స్కూళ్లకు స్వాగత తోరణాలు

• 2 లక్షలతో ప్రతి బడికి ఏర్పాటు
• 1.5 లక్షలతో పాత్‌వేలు కూడా
• తొలివిడతలో 9,123 స్కూళ్లకు..
• ‘మన ఊరు – మన బడి’లో నిర్మాణం

హైదరాబాద్‌, జనవరి 29 : తెలంగాణలో ప్రతి దేవాలయం ముందు స్వాగత తోరణం రా రమ్మంటూ భక్తులకు స్వాగతం పలుకుతుంటుంది. ప్రతి బడి కూడా గుడిలాంటిదే.. కాబట్టి ప్రతి పాఠశాల ముందు స్వాగత తోరణం నిర్మించాలని రాష్ట్ర ప్రభుత్వం నిర్ణయించింది. పవిత్రమైన బడిలోకి మట్టి, బురద కాళ్లతో వెళ్లకుండా పరిశుభ్రత పాటించేలా.. పాత్‌వేలను సైతం నిర్మించనున్నది. పాఠశాల గేటు నుంచి తరగతి గదులు, మూత్రశాలలకు చేరుకునేలా నడకదారులు (పాత్‌వే) నిర్మించనున్నారు. మన ఊరు – మన బడి పథకం తొలివిడతలో 9,123 పాఠశాలల్లో.. ఒక్కో స్కూళ్లో 100 -150 మీటర్ల పొడవైన పాత్‌వేను నిర్మించనున్నారు. సర్కారు స్కూళ్లలో విశాలమైన మైదానాలు, ఆటస్థలాలు ఉంటాయి. రాళ్లు రప్పలు, మట్టిదారుల్లో విద్యార్థులు నడస్తూ బడికి చేరుకోవడంతో ప్రాంగణాల్లోకి మట్టి దుమ్ముధూళి కణాలు చేరుతున్నాయి. వర్షం పడ్డప్పుడు బురద, మట్టి తరగతి గదులకు చేరుతూ ఉంటుంది. ప్రాంగణాల్లోని బ్యాక్టీరియా, వైరస్‌, ఫంగస్‌లు విద్యార్థుల ఆరోగ్యాన్ని దెబ్బతీస్తున్నాయి. వీటి నుంచి విద్యార్థులను రక్షించడంలో భాగంగా పాత్‌వేలను నిర్మించనున్నారు.

పాత్‌వే ప్రత్యేకతలు..

• విద్యార్థులు నడవడానికి ఆరు ఫీట్లు, వాహనాల రాకపోకలకు 10 ఫీట్ల వెడల్పు
• ఒక్కో పాఠశాలలో 100 నుంచి 150 మీటర్ల పొడవుతో వీటిని నిర్మిస్తారు.
• 60 ఎంఎం, 75 ఎంఎం లైట్‌వేయిట్‌ పేవ్‌మెంట్‌ బ్లాక్స్‌తో పాత్‌వేను నిర్మిస్తారు.
• విద్యార్థులు నడిచే పాత్‌వేకు లైట్‌ ట్రాఫిక్‌, వాహనాల పాత్‌వేకు మీడియం, హెవీ ట్రాఫిక్‌ పేవ్‌మెంట్‌ బ్లాక్స్‌ను వినియోగిస్తారు.
• వాననీరు ఇంకిపోయేలా, నీరు నిల్వకుండా ప్రత్యేక ఏర్పాట్లు ఉంటాయి.
• చదరపు మీటర్‌కు రూ.800 అంచనా వ్యయంతో వీటిని నిర్మించనున్నారు.
• ఒక్కో స్కూలులో రూ.1.2 లక్షల నుంచి 1.5 లక్షలతో పాత్‌వేను నిర్మిస్తారు.
• స్వాగత తోరణాన్ని రూ.2 లక్షల అంచనా వ్యయంతో కట్టనున్నారు.
• పాత్‌వే ఇరువైపులా పూలమొక్కలను నాటడం లేదా కుండీలను ఏర్పాటు చేస్తారు.