‘సలాడ్స్‌ ’తాజాగా ఉండాలంటే..

ఆరోగ్యానికి, బరువు తగ్గడానికి చాలామంది ఇప్పుడు ‘సలాడ్స్‌'నే ఆశ్రయిస్తున్నారు. పండ్లతోనేకాదు.. వివిధ రకాల ఆకుకూరలు, కూరగాయలనూ ఈ రూపంలోనే తీసుకుంటున్నారు. పచ్చిగానే తింటూ.. ఎన్నో అనారోగ్య సమస్యలకు చెక్‌ పెడుతున్నారు. సలాడ్స్‌ తయారీలో రకరకాల పండ్లు, కూరగాయలను ఉపయోగిస్తాం.

ఆరోగ్యానికి, బరువు తగ్గడానికి చాలామంది ఇప్పుడు ‘సలాడ్స్‌’నే ఆశ్రయిస్తున్నారు. పండ్లతోనేకాదు.. వివిధ రకాల ఆకుకూరలు, కూరగాయలనూ ఈ రూపంలోనే తీసుకుంటున్నారు. పచ్చిగానే తింటూ.. ఎన్నో అనారోగ్య సమస్యలకు చెక్‌ పెడుతున్నారు. సలాడ్స్‌ తయారీలో రకరకాల పండ్లు, కూరగాయలను ఉపయోగిస్తాం. ఇందుకోసం ఒక్కసారే ఎక్కువ మొత్తంలో కొనుగోలు చేయాల్సి వస్తుంది. అయితే, కొన్నిరకాల పండ్లు, కూరగాయలు రెండు, మూడు రోజులకే కుళ్లిపోతాయి. మరి, ఆరోగ్యానికి భరోసా ఇచ్చే సలాడ్స్‌ తాజాగా ఉండాలంటే.. కొన్ని చిట్కాలు పాటించాల్సిందే!

• ఆకుకూరలు, కూరగాయలను తడిగా ఉన్నప్పుడు నిల్వ చేస్తే త్వరగా పాడైపోతాయి. అందుకే, వాటిని శుభ్రంగా కడిగిన తర్వాత పొడిగా ఉండేలా టవల్‌తో బాగా తుడుచుకోవాలి. డ్రై పేపర్‌లో చుట్టి, ఎయిర్‌టైట్‌ కంటెయినర్లలో స్టోర్‌ చేసుకోవాలి.
• కొంతమంది తీరిక దొరికినప్పుడే పండ్లు, కూరగాయలన్నిటినీ కట్‌చేసి, ఫ్రిడ్జ్‌లో పెట్టేస్తుంటారు. దీనివల్ల ఆక్సీకరణ చెంది ముక్కలు రంగు మారుతాయి. ఇలాకాకుండా ఉండాలంటే.. వాటిని గాలి చొరబడని కంటైనర్‌లో ఉంచి, ఫ్రిడ్జ్‌లో పెట్టాలి.
• యాపిల్‌, అవకాడో, అరటి లాంటి పండ్ల ముక్కలను వేరువేరుగా నిల్వ చేసుకోవాలి. ఎందుకంటే ఇవి ఇథిలీన్‌ గ్యాస్‌ను ఉత్పత్తి చేస్తాయి. అది అనారోగ్యాన్ని కలిగిస్తుంది.
• ఎసిడిటీని కలిగించే టమాట, సిట్రస్‌ జాతి పండ్లను తినేముందే సలాడ్స్‌కు జోడించాలి. ద్రాక్ష, బత్తాయి, ఆరెంజ్‌ లాంటివి చేర్చిన తర్వాత తినడం ఆలస్యమైతే.. సలాడ్‌ చేదుగా మారుతుంది.
• పండ్లు, కూరగాయలతో పోలిస్తే.. ఆకుకూరలు త్వరగా కుళ్లిపోతాయి. అందుకే, పైన అలంకరణ కోసం ఉపయోగించే ఆకుకూరలను విడిగా నిల్వ చేసుకోవాలి. సర్వ్‌ చేయడానికి సిద్ధంగా ఉన్నప్పుడే డ్రెస్సింగ్‌ చేయడం మంచిది.