Sunitha Laxma Reddy | రైతుల జీవితాలతో చెలగాటం ఆడుతున్న కాంగ్రెస్ : ఎమ్మెల్యే సునీతా లక్ష్మారెడ్డి

ఎడాపెడా కరెంటు కోతలు సృష్టిస్తూ రైతుల జీవితాలతో కాంగ్రెస్ ప్రభుత్వం ఆడుకుంటుందని నర్సాపూర్ ఎమ్మెల్యే సునీత లక్ష్మారెడ్డి మండిపడ్డారు.

హత్నుర,అక్టోబర్ 11 : ఎడాపెడా కరెంటు కోతలు సృష్టిస్తూ రైతుల జీవితాలతో కాంగ్రెస్ ప్రభుత్వం ఆడుకుంటుందని నర్సాపూర్ ఎమ్మెల్యే సునీత లక్ష్మారెడ్డి మండిపడ్డారు. ఆదివారం సంగారెడ్డి జిల్లా హత్నూర మండలం భీమ్లా తండా, దేవుని గుట్ట తండా శివారులో రైతులు సాగుచేసిన పంటలు ఎండిపోతుండటాన్ని పరిశీలించి రైతుల బాధలు అడిగి తెలుసుకున్నారు. అనంతరం ఆమె మాట్లాడుతూ కాంగ్రెస్ ప్రభుత్వం అధికారం చేపట్టిన నుండి రాష్ట్ర ప్రజలను ఇబ్బందులకు గురిచేస్తుందని ఆరోపించారు.

ఎన్నికల్లో ఇచ్చిన హామీలను ఏ ఒక్కటి కూడా సక్రమంగా అమలు చేయలేక దాటవేసే దోరని అవలం బిస్తుందని మండిపడ్డారు. రైతులు సాగుచేసిన పంట పొలాలు కరెంటు కోతలు, లో వోల్టేజీతో ఎండిపోతుంటే ప్రభుత్వానికి కనిపించడం లేదా అని ప్రశ్నించారు. కరెంటు కోసం రైతన్నలు రోడ్డు ఎక్కుతున్నప్పటికీ చీమకుట్టినట్టు కూడా ప్రభుత్వానికి కావడం లేదని ఆరోపించారు. కండ్ల ముందు పంటలు ఎండిపోతుంటే ఏమి చేయాలో తెలియని దిక్కుతోచని స్థితిలో రాష్ట్ర ప్రజలు నేడు బిక్కుబిక్కుమంటూ కాలం వెల్లదీస్తున్నారని ఆవేదన వ్యక్తం చేశారు.

విత్తనాలు కొనుగోలు నుండి మందుల వరకు యాప్ల పేరుతో ఇబ్బందులకు గురి చేసిన ప్రభుత్వం నేడు చేతికి వచ్చిన పంటను పండించుకుంటున్న తరుణంలో కరెంటు కోతలు సృష్టిస్తూ రైతులను అప్పుల ఊబిలోకి నెట్టుతుందని ఆరోపించారు. కాంగ్రెస్ అంటేనే కరెంటు కోతలు అనే నానుడిని మరొకసారి ప్రభుత్వం నిరూపించుకుందని గుర్తు చేశారు. అనంతరం విద్యుత్ శాఖ అధికారులతో మాట్లాడుతూ రైతులు సాగు చేస్తున్న పంటలు ఎండిపోతున్నాయని ఇచ్చే కరెంటును సక్రమంగా ఇచ్చి పంటలు కాపాడాలని కోరారు.