మ‌ధ్య త‌ర‌గ‌తిపై ధరల మోత! విలవిల్లాడుతున్న సామాన్యుడు

• 8 ఏండ్లలో 60-75% పెరిగిన రేట్లు
• పరుగులు తీస్తున్న పెట్రోల్‌, డీజిల్‌
• రెండింతలు పెరిగిన ఇంటి ఖర్చులు
• అడుగంటుతున్న ప్రజల ఆదాయాలు
• జనాల్లో పడిపోతున్న కొనుగోలు శక్తి
• విందులు, వినోదాలకు బహు దూరం

హైదరాబాద్‌, ఏప్రిల్‌ 11 (నమస్తే తెలంగాణ): కేంద్రంలోని మోదీ సర్కారు అవలంబిస్తున్న ఆర్థిక విధానాలతో నిత్యావసరాలు మొదలు పెట్రోల్‌ రేట్ల దాకా అన్నీ ఆకాశాన్ని తాకుతున్నాయి. ఈ ప్రభావం ఎక్కువగా మధ్యతరగతి మీదే పడుతున్నది. ఫలితంగా సగటు పౌరుడు రోజురోజుకు పేదరికంలోకి జారుకొంటున్నాడు. కేంద్ర వాణిజ్య వ్యవహారాల శాఖ, కేంద్ర ఆర్థిక శాఖ, కేంద్ర కార్మిక, ఉపాధి మంత్రిత్వ శాఖ, తదితర శాఖలు వెల్లడిస్తున్న గణాంకాలే ఉదాహరణే ఈ విషయాన్ని స్పష్టం చేస్తున్నాయి. దేశ జనాభాలో మధ్య తరగతి జనాభా.. 29 శాతం. జాతీయ ఆదాయంలో వారిదే 79 శాతం వాటా. దేశీయ వస్తు ఉత్పత్తుల వినియోగదారుల్లో 70 శాతం వారే ఉన్నారు. అంటే.. దేశ ప్రగతిలో వారి పాత్ర ఎంత కీలకమో అర్థం చేసుకోవచ్చు.

కేంద్ర అసమర్థ విధానాల ఫలితంగా ఇప్పుడు దేశంలోని మధ్యతరగతి కొనుగోలు శక్తి నానాటికీ దిగజారిపోతున్నది. నలుగురు కుటుంబసభ్యుల సగటు ఖర్చు ఎనిమిదేండ్లలో రెండింతలైంది. నిత్యావసర సరుకులు, రవాణా ఖర్చులు, విద్య, వైద్యం, అద్దె.. ఇలా అన్ని ఖర్చులూ డబుల్‌ అయ్యాయి. అదే స్థాయిలో ఆదాయం పెరగకపోవటం, సబ్సిడీల్లో కేంద్రం కోతలు విధించటంతో కుటుంబ అవసరాలను కూడా తీర్చుకోలేని దుస్థితికి మధ్యతరగతి ప్రజలు చేరుకొన్నారు. కొనుగోలు శక్తిని కోల్పోతూ క్రమంగా పేదరికంలోకి జారుతున్నారు. కరోనా కూడా తోడవ్వటంతో మధ్యతరగతి బడ్జెట్‌ తారుమారైంది. దేశంలో ఏడాది కాలంలో ఏకంగా 36 లక్షల మంది పేదరికంలోకి చేరినట్టు సర్వేలు వెల్లడిస్తున్నాయి. గతంలో జీతంలో కనీసం 10 శాతం పొదుపు చేసే అవకాశం ఉండగా, ప్రస్తుతం అప్పులతో నెట్టుకు రావాల్సిన దుస్థితి తలెత్తింది.

బీజేపీ అసమర్థ ఆర్థిక విధానాలు, సబ్సిడీల్లో కోతలు

• డీజిల్‌, పెట్రోల్‌ ధరలు పెరిగి, సరుకు రవాణా ఖర్చు లు పెరిగాయి. దాని ప్రభావం నిత్యావసర సరుకుల ధరలపై పడుతున్నది. ద్రవ్యోల్బణం రేటు తగ్గుతున్నా సరుకుల ధరలు విపరీతంగా పెరుగుతున్నాయి.
•  నిత్యావసర సరుకుల ఎగుమతులపై ఆంక్షలను ఎత్తివేయడం, దిగుమతులపై భారీగా సుంకాలను విధి ంచడం.
• దేశంలో పప్పులు, నూనె గింజలు మినహాయించి మిగతా అన్ని రకాల వస్తువులు సమృద్ధిగా ఉన్నాయి. అయినా విదేశీ మారక ద్రవ్యం పెంచుకొనేందుకు కేంద్రం వాటి ఎగుమతులను ప్రోత్సహిస్తున్నది. ఫలితంగా దేశీయంగా వాటి ధర పెరుగుతున్నది.
• దిగుమతులపై సుంకాలు విధించటంతో పప్పులు, నూనెల రేట్లు ఆకాశాన్నంటుతున్నాయి.
• బీజేపీ ప్రభుత్వం ఆహార సబ్సిడీల్లో కోతలు విధిస్తున్నది. 2022-23 బడ్జెట్‌లో ఆహార సబ్సిడీలో 28 శాతం, ఎరువుల సబ్సిడీలో 25 శాతం, ఇంధన సబ్సిడీలో సుమారు 11 శాతం మేర కోత విధించింది.
•  నిత్యావసర వస్తువుల ధరలు పెరుగుతుంటే.. విలా స వస్తువులు, ఇంటర్నెట్‌ డాటా ధరలు తగ్గుతుండ డం కేంద్ర అసమర్థ ఆర్థిక విధానానికి నిదర్శనం.

ఇవే విధానాలు కొనసాగితే శ్రీలంక లాంటి పరిస్థితే

కేంద్ర విధాన వైఫల్యాల వల్లే నిత్యావసర సరుకులు పెరుగుతున్నా యి. ప్రజల కొనుగోలు శక్తిని పెంచేందుకు ఉద్దీపన ప్యాకేజీలు లేవు. ఎఫ్‌సీఐలో 86 మిలియ న్‌ టన్నుల ధాన్యం నిల్వలు ఉన్నాయి. పప్పులు, నూనెగింజలు మినహా ఇతర పంటలన్నీ దేశీయ అవసరాలకు మించి ఉన్నా యి. అయినా కేంద్రం నిర్వహణ లేమీతో ధరలు పెరిగిపోతున్నాయి. ఇవే విధానాలు కొనసాగితే దేశం శ్రీలంకలా మారినా ఆశ్చర్యపోనక్కర్లేదు.
– డీ పాపారావు, ఆర్థికవేత్త

ట్రాన్స్‌పోర్టు ఖర్చులువిపరీతంగా పెరిగాయి

పెట్రోల్‌, డీజిల్‌ ధరలు పెరగటం వల్ల ట్రాన్స్‌పోర్టు ఖర్చులు విపరీతంగా పెరిగిపోయాయి. ఫలితంగా నిత్యావసర సరుకుల ధరలు పెరిగిపోతున్నాయి. రవాణా ఖర్చలు తగ్గితే ఆటోమెటిక్‌గా సరుకుల ధరలు తగ్గుతాయి.
– నవీన్‌,కిరాణ వ్యాపారి, ఎర్రగడ్డ