మేలు చేసే బెల్లం

ప్రస్తుత కాలంలో ఆరోగ్యం కోసం మనిషి ఎంత డబ్బయినా ఖర్చు పెట్టేందుకు.. ఎంత కష్టమైనా భరించేందుకు సంసిద్ధమవుతున్నాడు. కారణం.. నిత్య జీవితంలో ఎన్నో విధాలా అనారోగ్యం పొంచి ఉండడమే.

• ఇన్‌ఫెక్షన్లను తగ్గిస్తుంది..
• రోగనిరోధక శక్తి పెంపునకు దోహదకారి
• బెల్లంతో కలిగే ప్రయోజనాలపై ప్రత్యేక కథనం

ప్రస్తుత కాలంలో ఆరోగ్యం కోసం మనిషి ఎంత డబ్బయినా ఖర్చు పెట్టేందుకు.. ఎంత కష్టమైనా భరించేందుకు సంసిద్ధమవుతున్నాడు. కారణం.. నిత్య జీవితంలో ఎన్నో విధాలా అనారోగ్యం పొంచి ఉండడమే. అయితే మనిషిని ఆరోగ్యంగా ఉంచాలన్నా.. అనారోగ్యం పాలు చేయాలన్నా ఆ శక్తి ఆహార పదార్థాలకు ఉన్నది. పోషక విలువలు కలిగిన ఆహార పదార్థాలతోనే ఆరోగ్యంగా ఉండొచ్చని వైద్య నిపుణులు చెబుతున్నారు. అలాంటి ఆరోగ్యకరమైన ఆహార పదార్థాల్లో బెల్లం ఒకటి. అసలు బెల్లంలో ఉన్న పోషక విలువలు, ఆరోగ్య ప్రయోజనాలు ఏమిటీ అనే విషయాలపై ‘నమస్తే తెలంగాణ’ ప్రత్యేక కథనం..
ఎల్లారెడ్డి రూరల్‌, అక్టోబర్‌ 15:

బెల్లంలో సహజమైన తియ్యదనం ఉంటుంది. దీంతో శరీరానికి ఎలాంటి హాని ఉండదు. ప్రాణాంతక వ్యాధుల బారిన పడకుండా కాపాడే విటమిన్స్‌, మినరల్స్‌ ఉన్నాయి. బెల్లం రోగ నిరోధకశక్తిని పెంచుతుంది. చలికాలంలో బెల్లం తినడం ఇంకా మంచిది. ఇది శరీరాన్ని వెచ్చగా ఉంచడంతో ఈ కాలంలో వచ్చే దగ్గు, జలుబును నివారిస్తుంది. బెల్లం మలబద్ధకాన్ని నివారిస్తుంది. జీర్ణవ్యవస్థ ఎంజైములను ఉత్తేజపరుస్తాయి. కాలేయాన్ని శుద్ధి చేస్తుంది. విష పదార్థాలను బయటికి పంపుతుంది.

రోజూ ఒక బెల్లం ముక్క తింటే పొట్టలోని వ్యర్థాలను బయటికి పంపి ఆరోగ్యాన్ని చేకూరుస్తుంది. దగ్గు, జలుబుతో బాధపడేవారు వేడి నీళ్లలో బెల్లం కలుపుకొని తాగితే సమస్య దూరమవుతుంది. చాయ్‌లో చక్కెరకు బదులుగా బెల్లం వేసుకొని తాగినా మంచి ఫలితం ఉంటుంది. బెల్లంలో జింక్‌, సిలినియమ్‌ మూలకాలు ఉండడంతో ఇన్‌ఫెక్షన్లతో దెబ్బతిన్న కణాలను తిరిగి బాగుచేస్తుంది. రక్తంలో హిమోగ్లోబిన్‌ శాతాన్ని పెంచుతుంది. బెల్లం గర్భిణులకు చాలా మంచిది. బెల్లంలో అధిక మోతాదులో ఉండే మాంగనీస్‌ కడుపులోని పేగుల్లో ఉండే ఇన్‌ఫెక్షన్లను తగ్గిస్తుంది.

బెల్లం తినడంతో కలిగే ప్రయోజనాలు

• గ్యాస్‌ ఉబ్బరం పూర్తిగా తగ్గిపోతుంది.
• భోజనం చేసిన తర్వాత తీపి తినాలనిపించడం సహజం. అన్నింటికీ మించి బెల్లం తింటే ఆరోగ్యంగా ఉండొచ్చు.
• జీర్ణక్రియ సాఫీగా జరుగుతుంది.
• శరీరంలోని రక్తాన్ని శుద్ధి చేస్తుంది. రోజూ ఒక గ్లాసు పాలు లేదా నీటిలో బెల్లం వేసుకొని పానకాన్ని తాగితే పొట్టను చల్లబరిచి గ్యాస్‌ ఉబ్బరాన్ని నివారిస్తుంది. గ్యాస్‌ ప్రాబ్లం ఉన్న వారు భోజనం అనంతరం తింటే ప్రయోజనం ఉంటుంది.
• బెల్లంలో ఉండే ప్రముఖ ధాతువు ఇనుము. బెల్లాన్ని ఎనీమియా రోగులకు ఇస్తే మంచి ఫలితం ఉంటుంది. ముఖ్యంగా మహిళలు బెల్లం తినడం మంచిది.
• రక్తంలోని ప్రమాదకరమైన ట్యాక్సిన్లను దూరం చేసి చర్మానికి మంచి మెరుపునిచ్చి మొటిమలను నివారిస్తుంది.
• దగ్గు, జలుబు, రొంప లాంటి వాటి నుంచి ఉపశ మనం ఇస్తుంది. జలుబుతో బెల్లం తినలేనట్లయితే చాయ్‌లో కలిపి తాగొచ్చు.
• నీరసం, బలహీనత లక్షణాలు కనిపించగానే బెల్లం తింటే ఎనర్జీ లెవల్‌ త్వరగా పెరుగుతుంది. దీంతో షుగర్‌ లెవల్‌ కూడా పెరగదు. రోజంతా పనిచేసిన తర్వాత అలసటగా ఉంటే వెంటనే బెల్లం తినేయండి.
• దమ్ము, ఆస్తమా రోగులు తీసుకుంటే మంచి ఫలితాలు ఉంటాయి.
• బెల్లం ముక్కతో కొద్దిగా అల్లం కలిపి తీసుకుంటే మోకాళ్ల నొప్పులు తగ్గిపోతాయి.
• బెల్లంతో చేసిన పరమాన్నం తింటే గొంతు బాగుంటుంది.
• బెల్లాన్ని నల్లనువ్వులతోపాటు లడ్డూ చేసుకొని తింటే చలికాలంలో ఆస్తమా ఇబ్బందిపెట్టదు.
• చలికాలంలో నంజు బాగా తయారైతే బెల్లాన్ని పాపిడి రూపంలో చేసుకొని సేవించండి.
• బెల్లాన్ని నెయ్యితో కలిపి తీసుకుంటే చెవి నొప్పి పూర్తిగా తగ్గిపోతుంది.
• ఐదు గ్రాముల శొంఠి, పది గ్రాముల బెల్లం ఉండలుగా చేసి తీసుకుంటే జాండిస్‌ (పీలియా వ్యాధి) వచ్చిన వారికి మేలు చేస్తుంది.
• బెల్లం హల్వా తింటే జ్ఞాపకశక్తి మెరుగవుతుంది.
• ఐదు గ్రాముల బెల్లం, అంతే పరిమాణంలో ఆవాల నూనెతో కలిపి తీసుకుంటే శ్వాస సంబం ధిత వ్యాధులు నయమవుతాయి.

నొప్పుల నివారిణి..

బెల్లంలో ఉండే పోషకాలు మహిళలకు రుతు సమయంలో వచ్చే సమస్యలను తగ్గిస్తాయి. దీంతో శరీరంలో ఎండార్పిన్లు విడుదలవుతాయి. ఇవి శరీరాన్ని, మనస్సును ప్రశాంతంగా మారుస్తాయి. కీళ్ల నొప్పులు, మంటలతో బాధపడేవాళ్లు బెల్లం తినాలి. అల్లంతో కలిపి తింటే ఉపశమనం కలుగుతుంది. రోజూ పాలలో బెల్లం కలుపుకొని తాగితే ఎముకలు పుష్టిగా అవుతాయి.
– డాక్టర్‌ రవీంద్రమోహన్‌, ప్రభుత్వ దవాఖాన వైద్యుడు, ఎల్లారెడ్డి