పెట్రో ధరలపై కేంద్రం దొంగాట

• ఎన్నికల వేళ పెట్రోల్‌, డీజిల్‌ ధరలకు బ్రేక్‌
• ఎన్నికలు కాగానే మళ్లీ అమాంతం పెంపు
• ప్రస్తుతం ముడి చమురుకు రికార్డు ధర
• అయినా 85 రోజులుగా స్థిరంగా పెట్రో ధరలు
• 5 రాష్ర్టాల ఎన్నికలు.. కేంద్రం మైండ్‌గేమ్‌
• మార్చి 7 తర్వాత మళ్లీ ధరలు పెరిగే చాన్స్‌

ఎన్నికలు వస్తున్నాయంటే పెట్రో ధరలు పెరగొద్దు. ప్రజల్లో నిత్యావసరాల ధరలపై అసలు చర్చ జరగొద్దు. బీజేపీ ప్రకటించే తాయిలాలపైనే చర్చ ఉండాలి. అంతిమంగా లబ్ధిపొందాలి. అందుకోసమే గత 85 రోజులుగా దేశంలో పెట్రో ధరలు పెరగడం లేదు. అంతర్జాతీయ మార్కెట్‌లో ముడి చమురు ధరల ఆధారంగా పెట్రో ధరలు పెరుగుతాయని తెలిసిందే. ప్రస్తుతం ముడి చమురు బ్యారల్‌ ధర 88 డాలర్ల గరిష్ఠానికి చేరినా పెట్రో ధరల్లో మార్పు రాకపోవడం ఐదు రాష్ర్టాల్లో జరుగుతున్న ఎన్నికల్లో లబ్ధికోసమేనని పరిశీలకులు అంటున్నారు. ఎన్నికలు అయిపోయిన రోజు నుంచే వరుసగా దాదాపు పది రూపాయలకు పైగా వడ్డించే అవకాశం ఉన్నది. దీంతో మరోసారి బహిరంగ మార్కెట్‌లో నిత్యావసరాల ధరలు భగ్గుమనే ప్రమాదం ఉన్నది. తన రాజకీయ ప్రయోజనాల కోసం కేంద్రం ఆడుతున్న దొంగాటకు బలవుతున్నది ప్రజలే. ఆయిల్‌ కంపెనీలను గుప్పిట్లో పెట్టుకొని కేంద్రం ఆడుతున్న మైండ్‌గేమ్‌ ఇది.

హైదరాబాద్‌, జనవరి 27 : దేశంలో ఎప్పుడు, ఏ రాష్ట్రంలో ఎన్నికలు వచ్చి నా బీజేపీకి లబ్ధి కలుగుతుందనుకున్నా, ప్రతికూల ఫలితాలు వచ్చే అవకాశం ఉన్నదని భా వించినా.. ఆ సమయంలో పెట్రో ధరలు పెరగవు. గతంలో ఈ ధోరణి దేశ ప్రజలకు తెలిసిందే. ఎన్నికలకు ముందు ధరల పెరుగుదలను ఆపడం.. ఎన్నికలయ్యాక ధరల మోత మోగించడం మామూలుగా మారింది. ఇప్పుడు కూడా అదే తంతు కొనసాగుతున్నదన్న అభిప్రాయాలు వ్యక్తమవుతున్నాయి. త్వరలో ఐదు రాష్ర్టాల్లో ఎన్నికలు జరుగనున్నాయి. ఈ క్రమంలో కొద్ది రోజులుగా పెట్రో ధరలు స్థిరంగా ఉంటున్నాయి. గత ఏడాది దీపావళికి ముందు పెట్రోల్‌ ధర లీటరుకు రూ.100 దాటగా, డీజిల్‌ ధర రూ.100కు చేరువైంది. దీంతో నవంబర్‌ 3న కేంద్రం పెట్రోల్‌పై రూ.10, డీజిల్‌పై రూ. 5 చొప్పున ఎక్సైజ్‌ సుంకాన్ని తగ్గించింది. నవంబర్‌ నాలుగు నుంచి దాదాపు 85 రోజులుగా పెట్రోల్‌, డీజిల్‌ ధరల్లో పెరుగుదల లేదు. ఈ నెలలో ముడిచమురు ధర అంతర్జాతీయ మార్కెట్‌లో 30 శాతం వరకు పెరిగి బ్యారల్‌ ధర 88 డాలర్లకు చేరుకున్నది. ఇది 2014 నుంచి పెరిగిన ధరలతో పోల్చుకుంటే అ త్యధికం. యూఏఈలోని చమురు నిల్వలపై శత్రువుల దాడులు, రష్యా-ఉక్రెయిన్‌ వివాదం తదితర కారణాల నేపథ్యంలో పెరుగుతున్న ముడి చమురు ధరలు వచ్చే కొద్ది నెలల్లో 100 డాలర్లకు చేరుకుంటాయని అంచనా. మరోవైపు, మన దేశ అవసరాల్లో 84శాతం పెట్రోలియం ఉత్పత్తులను దిగుమతి చేసుకుంటు న్నాం. దీన్నిబట్టి అంతర్జాతీయ మార్కెట్‌లో చమురు ధరల పెరుగుదల ప్రభావం దేశంపై గణనీయంగా ఉం టుంది. అయినా రెండున్నర నెలలుగా పెట్రోల్‌, డీజిల్‌ ధరలు స్థిరంగా ఉన్నాయి. దీనికి కారణం ఫిబ్రవరి, మార్చి నెలల్లో ఐదు రాష్ర్టాల్లో ఎన్నికలు జరగనుండటమే అని విశ్లేషకులు భావిస్తున్నారు. చివరిదశ పోలిం గ్‌ మార్చి 7న పూర్తికానుండగా, 10న ఫలితాలు వెలువడనున్నాయి. మార్చి 7న చివరిదశ ఎన్నికలు పూర్తికాగానే పెట్రోల్‌, డీజిల్‌ ధరలు పెరుగడం తథ్యమని పేర్కొంటున్నారు. దీంతో అందుబాటులో ఉన్న నిత్యావసరాల ధరలు ఒక్కసారిగా భగ్గుమననున్నాయి.

ఆగి ఆగి ముక్కుపిండి వసూలు
కేంద్రంలో బీజేపీ అధికారంలోకి వచ్చాక పెట్రోల్‌, డీజిల్‌ ధరలకు అడ్డూఅదుపు లేకుండా పోయింది. సామాన్యుల నుంచి ఎంత వ్యతిరేకత వచ్చినా పట్టించుకోని కేంద్రం, ఎన్నికలప్పుడు మాత్రం డబుల్‌ గేమ్‌ అడుతున్నది. ఎన్నికలప్పుడు పెట్రో ధరలు పెంచని కేంద్రం, ఎన్నికలు అయిపోగానే ఒక్కసారిగా ధరలు పెంచి ముక్కు పిండి వసూలు చేస్తున్నది. అంతర్జాతీయ మార్కెట్‌కు అనుగుణంగా పెట్రో ధరలు పెంచుకొనే అవకాశం ఆయిల్‌ కంపెనీలకు చాలా కాలం కిం దటే కేంద్రం ఇచ్చింది. కేవలం ధరల పెంపును ఆమోదించడం, మరీ ఎక్కువైతే నియంత్రిస్తున్నది

• 2014 నుంచి నిరంతరం పన్నులు
• 2014లో కేంద్రం పెట్రోల్‌పై లీటరుకు రూ.9.48 ఎక్సైజ్‌ సుంకం వసూలు. 2021లో ఇది రూ.32.90కి చేరింది. గత దీపావళికి రూ.5 చొప్పున తగ్గించడంతో పెట్రోల్‌పై ఆ సుంకం రూ.27.90.
• 2014లో డీజిల్‌పై లీటరుకు ఎక్సైజ్‌ సుంకం రూ.3.56 ఉండగా, 2021లో ఇది రూ.31.80కి పెరిగింది. గత దీపావళికి ముందు రూ.10 తగ్గించడంతో ప్రస్తుతం రూ.21.80గా ఉన్నది.
• 2014-15లో పెట్రోల్‌, డీజిల్‌పై ఎక్సైజ్‌ సుంకం ద్వారా కేంద్రానికి రూ.1.15 లక్ష ల కోట్లు, రాష్ర్టాలకు పన్నుల రూపంలో రూ.1.37 లక్షల కోట్ల ఆదాయం వచ్చింది.
• 2020-21లో కేంద్ర ఆదాయం 3.84 లక్షల కోట్లకు పెరగగా, రాష్ర్టాల ఆదాయం రూ.2.03 లక్షల కోట్లకు పరిమితమైంది.
• 2020 ఫిబ్రవరి నుంచి మే మధ్య పెట్రోల్‌పై లీటరుకు రూ.13, డీజిల్‌పై రూ.16 చొప్పున ఎక్సైజ్‌ సుంకం పెంచింది.

• ఎన్నికలప్పుడు స్థిరంగా ఉన్న ధరలు ఇలా..
• జనవరి-ఏప్రిల్‌ 2017 యూపీ, ఉత్తరాఖండ్‌, పంజాబ్‌, గోవా, మణిపూర్‌ ఎన్నికలప్పుడు నిలిచిన ధరల పెరుగుదల.
• డిసెంబర్‌ 2017లో గుజరాత్‌ ఎన్నికల సందర్భంగా కూడా..
• మే 2018లో కర్ణాటక ఎన్నికల్లో స్థిరంగా
• మే 2019 లోక్‌సభ ఎన్నికల సందర్భంగా నిలిచిన పెరుగుదల.
• అక్టోబర్‌-నవంబర్‌ 2020 బీహార్‌ ఎన్నికల సందర్భంగా స్థిరంగా ధరలు.
• మే 2021లో పశ్చిమబెంగాల్‌, తమిళనాడు, అస్సాం, కేరళ, పాండిచ్చేరి రాష్ర్టాల ఎన్నికలప్పుడూ కూడా స్థిరంగా.