Visit:
Fruits With Pulp | త‌ర‌చూ పండ్ల‌ను తిన‌డం వ‌ల్ల మ‌న‌కు ఎలాంటి లాభాలు క‌లుగుతాయో అంద‌రికీ తెలిసిందే. ఒక్కో ర‌క‌మైన పండును తిన‌డం వ‌ల్ల అనేక విధాలైన ఆరోగ్య‌క‌ర ప్ర‌యోజ‌నాలు క‌లుగుతాయి. మ‌న శ‌రీరానికి కావ‌ల్సిన అనేక పోషకాలు కూడా ల‌భిస్తాయి. పండ్ల‌ను రోజువారి ఆహారంలో భాగం చేసుకుంటే అనేక లాభాల‌ను పొంద‌వచ్చు. శ‌రీరానికి ప‌లు పోషకాలు లభించి ప‌లు వ్యాధులు సైతం న‌యం అవుతాయి. అయితే దాదాపుగా అన్ని ర‌కాల పండ్ల‌ను మ‌నం తొక్క తీసి తింటాం. కానీ మీకు తెలుసా.. కొన్ని ర‌కాల పండ్ల‌ను మాత్రం మ‌నం తొక్క తీయ‌కుండానే తినాలి. అవును, మీరు విన్న‌ది నిజ‌మే. కొన్ని ర‌కాల పండ్ల తొక్క‌లో కూడా అనేక పోషకాలు ఉంటాయి. అలాంట‌ప్పుడు ఆ పండ్ల‌ను తొక్క తీసి తింటే మ‌న‌కు పోషకాలు ల‌భించ‌వు. క‌నుక కొన్ని ర‌కాల పండ్ల‌ను మ‌నం తొక్క తీసే తినాల్సి ఉంటుంది. ఇక ఆ పండ్లేమిటో ఇప్పుడు తెలుసుకుందాం.
యాపిల్ పండ్లలో పోషకాలు అధికంగా ఉంటాయి. యాంటీ ఆక్సిడెంట్లు, ఫైటో న్యూట్రియెంట్లు ఉంటాయి. అయితే ఇవి యాపిల్ పండ్లలో ఎలా ఉంటాయో వాటి తొక్క‌లో కూడా అంతే విధంగా ఉంటాయి. క‌నుక యాపిల్ పండ్ల‌ను తొక్క తీయ‌కుండా అలాగే తినాలి. దీని వ‌ల్ల యాంటీ ఆక్సిడెంట్లు ఎక్కువ‌గా ల‌భిస్తాయి. త‌ద్వారా శ‌రీర రోగ నిరోధ‌క శ‌క్తి పెరుగుతుంది. యాపిల్ పండ్ల‌ను చాలా మంది తొక్క తీసి తింటారు. కానీ ఈ పండ్ల‌ను శుభ్రంగా క‌డిగి తొక్క‌తో స‌హా తినాలి. అప్పుడే మ‌న‌కు పూర్తి స్థాయిలో లాభాలు క‌లుగుతాయి. అలాగే పియర్స్ అనే పండ్ల‌ను కూడా మ‌నం తొక్క తీయ‌కుండానే తినాలి. దీని వ‌ల్ల ఆ తొక్క‌లో ఉండే యాంటీ ఆక్సిడెంట్లు, ఫైటో న్యూట్రియంట్లు మ‌న శ‌రీరానికి అందుతాయి. అంతేకాదు, పియర్స్ పండ్ల తొక్క‌లో యాంటీ ఇన్‌ఫ్లామేట‌రీ గుణాలు మెండుగా ఉంటాయి. అందువ‌ల్ల అవి మ‌న‌కు క‌లిగే వాపుల‌ను, నొప్పుల‌ను త‌గ్గించుకునేందుకు ఉప‌యోగ‌ప‌డ‌తాయి. క‌నుక ఈ పండ్ల‌ను తొక్క‌తో స‌హా తినాల్సి ఉంటుంది.
చాలా మంది స‌పోటా పండ్ల‌ను తొక్క తీసి తింటారు. అయితే అలా కాకుండా తొక్క‌తోనే నేరుగా తినాలి. దీని వ‌ల్ల జీర్ణాశ‌యం శుభ్ర‌మ‌వుతుంది. దీంతోపాటు పొటాషియం, ఐర‌న్‌, ఫోలేట్, పాంటోథెనిక్ యాసిడ్ వంటి పోషకాలు మ‌న‌కు ల‌భిస్తాయి. కివీ పండ్ల‌ను తొక్క తీయ‌కుండా తింటే దాంతో ఆ తొక్క‌లో ఉండే ఔషధ గుణాలు ఆందోళ‌న‌ను, ఒత్తిడిని దూరం చేస్తాయి. యాంటీ ఆక్సిడెంట్లు, విట‌మిన్ సి ఉండ‌డం వ‌ల్ల శ‌రీర రోగ నిరోధ‌క శ‌క్తి పెరుగుతుంది. మ‌ల‌బ‌ద్ద‌కం తొల‌గిపోతుంది. జీర్ణ స‌మ‌స్య‌లు త‌గ్గుతాయి. కివి పండ్ల తొక్క చూసేందుకు అంత ఆక‌ర్ష‌ణీయంగా ఉండ‌దు. కానీ ఈ తొక్క‌లోనూ అనేక పోషకాలు ఉంటాయి. క‌నుక కివి పండ్ల‌ను కూడా తొక్క తీయ‌కుండానే తినాల్సి ఉంటుంది.
మామిడి పండ్ల‌ను కూడా చాలా మంది తొక్క తీసి తింటారు. కానీ అలా చేయ‌కూడ‌దు. ఈ పండ్ల‌ను తొక్క‌తోనే తినాలి. దీంతో విట‌మిన్ సి పుష్క‌లంగా ల‌భిస్తుంది. శ‌రీర రోగ నిరోధ‌క శ‌క్తి రెట్టింపు అవుతుంది. ఇన్‌ఫెక్ష‌న్లు త‌గ్గిపోతాయి. అలాగే మామిడి పండ్ల‌ను తొక్క‌లో ఉండే కెరోటినాయిడ్లు, పాలీఫినాల్స్ అనే స‌మ్మేళ‌నాలు క్యాన్స‌ర్‌, డ‌యాబెటిస్‌, గుండె జ‌బ్బుల‌ను దూరం చేస్తాయి. క‌నుక మామిడి పండ్ల‌ను తొక్క‌తో స‌హా తినాల్సి ఉంటుంది.
