Food | పాత రోత. కొత్త వింత. జనానికైనా, భోజనానికైనా వర్తించే సూత్రమిది. వాతావరణ పరిస్థితుల్లో మార్పు, కొత్త పంటలు, సరికొత్త పరిశోధనలు, అన్నిటికి మించి మనిషి అవసరాలు భోజన విధానాన్ని ప్రభావితం చేస్తాయి. ఫలితంగా.. పాత రుచులు మరుగునపడిపోతాయి. కొత్త ఘుమఘుమలు పళ్లాల్లో ప్రత్యక్షమవుతాయి. రానున్న 30 ఏండ్లలో ఆహారంలో విస్తృత మార్పులు చోటుచేసుకునే అవకాశం ఉందని నేషనల్ ఇన్స్టిట్యూట్ ఆఫ్ న్యూట్రిషన్ (ఎన్ఐఎన్) తాజా అధ్యయనం చెబుతున్నది. ఆల్గే జాతి మొక్కలు, కీటకాలు భోజన పదార్థాలుగా మారనున్నాయి. ప్రయోగశాలలో తయారుచేసిన మాంసం వినియోగం యాభైశాతం పెరగనున్నది. ఎన్ఐఎన్ పరిశీలనలో ఇంకెన్నో ఆసక్తికర అంశాలు వెల్లడయ్యాయి.
విపరీతంగా పెరుగుతున్న జనాభా.. వాతావరణ మార్పులు… వీటి కారణంగా తగ్గిపోతున్న వ్యవసాయం, ఆహార పంటల దిగుబడి. ఇవన్నీ ఇప్పుడు ఆహార భద్రతను ప్రశ్నార్థకంగా మారుస్తున్నాయి. దీనికితోడు ఏటా పెరుగుతున్న పోషకాహార లోపం మానవాళికి మరింత ఆందోళన కలిగిస్తున్నది. పెరుగుతున్న జనాభాకు సరిపడా ఆహారం అందించాలంటే… ఇప్పుడున్న సంప్రదాయ సాగు విధానాలు, ఆహారపు ఉత్పత్తులు, అలవాట్లతో దాదాపుగా అసాధ్యమనే సంకేతాలు పరిశోధకులను కలవరపెడుతున్నాయి. అందుకనే ప్రత్యామ్నాయ ఆహార ఉత్పత్తుల కోసం వేట మొదలైంది. కాస్మో పాలిటన్ కల్చర్లో ఇన్స్టంట్ ఫుడ్ హవా నడుస్తున్నా… అందులో పోషకాల కంటే శరీరానికి హాని కలిగించే పదార్థాలే ఎక్కువ. దీంతో మనిషి ఆయువును పెంచే ఆధునిక ఆహార ఉత్పత్తులు నవజీవనానికి మూలం కానున్నాయి. వృద్ధి చెందుతున్న జనాభాకు అనుగుణంగా, పోషకాలతో కూడిన సుస్థిర ఆహార ఉత్పత్తులపై జాతీయ పోషకాహార సంస్థ (ఎన్ఐఎన్) పరిశోధన చేసింది. ప్రత్యామ్నాయ ఆహార ఉత్పత్తులపై అధ్యయనం చేసింది. ఆ జాబితాలో సాధారణ పంట ఉత్పత్తుల కంటే.. ప్రస్తుతం వ్యర్థాలుగా భావిస్తున్న ఉత్పత్తులే ఎక్కువగా చేరనున్నాయి. 2050 నాటికి అంతర్జాతీయ స్థాయిలో.. అందులోనూ భారత్లో వచ్చే ఆహార మార్పులకు అనుగుణంగా ఈ ఆధునిక ఆహారాలను గుర్తించింది.
ప్రపంచ జనాభా 2050 నాటికి వెయ్యి కోట్లకు చేరుతుందని ఐక్యరాజ్య సమితి అనుబంధ సంస్థ అంతర్జాతీయ ఆహార-వ్యవసాయ సంస్థ అంచనా. ప్రస్తుతం ఉత్పత్తి అవుతున్న ఆహార పంటల దిగుబడి కనీసం 60 శాతం అధికం అయితే తప్ప, పెరగనున్న జనాభా అవసరాలకు అనుగుణంగా ఆహారాన్ని అందించలేని పరిస్థితి. దీనికితోడు ఏటా తరిగిపోతున్న సాగు విస్తీర్ణం ఆహార ఉత్పత్తుల దిగుబడికి ప్రతికూలంగా మారుతున్నది. దీంతో ఆహార పంట ఉత్పత్తి గణనీయంగా పడిపోతున్నది. ప్రస్తుత సాగు విధానాల్లో రావాల్సిన మార్పుల గురించి కూడా జాతీయ పోషకాహార సంస్థ అధ్యయనం చేసింది. ఎన్ఐఎన్ డైరెక్టర్ డా.హేమలత సారథ్యంలో పాథాలాజీ డిపార్ట్మెంట్ టెక్నికల్ ఆఫీసర్ ఆర్.నవీన్ కుమార్ నేతృత్వంలో ఈ అధ్యయనం జరిగింది. రానున్న 30 ఏండ్లలో ఆహారపు అలవాట్లలో మార్పులు, ఆహార పదార్థాల ఉత్పత్తి, లభ్యతపై ఆ బృందం కచ్చితమైన అంచనాలు వేసింది.
సుస్థిర సాగు విధానాలు, పోషకాహార ఉత్పత్తుల సాగుపై ఇటీవలి కాలంలో అంతర్జాతీయంగా పరిశోధనలు ఊపందుకున్నాయి. దీనికితోడు ఆధునిక సాగు విధానాలతో అధిక దిగుబడినిచ్చే వంగడాలకు ప్రాధాన్యం పెరుగుతున్నది. ఈ క్రమంలో అధికంగా వాడుకలో ఉన్న రెడ్ మీట్, చక్కెర వినియోగం ఏకంగా 50 శాతం తగ్గిపోనున్నదని అంచనా. వీటి స్థానంలో పండ్లు, కూరగాయలు, గింజలు, చిరుధాన్యాలు, ప్రొటీన్లు, పోషకాలు అధికంగా ఉండే ఆహార ఉత్పత్తులకు గిరాకీ ఏర్పడనుంది. ఆ జాబితాలో ఫంగస్ జాతి మొక్కలు, కీటకాలతోపాటు వివిధ ఆహార పంటలు ప్రధాన వనరులుగా మారనున్నాయి.
జీవ సంబంధమైన మాంసం పర్యావరణంలో గ్రీన్ హౌజ్ వాయువులను విపరీతంగా ప్రేరేపిస్తున్నది. దీంతో కొన్ని అరుదైన జీవజాతుల ఉనికి ప్రమాదంలో పడుతున్నది. ఈ క్రమంలో ప్రయోగశాలలో తయారుచేసిన కృత్రిమ మాంసమే దీటైన ప్రత్యామ్నాయంగా మారనుంది. ఆరోగ్యవంతమైన జంతువుల కణాలను ప్రత్యేక విధానంలో సేకరించి వాటి ద్వారా తయారుచేసే కృత్రిమ మాంసానికి ఆహార మార్కెట్ స్వాగతం పలకనుంది. ప్రస్తుతం మనదేశంలో ఇంకా ప్రయోగ దశలోనే ఉండగా.. ల్యాబ్ గ్రోన్ మీట్ వినియోగానికి ఇప్పటికే సింగపూర్ అనుమతులు ఇచ్చేసింది. దీనిపై హైదరాబాద్ కేంద్రంగా సేవలు అందిస్తున్న సెంటర్ ఫర్ సెల్యులర్ అండ్ మాలిక్యులర్ బయాలజీ (సీసీఎంబీ)లో రెండేండ్లుగా పరిశోధనలు జరుగుతున్నాయి. మరో ఐదేండ్లలో పూర్తిస్థాయిలో అందుబాటులోకి వచ్చే అవకాశం ఉంది.
నీటి ఎద్దడి అధికంగా ఉండే ఎడారి ప్రాంతాల్లో అధికంగా పెరిగే గడ్డి జాతి మొక్క పాండానస్. బ్రహ్మజెముడును పోలినట్టుగా.. గుబురు గుబురుగా పెరిగే పాండానస్ జాతి మొక్కలకు తీరప్రాంతాలు అత్యంత అనుకూలమైనవి. పసిఫిక్ మహాసముద్ర దీవులు, ఫిలిప్పీన్స్, ఆగ్నేయ ఆసియా దేశాల్లో పాండనస్ మొక్కలు ఎక్కువగా కనిపిస్తాయి. వీటి ఆకులు మిఠాయిల తయారీకి అనుకూలంగా ఉంటాయి. రుచిలో అనాస పండును తలపించే పాండానస్లో రుచితోపాటు పోషక విలువలు కూడా ఎక్కువే.
ఇటీవల కాలంలో వీగనిజం పెరుగుతున్నది. చాలామంది ఆరోగ్య సంరక్షణలో భాగంగా జంతు మాంసాన్ని తినేందుకు ఆసక్తి చూపడం లేదు. అందుకే కేవలం మొక్కల కణజాలంతో తయారుచేసిన ప్లాంట్ బేస్డ్ మాంసం కూడా భవిష్యత్తులో ఆహారపు అవసరాలను తీర్చనుంది. మొక్కల నుంచి సేకరించిన కణాలను ప్రత్యేక విధానంలో ప్రాసెస్ చేసి, రుచిలో మాంసాన్ని తలపించేలా సిద్ధం చేసే సాంకేతికత అందుబాటులో ఉంది. ప్రొటీన్లు అందించే గోధుమ, కొబ్బరినూనె, ఆలుగడ్డల తరహాలో ప్లాంట్ బేస్డ్ మీట్ కూడా ఆహార అవసరాలను తీర్చడంలో కీలకం కానుంది.
ఇథియోపియాలో అరటిపండ్లను పోలినట్టు ఉండే ఫాల్స్ బనానా పండ్లు ప్రస్తుతం తినేందుకు అనుకూలంగా లేవు. కానీ వీటి వేర్లు, కాండాన్ని మురగబెట్టి బ్రెడ్ తయారీలో వినియోగిస్తారు. ఈ జాతి మొక్కలు పది కోట్ల జనాభాకు సరిపడినంత ఆహారాన్ని అందించే సామర్థ్యం ఉన్నట్టు ఓ పరిశోధనలో తేలింది. పుష్కలమైన కేలరీలతోపాటు ఏడాదంతా సాగు చేసేందుకు అనుకూలమని తేల్చారు.
ప్రస్తుతం కాఫీ పంటకు వినియోగిస్తున్న భూమిలో 50శాతం మేర అరబికా రకం తోటలే ఉన్నాయి. అయితే పెరుగుతున్న భూతాపం వల్ల కాఫీ తోటలు నిర్వీర్యం అవుతున్నాయి. ప్రపంచంలో కాఫీ పొడి డిమాండ్ను తీర్చడంలో అరబికా కాఫీ మొక్కలదే మొదటి స్థానం. ప్రపంచ వ్యాప్తంగా నమోదవుతున్న ఉష్ణోగ్రతలు 6.8 డిగ్రీ సెంటీగ్రేడుల వరకు పెరిగినా, తట్టుకుని అధిక దిగుబడిని ఇచ్చే సామర్థ్యం కూడా ప్రస్తుతం వాడుకలో ఉన్న ఇతర కాఫీ జాతి మొక్కల కంటే అరబికా రకం మొక్కలకే ఎక్కువ ఉందని తేలింది. ఇతర జాతుల మొక్కల్లో క్రమంగా దిగుబడి తగ్గిపోవడం, అంతర్జాతీయ స్థాయిలో రుచి, వాసన ప్రమాణాలు లేకపోవడం, క్రమంగా వృద్ధి చెందుతున్న కాఫీ గింజల డిమాండ్కు అనుగుణంగా మరింత విరివిగా పండించేందుకు అనుకూలమైన అరబికా కాఫీ చేరనుంది.
మనం కలుపుగా భావించే కొన్ని రకాల మొక్కలు ఆకుకూరల రూపంలో ఇప్పటికే వినియోగంలో ఉన్నాయి. అలాంటి గడ్డి జాతి మొక్కలు కూడా ప్రధాన ఆహార వనరుల జాబితాలో చేరనున్నాయి. అమెరికా వ్యవసాయ శాఖ అంచనా ప్రకారం భూమ్మీద తొమ్మిది వేల రకాల గడ్డి జాతి మొక్కలు ఉంటే… ఇందులో 35 రకాలను మాత్రమే వాడుతున్నారు. వీటినుంచి వచ్చే గింజలు, కాండాన్ని వంటకాల్లో ఉపయోగిస్తున్నాం. ఆ జాబితాలో ఫోనియో గడ్డి జాతి మొక్కలు కూడా చేరనున్నాయి. దాదాపు ఐదువేల ఏండ్ల క్రితమే వీటిని సాగు చేసినట్టు ఆధారాలు ఉన్నాయి. ఎలాంటి వాతావరణాన్ని అయినా తట్టుకునే శక్తి వీటికి ఉంది. తక్కువ నీరు, శ్రమ లేకుండా పెరిగే జాతి మొక్కలుగా గుర్తింపు ఉంది. ఇలాంటి గడ్డి జాతి మొక్కలు కూడా ఆధునిక ఆహారం జాబితాలో చేరనున్నాయి. విటమిన్లు, ఐరన్, అమైనో ఆమ్లాలు, క్యాల్షియం సమృద్ధిగా ఉండే కొన్ని గడ్డి జాతి మొక్కలు పశ్చిమ ఆఫ్రికా దేశాల్లో ఎప్పటినుంచో వాడుకలో ఉన్నాయి. అవి ముందుముందు ప్రపంచ ఆహార డిమాండ్లో 12శాతం తీర్చనున్నాయి.
రసాయనిక పద్ధతుల్లో ఉత్పత్తి చేసే.. డైజెస్టివ్ ఎంజైమ్స్గా గుర్తింపు పొందిన సింథటిక్ ఫ్యాట్ అత్యంత అనుకూలమైన ఆహారంగా మారనుంది. ట్రైగ్లిజరాల్ పరమాణువులతో తయారుచేసే కొవ్వు వినియోగం రెండు దశాబ్దాల నుంచే ఉంది. అమెరికాలో ఓలెస్ట్రాగా పిలిచే సింథటిక్ ఫ్యాట్ను యోగర్ట్, సలాడ్స్, కోల్డ్ మీల్స్లో ఎక్కువగా వాడుతున్నారు. ఏమాత్రం కేలరీలు ఉండని జడ్ ట్రిమ్ సింథటిక్ ఫ్యాట్ కూడా ఇటీవల అందుబాటులోకి వచ్చింది. దీనిని అమెరికా వ్యవసాయ శాఖ ప్రయోగాత్మకంగా ఆవిష్కరించింది. ప్రస్తుతం వాడుకలో ఉన్న అధిక కేలరీలనిచ్చే కొవ్వులతో పోలిస్తే.. వీటిలో అపార ప్రయోజనాలు ఉంటాయని, శరీరానికి ఫైబర్ అదించేలా.. మక్కజొన్న, ఓట్స్, సోయా వంటి ఇతర గింజలతో కలిపి పర్యావరణహితంగా వీటిని సృష్టించే వీలు ఉంది.
సముద్రంలో విస్తారంగా కనిపించే ఆల్గే జాతి మొక్కల్లో ఒకటైన సీవీడ్(నాచు) కూడా ఆహారంగా మారనుంది. ఇందులో విషపూరితమైన నాచుతోపాటు తినదగిన నాచు కూడా ఉంది. ఇప్పటికే సముద్రంలో సాగు చేస్తున్న స్పిరులినా ఆహార పరిశ్రమలో వినియోగంలో ఉంది. సముద్రంలో 30వేలకు పైగా ఆల్గే జాతి మొక్కలు పెరుగుతున్నాయి. ఇందులో సగానికి పైగా ఆహార పంటలుగా మారనున్నాయి. అయితే వీటి వినియోగం పర్యావరణానికి హాని కలిగించేదే అయినా… కెనడాకు చెందిన ఆహార ఉత్పత్తుల పరిశోధన సంస్థ ఆల్గే జాతుల సాగుపై దృష్టి సారించింది.
కొన్ని దేశాల్లో ఇప్పటికీ కీటకాలే(పురుగులు) ప్రధాన ఆహార వనరులు. ముంచుకొస్తున్న ఆహార సంక్షోభాన్ని ఎదుర్కొనే ప్రయత్నంలో తినదగిన పురుగులు ప్రత్యామ్నాయ ఆహారాల జాబితాలో చోటు చేసుకుంటున్నాయి. పుష్కలమైన ప్రొటీన్లతోపాటు పోషకాలు, సూక్ష్మపోషకాలు అధికంగా ఉండే కీటకాలను ఇప్పటికే రెండువందల కోట్ల మంది ఆహారంగా తీసుకుంటున్నారు. వచ్చే పదేండ్లలో వీటి వినియోగం గణనీయంగా పెరగనుంది.
ప్రస్తుతం అన్ని దేశాల్లోనూ వినియోగంలో ఉన్న చిక్కుడు జాతి మొక్కలు భవిష్యత్ ఆహార నిధిగా మారనున్నాయి. అపారమైన ప్రొటీన్లు, ఫైబర్లను అందించే లెగ్యూమ్ కుటుంబానికి చెందిన బీన్స్లో 20వేలకు పైగా రకాలు ఉన్నాయి. కానీ వీటిలో 10 శాతం కూడా వినియోగంలో లేవని, ఇందులో తినకూడని మొక్క జాతులు కూడా ఉన్నాయని నిపుణులు తేల్చారు. నమీబియా, దక్షిణాప్రికా వంటి దేశాల్లో కొన్ని అరుదైన చిక్కుడు జాతి మొక్కలను ఆహారంగా పరిమితంగా వినియోగిస్తున్నారు. గింజలను ఉడికించి నేరుగా తినడానికి, ఉప్మా, కిచిడీలో జోడించడానికి, కాఫీ గింజలకు బదులుగానూ కొన్ని ప్రాంతాల్లో వాడుతున్నారు. చూడటానికి ఒకేలా ఉన్నా… పోషకాలను బట్టి తినేందుకు అనుకూలమైన బీన్స్ కోసం శోధిస్తూనే ఉన్నారు.
…? కడార్ల కిరణ్
“Summer Diet | సమ్మర్లో ఆరోగ్యంగా ఉండాలా? అయితే ఈ ఫుడ్ను మీ డైట్లో చేర్చుకోవడం మస్ట్ !”