Adani Group | అదానీపై ఫోకస్‌.. ఆర్థికంగా ఈ విషయాల్లో ఎంత నష్టపోయామో గమనించారా?

Adani Group | దేశంలో గత కొన్ని వారాల నుంచి అదానీ గ్రూపు సంస్థల అక్రమాలు, వాటాపై హిండెన్‌బర్గ్‌ నివేదిక వెల్లడించిన చేదు నిజాలు, హంగేరియన్‌-అమెరికన్‌ వ్యాపారవేత్త జార్జ్‌ సోరోస్‌ చేసిన వ్యాఖ్యలపైనే చర్చ నడిచింది.

Adani Group | (స్పెషల్‌ టాస్క్‌ బ్యూరో) హైదరాబాద్‌, ఫిబ్రవరి 25 (నమస్తే తెలంగాణ): దేశంలో గత కొన్ని వారాల నుంచి అదానీ గ్రూపు సంస్థల అక్రమాలు, వాటాపై హిండెన్‌బర్గ్‌ నివేదిక వెల్లడించిన చేదు నిజాలు, హంగేరియన్‌-అమెరికన్‌ వ్యాపారవేత్త జార్జ్‌ సోరోస్‌ చేసిన వ్యాఖ్యలపైనే చర్చ నడిచింది. ఇప్పుడు దీని స్థానంలో కాంగ్రెస్‌ పార్టీ 85వ ప్లీనరీ సమావేశం, ఆ పార్టీ నేతలపై ఎన్‌ఫోర్స్‌మెంట్‌ డైరెక్టరేట్‌ దాడులు, కాంగ్రెస్‌ అధికార ప్రతినిధి అరెస్టుకు సంబంధించిన అంశాలు తెరపైకి వచ్చాయి. దీంతో దేశ ఆర్థిక వ్యవస్థకు సంబంధించిన పలు కీలక అంశాలు మరుగున పడిపోయాయి. ఇదే సమయంలో మన విదేశీ మారకద్రవ్య నిల్వలు 11 వారాల కనిష్ఠ స్థాయికి దిగజారడాన్ని, అమెరికన్‌ డాలర్‌తో రూపాయి మారకం విలువ మరింత పతనమవడాన్ని, ఎగుమతులు క్షీణించడాన్ని ఎవరూ పెద్దగా గమనించలేదు. ఆ వివరాలు ఏమిటంటే..

అన్ని కాంపొనెంట్లూ డౌన్‌

• ఫారెక్స్‌ నిల్వల్లో సింహభాగమైన విదేశీ కరెన్సీ ఆస్తులు 4.51 బిలియన్‌ డాలర్లు మేరకు క్షీణించి 496.07 బిలియన్‌ డాలర్లకు పడిపోయాయి.
• బంగారం నిల్వల విలువ 1.04 బిలియన్‌ డాలర్ల మేరకు తగ్గి 41.81 బిలియన్‌ డాలర్లకు దిగజారింది.
• స్పెషల్‌ డ్రాయింగ్‌ రైట్స్‌ (ఎస్‌డీఆర్స్‌) 87 మిలియన్‌ డాలర్లు తగ్గి 18.26 బిలియన్‌ డాలర్లకు క్షీణించాయి.
• అంతర్జాతీయ ద్రవ్య నిధి సంస్థ (ఐఎంఎఫ్‌) వద్ద గత వారం భారత రిజర్వు పొజిషన్‌ 34 మిలియన్‌ డాలర్లు దిగజారి 5.11 బిలియన్‌ డాలర్లకు పతనమైంది.

విదేశీ మారక నిల్వల పతనం

• ఫిబ్రవరి 17తో ముగిసిన వారం చివరి నాటికి విదేశీ మారక ద్రవ్య (ఫారెక్స్‌) నిల్వలు 5.68 బిలియన్‌ డాలర్లు తగ్గి 561.267 డాలర్లకు పడిపోయాయి. ఇది 11 వారాల కనిష్ఠ స్థాయి.
• దేశంలో ఫారెక్స్‌ నిల్వలు క్షీణించడం ఇది వరుసగా మూడో వారం.
• ఈ నెల 10తో ముగిసిన వారంలో ఇవి 8.32 డాలర్లు, 3వ తేదీతో ముగిసిన వారంలో 1.49 డాలర్లు తగ్గాయి.
• ఫిబ్రవరిలో ఫారెక్స్‌ నిల్వలు 15 బిలియన్‌ డాలర్లకుపైగా క్షీణించాయి.

ఫారెక్స్‌ నిల్వలు దేనికంటే..

• దిగుమతి ఖర్చులకు
• విదేశీ అప్పులను తీర్చేందుకు
• విదేశాల్లో పెట్టుబడులకు
• విద్య, వైద్య, పర్యాటక సేవలకు, ఆన్‌సైట్‌ ప్రాజెక్టులకు
• రూపాయి విలువ వేగంగా పడిపోయినప్పుడు తట్టుకునేందుకు

బక్కచిక్కిన రూపాయి

• ఈ నెలలో ఇప్పటివరకు రూపాయి విలువ 81 పైసలు క్షీణించింది. ఈ నెల 1వ తేదీ నాటికి డాలర్‌తో 81.94గా ఉన్న రూపాయి విలువ.. 24వ తేదీ నాటికి 82.75కు పతనమైంది.
• దీంతో విదేశీ రుణాల చెల్లింపునకు మన దేశం అధిక మొత్తాన్ని వెచ్చించాల్సి వస్తున్నది.

జీడీపీ మందగమనం

• 2022 డిసెంబర్‌తో ముగిసిన త్రైమాసికంలో స్థూల దేశీయోత్పత్తి వృద్ధిరేటు 4.6 శాతానికి పడిపోయింది.
•  ప్రస్తుత జనవరి-మార్చి త్రైమాసికంలో ఇది 4.4 శాతానికి క్షీణిస్తుందని అంచనా.

రుణ భారం

• నిరుడు సెప్టెంబర్‌ చివరి నాటికి దేశంపై 621.5 బిలియన్‌ డాలర్ల విదేశీ రుణ భారం ఉన్నట్టు రిజర్వు బ్యాంక్‌ తేల్చింది. ఇది జీడీపీ నిష్పత్తిలో 19.2 శాతానికి సమానం.
• ఇందులో 40% లేదా 267 బిలియన్‌ డాలర్ల అప్పులను రానున్న 9 నెలల్లో తిరిగి చెల్లించాల్సి ఉన్నది.
• ఇది ప్రస్తుతం దేశంలో ఉన్న విదేశీ మారక ద్రవ్య నిల్వల్లో 44 శాతానికి సమానం.

ఎగుమతులు

• జనవరిలో 6.58% క్షీణించి 32.91 బిలియన్‌ డాలర్లకు పడిపోయాయి.
• దేశ ఎగుమతులు క్షీణించడం ఇది వరుసగా రెండో నెల.
• 2022 డిసెంబర్‌లో ఇవి ఏకంగా 12.2% పతనమై 34.48 డాలర్లకు దిగజారాయి.
• నిరుడు ఏప్రిల్‌ నుంచి ఈ ఏడాది జనవరి మధ్య కాలంలో ఇంజినీరింగ్‌ ఎగుమతులు 3.37% తగ్గి 88.27 బిలియన్‌ డాలర్లకు పడిపోగా.. రత్నాలు, ఆభరణాల ఎగుమతులు 0.54% క్షీణించి 31.61 బిలియన్‌ డాలర్లకు దిగజారాయి.

దిగుమతులు

• ప్రస్తుత ఆర్థిక సంవత్సరంలోని తొలి 10 నెలల్లో ముడి చమురు దిగుమతులు 53.54% పెరిగి 178.45 బిలియన్‌ డాలర్లకు ఎగబాకాయి.
• బొగ్గు, కోక్‌, బ్రిక్వెట్స్‌ దిగుమతులు 18.91% శాతం పెరిగి 43.17 బిలియన్‌ డాలర్లకు చేరాయి.
• నిరుడు 1.2%గా ఉన్న కరెంట్‌ ఖాతా లోటు (ఎగుమతులు, దిగుమతుల విలువ మధ్య తేడా) ఈసారి 3.1 శాతానికి పెరుగుతుందని అంచనా.