గజ.. గజ

ఉమ్మడి జిల్లాలో చలిపులి పంజా విసురుతున్నది. ఒక్కసారిగా ఉష్ణోగ్రతలు పడిపోయాయి. నిజామాబాద్‌ జిల్లాలో కనిష్ఠ ఉష్ణోగ్రతలు 12 డిగ్రీలకు పడిపోయాయి. వేకువజాము నుంచే దట్టమైన పొగమంచు కమ్మేస్తూ ఉదయం 9 గంటలు దాటినా చలితీవ్రత తగ్గడంలేదు.

• వణుకుతున్న ఉమ్మడి జిల్లా
• అత్యల్ప ఉష్ణోగ్రతలు నమోదు
• ఉదయం 9 దాటినా తగ్గని చలి తీవ్రత
• వేకువజాము నుంచే కప్పేస్తున్న పొగమంచు
• జాగ్రత్తలు తప్పని సరి అంటున్న వైద్యులు

ఖలీల్‌వాడి డిసెంబర్‌ 15: ఉమ్మడి జిల్లాలో చలిపులి పంజా విసురుతున్నది. ఒక్కసారిగా ఉష్ణోగ్రతలు పడిపోయాయి. నిజామాబాద్‌ జిల్లాలో కనిష్ఠ ఉష్ణోగ్రతలు 12 డిగ్రీలకు పడిపోయాయి. వేకువజాము నుంచే దట్టమైన పొగమంచు కమ్మేస్తూ ఉదయం 9 గంటలు దాటినా చలితీవ్రత తగ్గడంలేదు. దీంతో పాఠశాలలు, కళాశాలలకు వెళ్లే విద్యార్థులు, ఉద్యోగులు, కూలీలు తీవ్ర ఇబ్బందులు పడుతున్నారు. సాయంత్రం 5 గంటల నుంచే చలి తీవ్రత పెరగడంతో వ్యాపారులు రాత్రి 8 గంటలకే దుకాణాలను మూసేస్తున్నారు.

ఆరోగ్యంపై జాగ్రత్తలు తీసుకోవాలి

చలి కారణంగా ప్రజలు అనారోగ్యం బారిన పడకుండా జాగ్రత్తలు తీసుకోవాలని వైద్యులు సూచిస్తున్నారు. ముఖ్యంగా వృద్ధులు, చిన్నారులు జాగ్రత్తగా ఉండాలంటున్నారు. ఉన్నిదుస్తులు ధరించి చలి నుంచి రక్షణ పొందాలని, ఆహారం వేడిగా ఉన్నప్పుడే భుజించాలని సూచిస్తున్నారు.