study in UK | విదేశాల్లో చ‌ద‌వాల‌ని అనుకుంటున్నారా? అమెరికా కంటే యూకే బెట‌ర్‌.. కార‌ణ‌మిదే

December 13, 2021 / 04:39 PM IST

study in UK | విదేశీ చదువులంటేనే గుర్తుకొచ్చే దేశం అమెరికా. అత్యధికుల కలల సౌధం యూఎస్‌. కానీ, ఇదంతా గతం. ఇప్పుడు విద్యార్థుల ఆలోచన మారింది. అత్యధికులు యూకేలో చదివేందుకు ఇష్టపడుతున్నారు. ఇలా 40 శాతం విద్యార్థులు బ్రిటన్‌లో చదవాలనుకుంటున్నారు. అదే అమెరికాలో విద్యాభ్యాసం కోసం 35 శాతం మంది ఆసక్తిచూపుతున్నారు. ఆ తర్వాతి వరుసలో ఆస్ట్రేలియా, కెనడా, న్యూజిలాండ్‌ దేశాలు నిలిచాయి. ఇలాంటి ఆసక్తికర విషయాలు సనమ్‌ ఎస్‌ 4 సర్వేలో వెలుగుచూశాయి. నవంబర్‌ 2-14 తేదీల్లో తర్వాత 15 -28 తేదీల మధ్యకాలంలో ఆ సంస్థ సర్వేలు నిర్వహించింది. సర్వేల్లో అత్యధికులు యూకేలోనే చదవాలనుకుంటున్నట్టు అభిప్రాయపడ్డారు.

యూకేలో ఉన్న అనుకూలతలివి..

యూకేలో ఆక్స్‌ఫర్డ్‌, కేంబ్రిడ్జి, లండన్‌ స్కూల్‌ ఆఫ్‌ ఎకనామిక్స్‌ వంటి ప్రతిష్ఠాత్మక విశ్వవిద్యాలయాలున్నాయి. మిగిలిన దేశాలతో పోల్చితే ఈ దేశంలో తక్కువ వ్యవధిలోనే యూజీ, పీజీ ప్రోగ్రాములు పూర్తిచేయవచ్చు. ట్యూషన్‌ ఫీజులు సైతం తక్కువ. యూఎస్‌లో నాలుగేండ్ల డిగ్రీ కోర్సులుంటే.. యూకేలో మూడేండ్ల కోర్సులనే నిర్వహిస్తున్నారు. పీజీ కోర్సులు యూఎస్‌లో రెండేండ్లు ఉండగా.. యూకేలో ఏడాదిలోనే పూర్తిచేయవచ్చు. ఇలాంటి అనుకూలతతోనే విద్యార్థులు యూకే వైపు ఆసక్తి చూపుతున్నారు.