Visit:
నిజామాబాద్‌, నవంబర్‌ 30, (నమస్తే తెలంగాణ ప్రతినిధి): గ్రామ పంచాయతీ ఎన్నికల్లో ఆశావహులకు తీవ్రమైన ఇక్కట్లు ఏర్పడుతున్నాయి. ఆదిలోనే హంసపాదు అన్నట్లుగా పోటీ చేసేందుకు ఉత్సాహం చూపుతున్నప్పటికీ చేతిలో నగదు లేక తండ్లాడుతున్నారు. ప్రతి గ్రామంలోనూ పోటీ అనివార్యమైన చోట హోరాహోరీ ప్రచారం నడుస్తోంది. వారం, పది రోజుల్లో ఓటర్లను తమ బుట్టలో వేసుకునేందుకు నయానో, భయానో తమవైపు తిప్పుకునేందుకు పైసలతో ముడి పడింది. దీంతో డబ్బులు చేతిలో సరిపడే స్థాయిలో అందుబాటులో లేక గందరగోళంలో కొట్టుమిట్టాడుతున్నారు.
చాలా రోజుల నుంచి పోటీకి సిద్ధం అవుతున్న వారికి రిజర్వేషన్‌ రూపంలో చేదు అనుభవం ఎదురైంది. అకస్మాత్తుగా మారిన రిజర్వేషన్లతో అందివచ్చిన అవకాశాన్ని చేజిక్కించుకునేందుకు ఎంతకైనా తెగించేందుకు పలువురు సిద్ధం అవుతున్నారు. డబ్బులు పోగు చేసుకునేందుకు అప్పుల కోసం తిరుగుతుండగా వారికి ఎక్కడికి వెళ్లినా చేదు అనుభవమే ఎదురవుతోంది. పెద్ద గ్రామ పంచాయతీల్లో రూ.లక్షల్లో వ్యయం జరుగుతోంది. ఈసారి మరింత పెరిగే వీలుండటంతో భూమి కాగితాలను కుదువ పెట్టి అప్పులు తెచ్చుకుంటున్నారు. అప్పులిచ్చే వారికి సర్పంచ్‌ ఎన్నికలు భారీ స్థాయిలో ఆదాయాన్ని సమకూర్చుతోంది.
తెలంగాణ రాష్ట్రంలో కాంగ్రెస్‌ ప్రభుత్వం అధికారంలోకి వచ్చి రెండు సంవత్సరాలు అవుతోంది. ఈ రెండేళ్ల కాలంలో అభివృద్ధి అన్నదే పత్తా లేకుండా పోయింది. సంక్షేమ కార్యక్రమాల అమలు అటకెక్కింది. ఇచ్చిన హామీలకు దిక్కూ దివానా లేదు. దీనికి తోడుగా గత ప్రభుత్వంలో గ్రామ పంచాయతీ ఎన్నికల్లో ప్రజా అవసరాల కోసం ఖర్చు చేసిన వాటికి బిల్లులు మంజూరు చేయడం లేదు. చాలా మంది సర్పంచ్‌లు, ఎంపీటీసీ, జడ్పీటీసీలుగా ఉన్న వారంతా తమ జేబులో నుంచి రూ.లక్షలు వెచ్చించి ప్రజా అవసరాలను తీర్చారు. వీరికి బిల్లులు ఏళ్లుగా పెండింగ్‌లో ఉండటంతో అప్పుల పాలయ్యారు. అప్పులకు వడ్డీలు కట్టలేక అనేక మంది తమ ఆస్తులు అమ్ముకుని రుణాలు చెల్లించారు. రెండేళ్లలో రాష్ట్రంలో రేవంత్‌ రెడ్డి పాలనలో దయనీయ దుస్థితి ఏర్పడింది.
కనీసం పింఛన్‌ డబ్బులు పెంచే పరిస్థితి లేకుండా పోయింది. రానున్న కాలంలోనూ గ్రామాలకు అభివృద్ధి నిధులు రావడం కష్టతరంగానే ఉండే ప్రమాదం ఉంది. సర్పంచ్‌ ఎన్నికల్లో గెలిచిన అభ్యర్థులకు రానున్న కాలంలో గడ్డు కాలం ఎదురు కాబోతున్న పరిస్థితులను చాలా మంది ముందస్తుగానే ఊహించుకుంటున్నారు. జీపీ ఎన్నికల్లో గెలిచిన తర్వాత రాజకీయంగా ప్రభావితం చేసి రుణాలు కట్టకపోతే తమ పరిస్థితి ఏమిటి? అన్న కోణంలోనూ ఫైనాన్షియర్లు మొఖం చాటేస్తున్నారు. మరోవైపు కాంగ్రెస్‌ సర్కారులో నిధులు ఇచ్చే అనుకూలతలు కూడా లేకపోవడంతో పోటీ చేసే వారికి మొండి చేయి ఎదురవుతోంది. ఉమ్మడి జిల్లాలో సర్పంచ్‌లకు చెల్లించాల్సిన బకాయిలు రూ.వందల కోట్లలో పెండింగ్‌లో ఉన్నాయి.
సర్పంచ్‌ ఎన్నికల్లో పోటీ చేసే వారంతా ఆచితూచి అడుగులు వేయాలని దెబ్బతిన్న తాజా మాజీ సర్పంచ్‌లు సూచిస్తున్నారు. తమలాంటి దుస్థితిని తెచ్చుకోవద్దని కోరుతున్నారు. కాంగ్రెస్‌ ప్రభుత్వం వచ్చిన తర్వాత గ్రామ పంచాయతీలకు చిల్లి గవ్వ నిధులు రాలేదు. కేంద్ర సర్కార్‌ నుంచి రావాల్సిన ఫండ్స్‌ ఎక్కడికక్కడ నిలిచి పోయాయి. రెండేళ్లుగా పాలకవర్గాలు లేకపోవడంతో గ్రామాల్లో సమస్యలు పేరుకు పోయాయి. దీంతో జీపీ పోరులో గెలిచిన వారికి వెనువెంటనే భారీ ఎత్తున ప్రజా సమస్యలు ఎదురయ్యే వీలుంది. ప్రజలకు మంచి చేయాలనే తలంపుతో అప్పులు చేసి సర్పంచ్‌ ఎన్నికల్లో గెలిస్తే వాటిని తీర్చలేక తిరిగి అప్పులు చేసి మరింత కుంగిపోవాల్సి వస్తుందనే అపాయాన్ని పలువురు గుర్తు చేస్తున్నారు.
గ్రామాల్లో ఒకరిని చూసి మరకొరకు దొడ్డిదారిలో ఓటర్లను వల వేయడం కోసం నెలన్నర రోజుల నుంచే ప్రయత్నాలు జరుగుతున్నాయి. రియల్‌ ఎస్టేట్‌లో, విదేశాల్లో సంపాదించిన డబ్బుతో ఎగిరి దుంకుతున్న వ్యక్తులకు ఈ ఎన్నికల్లో ఖర్చు చేయడం పెద్ద కష్టమేమి కనిపించడం లేదు. కానీ సామాన్య జనాలకు తలకు మించిన భారంగా మారింది. నిక్కచ్ఛిగా ప్రజా సేవ చేసేందుకు ముందుకు వచ్చిన వారికే ఈ ఎన్నికల్లో పట్టం కట్టాలని ప్రజలంతా ఆశిస్తున్నారు. కానీ మందు, విందులు, డబ్బులు వెద జల్లే ప్రక్రియలో ఎవరు గెలుస్తారు? అన్నది కాలమే సమాధానం చెప్పాల్సి ఉంది.
