Singireddy Niranjan Reddy | నార్లపూర్ పంపు ఆన్ చేయకపోతే కార్యాచరణకు సిద్ధం : సింగిరెడ్డి నిరంజన్ రెడ్డి

Singireddy Niranjan Reddy | నార్లపూర్ రిజర్వాయర్ , పంపు హౌస్ సిద్ధంగా ఉన్నా నాయకుల నిర్లక్ష్యధోరణితో నీళ్లు ఇవ్వకపోవడంతో పంటలు ఎండిపోయి రైతులకు వేలాది కోట్ల పంట నష్టం జరుగుతుందని మాజీ మంత్రి సింగిరెడ్డి నిరంజన్ రెడ్డి ఆగ్రహం వ్యక్తం చేశారు.

మహబూబ్‌నగర్‌ : నార్లపూర్ రిజర్వాయర్ ( Narlapur Reservior ) , పంపు హౌస్ సిద్ధంగా ఉన్నా నాయకుల నిర్లక్ష్యధోరణితో నీళ్లు ఇవ్వకపోవడంతో పంటలు ఎండిపోయి రైతులకు వేలాది కోట్ల పంట నష్టం జరుగుతుందని మాజీ మంత్రి సింగిరెడ్డి నిరంజన్ రెడ్డి ( Singireddy Niranjan Reddy ) ఆగ్రహం వ్యక్తం చేశారు.

పాలమూరు రంగారెడ్డి ప్రాజెక్టులో అంతర్భాగ మైన నార్లపూర్ రిజర్వాయర్‌ను మాజీ ఎమ్మెల్యే బీరం హర్షవర్ధన్ రెడ్డితో కలసి సోమవారం సందర్శించారు.  ఈ సందర్భంగా నిరంజన్ రెడ్డి మాట్లాడుతూ 24గంటల కరెంట్ ఇస్తే పంపులు ప్రారంభిస్తామని అధికారులు నివేదికలు ఇచ్చినా, జిల్లా మంత్రులు పెడచెవిన పెట్టి రైతులను ఆగం చేస్తున్నారని ధ్వజం ఎత్తారు.

మంత్రి కృష్ణా రావు బీర్ల కంపెనీకి నీళ్లు ఇవ్వాలని అంటారు. కానీ రైతుల గురించి పట్టించుకోవడం లేదని ఎద్దేవా చేశారు.ఒకటి రెండు రోజులలో నార్లపూర్ పంపు ఆన్ చేయకపోతే కార్యాచరణకు పూనుకొని రైతులకు అండగా నిలుస్తామని హెచ్చరించారు.
కేసీఆర్‌ హయాంలో నార్లపూర్ రిజర్వాయర్ పంపు హౌస్ సిద్ధం చేసి 145 మెగావాట్ల సామర్థ్యం కలిగిన 5 మోటార్లు సిద్ధం చేసి , ఒక పంపు ఆన్ చేసి రిజర్వాయర్ నుంచి నీళ్లు ట్రయల్‌ రన్‌ ద్వారా విడుదల చేశారని ఆరోపించారు.

రేవంత్ రెడ్డితో జిల్లాకు ఒరిగిందేమి లేదని విమర్శించారు. మంత్రులకు బీర్ల కంపెనీకి నీళ్లు ఇచ్చే ద్యాస తప్పా రైతుల పట్ల సోయి లేదని నిరంజన్ రెడ్డి తీవ్రంగా విమర్శించారు.
ఇప్పటికైనా కల్వకుర్తి 3 పంపులు 24గంటలు నిర్విరామంగా నడపాలని, నార్లపూర్ ఒక పంపు నడిపి రైతులను ఆదుకోవాలని నిరంజన్ రెడ్డి డిమాండ్‌ చేశారు.