పదవులు, నిధులిస్తే గుండెలపై తన్నిండు

తెలంగాణ తొలి ముఖ్యమంత్రి కేసీఆర్‌.. పోచారం శ్రీనివాసరెడ్డికి పదవులు, నిధులు ఇస్తే, చివరకు గుండెలపై తన్ని పోయిండని మాజీ మంత్రి, బాల్కొండ ఎమ్మెల్యే వేముల ప్రశాంత్‌రెడ్డి విమర్శించారు. తెలంగాణ అభివృద్ధి కోసం అహర్నిశలు కృషి చేసిన బీఆర్‌ఎస్‌ అధినేత కేసీఆర్‌కు ద్రోహం చేసిన వారికి ప్రజలు బుద్ధి చెబుతారన్నారు. వచ్చే ఎన్నికల్లో బాన్సువాడలో గులాబీ జెండా ఎగరడం ఖాయమని స్పష్టం చేశారు.

• పోచారంపై మాజీ మంత్రి వేముల ఫైర్‌
• కేసీఆర్‌కు ద్రోహం చేసిన పోచారం
• ప్రజలు తగిన బుద్ధి చెబుతారని హెచ్చరిక
• బీఆర్‌ఎస్‌లో చేరిన మోరిల్‌ శ్రీనివాస్‌రావు
• గులాబీ కండువా కప్పి ఆహ్వానించిన కేటీఆర్‌

బాన్సువాడ, జూలై 20 : తెలంగాణ తొలి ముఖ్యమంత్రి కేసీఆర్‌.. పోచారం శ్రీనివాసరెడ్డికి పదవులు, నిధులు ఇస్తే, చివరకు గుండెలపై తన్ని పోయిండని మాజీ మంత్రి, బాల్కొండ ఎమ్మెల్యే వేముల ప్రశాంత్‌రెడ్డి విమర్శించారు. తెలంగాణ అభివృద్ధి కోసం అహర్నిశలు కృషి చేసిన బీఆర్‌ఎస్‌ అధినేత కేసీఆర్‌కు ద్రోహం చేసిన వారికి ప్రజలు బుద్ధి చెబుతారన్నారు. వచ్చే ఎన్నికల్లో బాన్సువాడలో గులాబీ జెండా ఎగరడం ఖాయమని స్పష్టం చేశారు.

బాన్సువాడకు చెందిన వ్యాపారవేత్త మోరిల్‌ శ్రీనివాస్‌రావుతో పాటు ఆయన వెంట వచ్చిన వందలాది మంది నేతలు, కార్యకర్తలు బీఆర్‌ఎస్‌లో చేరారు. సోమవారం హైదరాబాద్‌లోని తెలంగాణ భవన్‌లో జరిగిన కార్యక్రమంలో పార్టీ వర్కింగ్‌ ప్రెసిడెంట్‌ కేటీఆర్‌ వారికి గులాబీ కండువాలు కప్పి పార్టీలోకి ఆహ్వానించారు. వేములతో పాటు ఉమ్మడి జిల్లాకు చెందిన నేతలు బాజిరెడ్డి గోవర్ధన్‌, జీవన్‌రెడ్డి, హన్మంత్‌ షిండే, వీజీగౌడ్‌, ఆగయ్య తదితరులు పాల్గొన్నారు. ఈ సందర్భంగా వేముల మాట్లాడుతూ.. కాంగ్రెస్‌పై, పోచారంపై విమర్శలు గుప్పించారు.

కేసీఆర్‌తోనే బాన్సువాడ అభివృద్ధి..

ఆనాటి ముఖ్యమంత్రి కేసీఆర్‌ హయాంలోనే బాన్సువాడ అన్ని విధాలుగా అభివృద్ధి చెందిందని ప్రశాంత్‌రెడ్డి గుర్తు చేశారు. బాన్సువాడలో జరిగిన ప్రతి పనికి కేసీఆరే కారణమని, ప్రతి కుటుంబానికి ఏదో ఒక రూపంలో సంక్షేమ ఫలాలు అందాయన్నారు. పోచారంను గౌరవించి అన్ని విధాలుగా ఆధారించినప్పటికీ చివరకు ఆయన కేసీఆర్‌ను మోసం చేయడాన్ని ప్రజలు జీర్ణించుకోలేక పోతున్నారని తెలిపారు.

నియోజకవర్గంలో కొందరు నాయకులు పార్టీని వీడినా ప్రతి గ్రామంలో, ప్రతి ఇంట్లో కేసీఆర్‌ ను అభిమానించే వారు ఉన్నారని చెప్పారు. వచ్చే ఎన్నికల్లో మరోసారి బీఆర్‌ఎస్‌ గెలవడం ఖాయమని స్పష్టం చేశారు. మాజీ ఎమ్మెల్యే బాజిరెడ్డి గోవర్ధన్‌ బాన్సువాడలో అందరినీ ఏకం చేస్తూ పార్టీకి మార్గనిర్దేశం చేస్తున్నారని తెలిపారు. అలాగే జుబేర్‌, అంజిరెడ్డి, రత్నకుమార్‌, యలమంచలి శ్రీనివాస్‌ తదితర నాయకులు పార్టీ బలోపేతానికి కృషి చేస్తున్నారని అభినందించారు. పార్టీ కార్యకర్తలకు కేటీఆర్‌ అండగా ఉంటారని చెప్పారు.