Hyderabad Metro | మెట్రో రైల్‌ ఫర్‌ సేల్‌.. ఫ్రీ బస్సు వల్ల మేం మెట్రోను నడపలేం: ఎల్‌అండ్‌టీ ప్రెసిడెంట్‌ శంకర్‌ రామన్‌

హైదరాబాద్‌కు మణిహారంగా చెప్పుకొనే మెట్రో రైలును త్వరలో అమ్మకానికి పెట్టబోతున్నారు. ఈ ప్రాజెక్టు నిర్వహణ బాధ్యతల నుంచి తప్పుకోబోతున్నట్టు ఎల్‌ అండ్‌ టీ సంస్థ ప్రెసిడెంట్‌, శాశ్వత డైరెక్టర్‌, సీఎఫ్‌వో ఆర్‌ శంకర్‌ రామన్‌ స్వయంగా ప్రకటించారు.

• మహిళలకు ఉచిత బస్సు ప్రయాణం ఎఫెక్ట్‌
• అమ్మకానికి పెడ్తున్న ఎల్‌ అండ్‌ టీ కంపెనీ
• 2026 తర్వాత విక్రయించే యోచన
• నష్టాలు అంతకంతకూ పెరుగుతున్నయ్‌
• ఎల్‌అండ్‌టీ ప్రెసిడెంట్‌ కీలక వ్యాఖ్య

Hyderabad Metro | హైదరాబాద్‌, మే 11 (స్పెషల్‌ టాస్క్‌ బ్యూరో, నమస్తే తెలంగాణ): హైదరాబాద్‌కు మణిహారంగా చెప్పుకొనే మెట్రో రైలును త్వరలో అమ్మకానికి పెట్టబోతున్నారు. ఈ ప్రాజెక్టు నిర్వహణ బాధ్యతల నుంచి తప్పుకోబోతున్నట్టు ఎల్‌ అండ్‌ టీ సంస్థ ప్రెసిడెంట్‌, శాశ్వత డైరెక్టర్‌, సీఎఫ్‌వో ఆర్‌ శంకర్‌ రామన్‌ స్వయంగా ప్రకటించారు. 2026 తర్వాత విక్రయానికి సంబంధించిన నిర్ణయం ఉంటుందని పేర్కొన్నారు.

మహిళలకు ఫ్రీ బస్సు సౌకర్యం పేరిట కాంగ్రెస్‌ ప్రభుత్వం తీసుకొచ్చిన ‘మహాలక్ష్మి’ స్కీమ్‌ కారణంగానే హైదరాబాద్‌ మెట్రో నిర్వహణ నుంచి వైదొలుగుతున్నట్టు ఆయన తేల్చి చెప్పారు. ‘ఫ్రీ’ బస్సు స్కీమ్‌ పథకంతో మెట్రో ఆదాయానికి గండిపడిందని పేర్కొన్నారు. ఇలాంటి సమయంలో మెట్రో రైళ్ల నిర్వహణ ఎలా సాధ్యమని ప్రశ్నించారు. ‘ఫ్రీ’ బస్సు స్కీమ్‌తో తెలంగాణ ఆర్టీసీ కూడా దివాళా తీసే దుస్థితి రావొచ్చని హెచ్చరించారు. ఈ మేరకు ఇంగ్లీష్‌ వార్తాఛానల్‌ ‘బిజినెస్‌ టుడే’ టీవీకి ఇచ్చిన ఇంటర్వ్యూలో పలు కీలక వ్యాఖ్యలు చేశారు.

ఇంటర్వ్యూలో శంకర్‌ రామన్‌ కీలక వ్యాఖ్యలు

• హైదరాబాద్‌ మెట్రో నిర్వహణ బాధ్యతల నుంచి తప్పుకోవాలని భావిస్తున్నాం. 2026 తర్వాత దీనిపై నిర్ణయిస్తాం. ప్రాధాన్యంలేని వ్యాపారాల్లో భాగస్వామ్యాన్ని ఉపసంహరించుకొనే చర్యల్లో భాగంగా ఈ విక్రయం ఉంటుంది.
• మహిళలకు ఫ్రీ బస్సు సౌకర్యం పేరిట కాంగ్రెస్‌ ప్రభుత్వం తీసుకొచ్చిన ‘మహాలక్ష్మి’ స్కీమ్‌ కారణంగానే హైదరాబాద్‌ మెట్రో నిర్వహణ బాధ్యతల నుంచి వైదొలుగాలనుకొంటున్నాం.
• బస్సుల్లో ఉచిత ప్రయాణం ఉండటంతో మహిళలు ఎవరూ మెట్రోలో ప్రయాణించడానికి ఆసక్తి చూపించట్లేదు.
• రద్దీకి తగినట్టు బస్సుల సంఖ్యను ప్రభుత్వం పెంచట్లేదు. బస్సుల్లో సీట్లు దొరకని పురుషులు మాత్రమే మెట్రో ఎక్కుతున్నారు. లేడీస్‌ కంపార్ట్‌మెంట్లు అన్నీ దాదాపుగా ఖాళీగానే కనిపిస్తున్నాయి. క్యాబ్‌ సర్వీసులు పెరుగడం కూడా మెట్రోపై ప్రభావం చూపిస్తున్నది.
• వైదొలగాలనుకొన్న నిర్ణయం ఒక్కరోజులో తీసుకొన్నది కాదు. ‘ఫ్రీ’ బస్సు స్కీమ్‌ అమల్లోకి వచ్చినప్పటి నుంచి మెట్రోకు వస్తున్న నష్టాలను విశ్లేషించిన తర్వాతే ఈ ఆలోచనకు వచ్చాం.
• మెట్రో నిర్వహణకు సంబంధించి మరో 65 ఏండ్ల పాటు మాకు పలు రాయితీలు ఉన్నాయి. అయినప్పటికీ, నష్టాలను భరించలేకే వైదొలగాలనుకొంటున్నాం.
• మెట్రోలో ప్రస్తుతం రోజుకు 4.8 లక్షల మంది ప్రయాణిస్తున్నారు. మేం నడుపుతున్న సర్వీసులు, నిర్వహణ వ్యయం, ఇతరత్రా ఖర్చులతో పోలిస్తే, ఈ సంఖ్య సరిపోదు. దీంతో నష్టాలు వస్తున్నాయి.
• మహిళలు ఒక్క పైసా చెల్లించకుండా బస్సులను ప్రయాణ సాధనంగా వినియోగించుకొంటే, సగటున రూ. 35 టికెట్‌ చెల్లించి పురుషులు మెట్రోల్లో ప్రయాణిస్తున్నారు. ఈ పరిణామం రవాణా వ్యవస్థలో ఒకవిధంగా లింగ పంపిణీకి దారితీస్తున్నది.
• రాజకీయ వాగ్ధానాలకు లోబడి కొనసాగుతున్న ‘ఫ్రీ’ బస్సు పథకం రాష్ట్ర ఆర్థిక వ్యవస్థకు ఏవిధంగానూ ఉపయోగకరంగా ఉండబోదు.
• ఈ స్కీం తెలంగాణ రాష్ట్ర రోడ్డు రవాణా సంస్థ (టీఎస్‌ఆర్టీసీ)ని అప్పుల పాల్చేసి దివాళా తీసేలా చేస్తుంది. ఇది సరదా విషయం కాదు.
• నిజానికి బస్సులకు ప్రతీ 5 ఏండ్లకు ఒకసారి మరమ్మతులు చేయాల్సి ఉంటుంది. ‘ఫ్రీ’ ప్రయాణాన్ని కల్పించుకొంటూ పోతుంటే.. బస్సుల మెయింటెనెన్స్‌కు డబ్బులు ఎక్కడ నుంచి వస్తాయి?
• కాలుష్యంలేని, ఆధునిక రవాణా వ్యవస్థలపై (మెట్రో సర్వీసులు) ప్రైవేటు సంస్థలు తమ డబ్బును ఖర్చు పెడుతుంటే.. వాతావరణ కాలుష్యానికి కారణమవుతున్న బస్సుల్లో ప్రజలు ఉచితంగా ప్రయాణించేందుకు ప్రభుత్వం డబ్బును వెదజల్లుతున్నది. ఇది ఆహ్వానించదగ్గ పరిణామం కాదు.