ఎస్బీఐ అదుర్స్‌

• రికార్డు స్థాయి లాభాలను ఆర్జించిన బ్యాంక్‌
• క్యూ3లో రూ.8,432 కోట్లుగా నమోదు

ముంబై, ఫిబ్రవరి 5: దేశీయ బ్యాంకింగ్‌ దిగ్గజం స్టేట్‌ బ్యాంక్‌ ఆఫ్‌ ఇండియా(ఎస్బీఐ) ఆర్థిక ఫలితాల్లో రాణించింది. మొండి బకాయిలు కోసం నిధులు కేటాయింపులు భారీగా తగ్గడంతో ప్రస్తుత ఆర్థిక సంవత్సరం మూడో త్రైమాసికానికిగాను రూ.8,432 కోట్ల స్టాండలోన్‌ నికర లాభాన్ని ఆర్జించింది. బ్యాంక్‌ చరిత్రలో ఇంతటి స్థాయిలో నికర లాభాన్ని ఆర్జించడం ఇదే తొలిసారి. 2020-21 ఆర్థిక సంవత్సరం ఇదే త్రైమాసికంలో నమోదైన రూ.5,196 కోట్ల లాభంతో పోలిస్తే 62 శాతం అధికమని పేర్కొంది. ఏడాది క్రితం రూ.75,981 కోట్లుగా ఉన్న బ్యాంక్‌ ఆదాయం గత త్రైమాసికానికిగాను రూ.78,352 కోట్లకు ఎగబాకినట్లు బీఎస్‌ఈకి సమాచారం అందించింది. ఏకీకృత విషయానికి వస్తే ఎస్బీఐ గ్రూపు నికర లాభం ఏడాది ప్రాతిపదికన 51 శాతం ఎగబాకి రూ.9,692 కోట్లుగా ఉన్నది.

‘వరుస త్రైమాసికాల్లో బ్యాంక్‌ పనితీరు మెరుగుపడుతున్నది. వడ్డీల మీద వచ్చే ఆదాయం పెరుగుతుండటం వల్లనే రికార్డు స్థాయి లాభాలను ఆర్జించడం జరిగింది. మొండి బకాయిల కోసం నిధుల కేటాయింపులు తగ్గుముఖం పట్టడం కలిసొచ్చింది’
– దినేశ్‌ ఖారా,ఎస్బీఐ చైర్మన్‌

• నికర వడ్డీ ఆదాయం 6.48 శాతం పెరిగి రూ.30,687 కోట్లుగా నమోదైంది.
  గత త్రైమాసికంలో మొండి బకాయిలను పూడ్చుకోవడానికి రూ.1,700 కోట్ల నిధులను మాత్రమే వెచ్చించింది.
• నికర వడ్డీ మార్జిన్‌ 3.34 శాతం నుంచి 3.40 శాతానికి పెరిగింది.
• బ్యాంక్‌ స్థూల నిరర్థక ఆస్తుల విలువ రేషియో 4.77 శాతం నుంచి 4.50 శాతానికి దిగొచ్చింది. అలాగే నికర ఎన్‌పీఏ 1.23 శాతం నుంచి 1.34 శాతానికి పెరిగింది.
• తాజాగా రూ.2,334 కోట్ల రుణాలు మొండి బకాయిల జాబితాలోకి చేరాయి.
• గత త్రైమాసికంలో రూ.2,306 కోట్ల మొండి బకాయిలు తిరిగి వసూలు అయ్యాయి. ఏడాది క్రితం ఇది రూ.5,657 కోట్లుగా ఉన్నది.
• ప్రొవిజనింగ్‌ కవరేజ్‌ రేషియో 88.32 శాతంగా ఉన్నది.
• స్థూల అడ్వాన్స్‌లు 8.47 శాతం పెరిగి రూ.26,64.602 కోట్లకు చేరుకున్నాయి. దీంట్లో దేశీయ అడ్వాన్స్‌ల్లో 6.47 శాతం వృద్ధి కనబరిచింది.