Bhagat Singh Photo On Voter List | ఓటర్ల జాబితాలో భగత్ సింగ్ ఫొటో.. విమర్శలపై ఎన్నికల అధికారుల వివరణ

Bhagat Singh Photo On Voter List | ప్రముఖ స్వాతంత్ర్య సమరయోధుడు భగత్ సింగ్ ఫొటో ఓటర్ల జాబితాలో కనిపించింది. ఇది రాజకీయ వివాదానికి దారితీసింది. దీనిపై విమర్శలు వెల్లువెత్తడంతో ఎన్నికల అధికారి వివరణ ఇచ్చారు. ఈ పొరపాటును గుర్తించి సరిదిద్దినట్లు తెలిపారు.

చండీగఢ్‌: ప్రముఖ స్వాతంత్ర్య సమరయోధుడు భగత్ సింగ్ ఫొటో ఓటర్ల జాబితాలో కనిపించింది. ఇది రాజకీయ వివాదానికి దారితీసింది. దీనిపై విమర్శలు వెల్లువెత్తడంతో ఎన్నికల అధికారి వివరణ ఇచ్చారు. ఈ పొరపాటును గుర్తించి సరిదిద్దినట్లు తెలిపారు. (Bhagat Singh Photo On Voter List) పంజాబ్‌లో ఈ సంఘటన జరిగింది. లూధియానా తూర్పు అసెంబ్లీ నియోజకవర్గం ఓటర్ల జాబితాలోని ‘పార్ట్ 38’లో వరుస సంఖ్య 422 వద్ద ఉన్న ఓటరు వివరాల పక్కన ఆ ఓటరు ఫొటో బదులు భగత్ సింగ్‌ ఫొటో ఉన్నది. కాంగ్రెస్ నాయకుడు అమరీందర్ సింగ్ రాజా వారింగ్ ఈ విషయాన్ని లేవనెత్తారు. ఈ పొరపాటుపై ఆయన తీవ్ర ఆగ్రహం వ్యక్తం చేస్తారు. ‘ఇది ఒక్కటే చూడటం మిగిలి ఉంది’ అని సోషల్ మీడియా పోస్ట్‌లో విమర్శించారు.

కాగా, లూధియానా జిల్లా ఎన్నికల అధికారి దీనిపై స్పందించారు. ఆ తప్పుడు ఫొటో గతంలోని ఓటర్ల జాబితాలో ఉన్నట్లు తెలిపారు. ఆగస్ట్‌ 13న ప్రచురించిన ముసాయిదా జాబితాలో అది అలాగే కొనసాగిందని చెప్పారు. అయితే ఓటరు జాబితాల స్పెషల్ ఇంటెన్సివ్ రివిజన్ (సర్‌) ప్రక్రియలో ఈ పొరపాటును గుర్తించి సరిదిద్దినట్లు వివరించారు. ఆ ఓటరుకు సంబంధించిన సరైన ఫొటోతో కూడిన తుది ఓటర్ల జాబితా సిద్ధమైందని, అక్టోబర్ 12న దీనిని ప్రచురిస్తామని ఎన్నికల అధికారి వెల్లడించారు.