Gandhari | సర్వాపూర్‌లో విద్యుత్ కొరతపై రైతుల ఆగ్రహం

గంధారి మండలంలోని సర్వపూర్ గ్రామంలో విద్యుత్ కోతలతో పంటలు ఎండిపోతున్నాయని ఆవేదన వ్యక్తం చేస్తూ రైతులు ఆందోళనకు దిగారు. వ్యవసాయానికి సరిపడా విద్యుత్ సరఫరా చేయాలని డిమాండ్ చేస్తూ సబ్‌స్టేషన్‌ను ముట్టడించారు.

Gandhari |  గాంధారి : గంధారి మండలంలోని సర్వపూర్ గ్రామంలో విద్యుత్ కోతలతో పంటలు ఎండిపోతున్నాయని ఆవేదన వ్యక్తం చేస్తూ రైతులు ఆందోళనకు దిగారు. వ్యవసాయానికి సరిపడా విద్యుత్ సరఫరా చేయాలని డిమాండ్ చేస్తూ సబ్‌స్టేషన్‌ను ముట్టడించారు. బాన్సువాడ-గాంధారి రహదారిపై బైఠాయించి ప్రభుత్వానికి వ్యతిరేకంగా నినాదాలు చేయడంతో కొద్దిసేపు ఉద్రిక్త పరిస్థితులు నెలకొన్నాయి. వ్యవసాయ పనులు కీలక దశలో ఉన్న సమయంలో విద్యుత్ సరఫరాలో అంతరాయం ఏర్పడటంతో పంటలకు నీరందించలేక ఇబ్బందులు పడుతున్నామని రైతులు ఆవేదన వ్యక్తం చేశారు.

విద్యుత్ కోతల కారణంగా పంటలు ఎండిపోయే ప్రమాదం ఉందని, ఇప్పటికే సాగు కోసం పెట్టిన పెట్టుబడులు నష్టపోయే పరిస్థితి ఏర్పడిందని వాపోయారు. వ్యవసాయానికి నిరంతరాయంగా విద్యుత్ సరఫరా చేసి తమను ఆదుకోవాలని అధికారులను కోరారు. సబ్‌స్టేషన్ వద్ద రైతులు ఆందోళన చేపట్టడంతో పోలీస్ అధికారులు అక్కడికి చేరుకొని రైతులతో మాట్లాడి వారి సమస్యలను తెలుసుకున్నారు. పరిస్థితులను అదుపులోకి తీసుకున్నారు. రైతుల సమస్యలను అధికారులు ఉన్నతాధికారుల దృష్టికి తీసుకెళ్లి త్వరితగతిన పరిష్కరించాలని గ్రామస్తులు కోరుతున్నారు. వ్యవసాయానికి అవసరమైన సమయంలో విద్యుత్ సరఫరాలో అంతరాయాలు లేకుండా చూడాలని, పంటలు నష్టపోకుండా సంబంధిత శాఖ అధికారులు తగిన చర్యలు చేపట్టాలని రైతులు విజ్ఞప్తి చేశారు. ఈ ఆందోళనలో సర్వపూర్‌తో పాటు పరిసర గ్రామాలకు చెందిన పలువురు రైతులు పాల్గొన్నారు.