రోడ్డు విస్తరణ కోసం సొంతిల్లు కూల్చివేత

రోడ్డు విస్తరణ కోసం అవసరం మేరకు తన ఇంటినే కూల్చివేయించారు కామారెడ్డి ఎమ్మెల్యే కాటిపల్లి వెంకటరమణారెడ్డి. అధికారుల సమక్షంలో శనివారం స్వచ్ఛందగా కూల్చివేత పనులను ప్రారంభించారు.

• స్వచ్ఛందంగా ముందుకు వచ్చిన కామారెడ్డి ఎమ్మెల్యే
• అధికారుల సమక్షంలో తొలగింపు పనులు
• గతంలో ఇచ్చిన మాటను నిలబెట్టుకున్నా: కాటిపల్లి వెంకటరమణారెడ్డి

కామారెడ్డి, జనవరి 27: రోడ్డు విస్తరణ కోసం అవసరం మేరకు తన ఇంటినే కూల్చివేయించారు కామారెడ్డి ఎమ్మెల్యే కాటిపల్లి వెంకటరమణారెడ్డి. అధికారుల సమక్షంలో శనివారం స్వచ్ఛందగా కూల్చివేత పనులను ప్రారంభించారు. కామారెడ్డి పాత బస్ట్టాండ్‌ నుంచి అడ్లూర్‌ వైపు వెళ్లే మార్గంలో ఎమ్మెల్యే కుటుంబానికి దశాబ్దాల క్రితం నిర్మించిన ఓ ఇల్లు ఉన్నది. గతంలో ఈ రోడ్డును మాస్టర్‌ప్లాన్‌లో 80 ఫీట్లుగా చూపగా.. వాస్తవానికి 30 నుంచి 40 ఫీట్ల వరకు మాత్రమే ఉన్నది ఈ మార్గంలో రద్దీ పెరగడంతోపాటు వాహనాల రాకపోకలకు ఇబ్బందులు తలెత్తుతున్నాయి. దీంతో రోడ్డు విస్తరణకు తన ఇల్లు అడ్డుగా ఉందని భావించిన ఎమ్మెల్యే వెంకటరమణారెడ్డి కూల్చివేత నిర్ణయం తీసుకొని ఆర్‌అండ్‌బీ, మున్సిపల్‌ టౌన్‌ప్లానింగ్‌, ట్రాన్స్‌కో అధికారుల దృష్టికి తీసుకెళ్లారు. ఈ సందర్భంగా ఎమ్మెల్యే వెంకటరమణారెడ్డి మాట్లాడుతూ.. ఇచ్చిన మాట ప్రకారం రోడ్డు విస్తరణ కోసం తన ఇంటిని కూల్చి వేసుకుంటున్నట్లు తెలిపారు. రోడ్డు విస్తరణ కోసం అడ్డుగా ఉన్న నిర్మాణాలను స్వచ్ఛందంగా తొలగించుకోవాలని పట్టణప్రజలకు ఆయన సూచించారు. కామారెడ్డి అభివృద్ధి కోసం కలిసి పనిచేస్తానని, తాను ఎవరికీ వ్యతిరేకం కాదని స్పష్టం చేశారు.