్యక్తుల మాటలు నమ్మొద్దు

గుర్తు తెలియని వ్యక్తులు ఫోన్‌చేసి మీ ఫోన్‌లో ఫలాన యాప్‌ను డౌన్‌లోడ్‌ చేసుకోండి.. అని చెబితే అది మోసమని గుర్తించారు. గుర్తు తెలియని వ్యక్తులకు వివరాలు ఇవ్వరాదు. రిమోట్‌ యాప్‌లను ఉపయోగించి మీ బ్యాంకు ఖాతాలు ఖాళీ చేస్తారు. ఒకవేళ మోసం జరిగితే వెంటనే బ్యాంకుకు ఫోన్‌చేసి ఖాతాను స్తంభింప చేయాలి. పోలీసులకు కూడా ఫిర్యాదు చేయాలి. రిమోట్‌ యాప్‌ను డౌన్‌లోడ్‌ చేయిస్తున్నారంటే వాళ్లు దొంగలని అనుమానించాలి. కోడ్‌ చెప్పారంటే దొంగల చేతికి తాళాలు ఇచ్చినట్టే.
– కేవీఎం ప్రసాద్‌, ఏసీపీ సైబర్‌క్రైమ్స్‌