Stock Market | సూచీల వరుస ర్యాలీకి బ్రేక్‌.. కుప్పకూలిన షేర్లు

దేశీయ స్టాక్‌ మార్కెట్ల వరుస ర్యాలీకి బ్రేక్‌పడింది. మదుపరులు ప్రాఫిట్‌ బుకింగ్‌కు మొగ్గుచూపడంతోపాటు కార్పొరేట్ల నిరుత్సాహక ఆర్థిక ఫలితాలు సూచీలను నష్టాల్లోకి నెట్టింది. బ్లూచిప్‌ సంస్థల షేర్లు కుప్పకూలడం, ఆసియా-యూరప్‌ ఈక్విటీలు ఒడిదుడుకులకు లోనుకావడం మదుపరులను అమ్మకాలవైపు నడిపించాయి.

Stock Market | ముంబై, ఏప్రిల్‌ 24 : దేశీయ స్టాక్‌ మార్కెట్ల వరుస ర్యాలీకి బ్రేక్‌పడింది. మదుపరులు ప్రాఫిట్‌ బుకింగ్‌కు మొగ్గుచూపడంతోపాటు కార్పొరేట్ల నిరుత్సాహక ఆర్థిక ఫలితాలు సూచీలను నష్టాల్లోకి నెట్టింది. బ్లూచిప్‌ సంస్థల షేర్లు కుప్పకూలడం, ఆసియా-యూరప్‌ ఈక్విటీలు ఒడిదుడుకులకు లోనుకావడం మదుపరులను అమ్మకాలవైపు నడిపించాయి. ఫలితంగా ఏడు రోజులుగా భారీగా పుంజుకున్న సూచీలు నష్టాల్లోకి జారుకున్నాయి. ఇంట్రాడేలో 400 పాయింట్ల వరకు నష్టపోయిన 30 షేర్ల ఇండెక్స్‌ సూచీ సెన్సెక్స్‌ చివరకు 315.06 పాయింట్లు కోల్పోయి 79,801.43 వద్ద ముగిసింది. మరోసూచీ ఎన్‌ఎస్‌ఈ నిఫ్టీ సైతం 82.25 పాయింట్లు కోల్పోయి 24,246.70 వద్ద స్థిరపడింది. గడిచిన ఏడు రోజుల్లో సెన్సెక్స్‌ 6,269.34 పాయింట్లు లేదా 8.48 శాతం, నిఫ్టీ 1,929.8 పాయింట్లు లేదా 8.61 శాతం చొప్పున పెరిగిన విషయం తెలిసిందే. కార్పొరేట్ల నిరుత్సాహక ఫలితాలు మార్కెట్ల ర్యాలీకి బ్రేక్‌లు వేశాయని జియోజిట్‌ హెడ్‌ వినోద్‌ నాయర్‌ తెలిపారు.

• నిరాశాజనక ఆర్థిక ఫలితాలు ప్రకటించడంతో ఎఫ్‌ఎంసీజీ దిగ్గజం హిందుస్థాన్‌ యూనిలీవర్‌ లిమిటెడ్‌ షేరు 4 శాతం తగ్గి టాప్‌ లూజర్‌గా నిలిచింది.
• దీంతోపాటు భారతీ ఎయిర్‌టెల్‌, ఐసీఐసీఐ బ్యాంక్‌, మహీంద్రా, హెచ్‌సీఎల్‌ టెక్నాలజీ, హెచ్‌డీఎఫ్‌సీ బ్యాంక్‌, టీసీఎస్‌, ఇన్ఫోసిస్‌, ఎన్‌టీపీసీ, అదానీ పోర్ట్స్‌, ఐటీసీ, కొటక్‌ బ్యాంక్‌, మారుతి, ఎస్బీఐ షేర్లు నష్టపోయాయి.
• కానీ, ఇండస్‌ఇండ్‌ బ్యాంక్‌, అల్ట్రాటెక్‌ సిమెంట్‌, టాటా మోటర్స్‌, సన్‌ఫార్మా, టైటాన్‌, టెక్‌ మహీంద్రా, ఏషియన్‌ పెయింట్స్‌, టాటా స్టీల్‌, రిలయన్స్‌, యాక్సిస్‌ బ్యాంక్‌, నెస్లె, ఎల్‌అండ్‌టీ షేర్లు లాభాల్లో ముగిశాయి.
• రంగాలవారీగా చూస్తే రియల్టీ అత్యధికంగా 1.39 శాతం నష్టపోగా, ఎఫ్‌ఎంసీజీ, టెక్నాలజీ, ఫైనాన్షియల్‌ సర్వీసెస్‌, కన్జ్యూమర్‌, ఐటీ, పవర్‌ రంగ సూచీలు నష్టపోయాయి.