Visit:
Pradeep Rawat | భారతీయ సినీ పరిశ్రమలో విలన్ పాత్రలకు ప్రత్యేకమైన గుర్తింపును తీసుకొచ్చిన నటుడు ప్రదీప్ రావత్ ఇక లేరు. కొంతకాలంగా అనారోగ్య సమస్యలతో బాధపడుతున్న ఆయన ముంబైలోని ఓ ప్రైవేట్ ఆస్పత్రిలో చికిత్స పొందుతూ కన్నుమూశారు. ఆయన మరణంతో తెలుగు, హిందీ, తమిళ సినీ పరిశ్రమలు ఓ గొప్ప విలన్ నటుడిని కోల్పోయాయి. తెరపై ఆయన పోషించిన భయానక పాత్రలు, పవర్ఫుల్ స్క్రీన్ ప్రెజెన్స్ ప్రేక్షకుల మదిలో చిరస్థాయిగా నిలిచిపోతాయి. 1995 నుంచి సినీ ప్రయాణం ప్రారంభించిన ప్రదీప్ రావత్ హిందీ, తెలుగు, తమిళం, మలయాళం, కన్నడ భాషల్లో వందకు పైగా చిత్రాల్లో నటించారు. హీరోను మరింత శక్తివంతంగా చూపించాలంటే విలన్ పాత్ర ఎంత బలంగా ఉండాలో తన నటనతో నిరూపించారు. తన రూపం, బాడీ లాంగ్వేజ్, డైలాగ్ డెలివరీతో విలన్ పాత్రలకు ప్రత్యేకమైన ఇమేజ్ తీసుకొచ్చారు.
తెలుగు ప్రేక్షకులకు ప్రదీప్ రావత్ను మరింత చేరువ చేసింది దర్శకధీరుడు ఎస్.ఎస్. రాజమౌళి తెరకెక్కించిన ‘సై’ సినిమా. ఇందులో ఆయన పోషించిన ‘భిక్షు యాదవ్’ పాత్ర అప్పట్లో సంచలనం సృష్టించింది. క్రూరత్వం, ఆగ్రహం, భయాన్ని కలగలిపిన ఆ పాత్ర ప్రేక్షకులను విపరీతంగా ఆకట్టుకుంది. ఈ పాత్రకు గాను ఆయన ఉత్తమ విలన్ విభాగంలో ఫిలింఫేర్ అవార్డు అందుకున్నారు. ‘సై’ విజయంతో టాలీవుడ్లో అత్యంత డిమాండ్ ఉన్న విలన్గా మారిన ఆయన, ఆ తర్వాత ‘ఛత్రపతి’, ‘జగడం’ వంటి చిత్రాల్లో కూడా గుర్తుండిపోయే ప్రతినాయక పాత్రలు పోషించారు. ప్రదీప్ రావత్ కెరీర్లో మరో కీలక మైలురాయి ‘గజినీ’. తమిళంలో సూర్య హీరోగా తెరకెక్కిన ఈ చిత్రంలో ఆయన పోషించిన గజినీ ధర్మపాల్ పాత్రకు విశేష ఆదరణ లభించింది. అదే పాత్రను హిందీ రీమేక్లో అమీర్ ఖాన్ సరసన కూడా పోషించారు.
2008లో విడుదలైన హిందీ ‘గజినీ’ భారతీయ సినీ చరిత్రలో రూ.100 కోట్ల నెట్ వసూళ్లు సాధించిన తొలి చిత్రంగా నిలిచింది. దీంతో ఆ చిత్రంలో ప్రధాన ప్రతినాయకుడిగా నటించిన ప్రదీప్ రావత్, బాలీవుడ్ తొలి రూ.100 కోట్ల బ్లాక్బస్టర్లో విలన్గా నిలిచిన నటుడిగా ప్రత్యేక గుర్తింపు పొందారు. సినిమాల్లోకి రాకముందే ప్రదీప్ రావత్ బుల్లితెరపై తన ప్రతిభను చాటుకున్నారు. 1988లో బి.ఆర్. చోప్రా రూపొందించిన ప్రసిద్ధ టెలివిజన్ సీరియల్ మహాభారత్ లో అశ్వత్థామ పాత్ర పోషించి దేశవ్యాప్తంగా గుర్తింపు సంపాదించారు. బాలీవుడ్లో షారూఖ్ ఖాన్, సల్మాన్ ఖాన్, అమీర్ ఖాన్లతో కలిసి నటించిన అరుదైన విలన్ నటుల్లో ప్రదీప్ రావత్ ఒకరు. ముఖ్యంగా అమీర్ ఖాన్తో కలిసి నటించిన ‘సర్ఫరోష్’, ‘లగాన్’, ‘గజినీ’ చిత్రాలు ఆయన కెరీర్లో ప్రత్యేక స్థానం సంపాదించాయి. తెలుగులో చిరంజీవి, ప్రభాస్, మహేష్ బాబు, పవన్ కళ్యాణ్, జూనియర్ ఎన్టీఆర్, అల్లు అర్జున్, రవితేజ, నాగార్జున, నందమూరి బాలకృష్ణ వంటి అగ్ర హీరోల సినిమాల్లో ప్రతినాయకుడిగా నటించి తనదైన ముద్ర వేశారు. ప్రతి సినిమాలో పాత్రకు తగ్గట్టుగా తన నటనను మార్చుకుంటూ ప్రేక్షకులను ఆకట్టుకున్నారు. ఆయన చివరిసారిగా తరుణ్ భాస్కర్ తెరకెక్కించిన ‘గాయపడ్డ సింహం’ చిత్రంలో కనిపించారు.
