కెఫిన్ అధిక వినియోగంతో గ్ల‌కోమా స‌మ‌స్య‌

టీ, కాఫీ, ఇతర ఎనర్జీ డ్రింక్స్‌ల‌లో లభించే కెఫిన్.. కంటి వ్యాధి ప్రమాదాన్ని పెంచుతుందని ఒక కొత్త అధ్యయనం పేర్కొన్న‌ది. ఈ అధ్యయనం ఆధారంగా చాలా ఎక్కువ మొత్తంలో కెఫిన్ వాడటం వల్ల గ్లకోమా ప్రమాదం పెరుగుతుందని శాస్త్ర‌వేత్త‌లు హెచ్చరిస్తున్నారు.

June 13, 2021 / 09:50 PM IST

కెఫిన్ అధిక వినియోగంతో గ్ల‌కోమా స‌మ‌స్య‌

వాషింగ్టన్ : ప‌నుల్లో అలిసి పోయిన మ‌నం అల‌స‌ట‌ను దూరం చేసుకునేందుకు మ‌నలో చాలా మంది కాఫీ, టీ తీసుకుంటుంటాం. కాఫీ, టీ తీసుకోగానే శ‌క్తిని పొంది మ‌ళ్లీ ప‌నుల్లో నిమగ్న‌మ‌వుతుంటాం. వాస్తవానికి టీ, కాఫీ, ఇతర ఎనర్జీ డ్రింక్స్‌ల‌లో లభించే కెఫిన్.. కంటి వ్యాధి ప్రమాదాన్ని పెంచుతుందని ఒక కొత్త అధ్యయనం పేర్కొన్న‌ది. ఈ అధ్యయనం ఆధారంగా చాలా ఎక్కువ మొత్తంలో కెఫిన్ వాడటం వల్ల గ్లకోమా ప్రమాదం పెరుగుతుందని శాస్త్ర‌వేత్త‌లు హెచ్చరిస్తున్నారు. ఈ అధ్యయనం ఫలితాలు ఆప్తాల్మాలజీ పత్రికలో ప్రచురించారు.

న్యూయార్క్‌లోని మౌంట్ సినాయ్‌లోని ఐకాన్ స్కూల్ ఆఫ్ మెడిసిన్ పరిశోధకుల నేతృత్వంలో జరిపిన ఈ పరిశోధనలో గ్లకోమా వచ్చే ప్రమాదం ఉన్న ఆహారం, జన్యుశాస్త్రాలను తొలిసారిగా పరిశీలించారు. ఈ అధ్యయనం ఆధారంగా గ్లకోమా కుటుంబ చరిత్ర ఉన్న రోగులు వారి కెఫిన్ వాడకాన్ని తగ్గించాలని పరిశోధకులు సూచించారు. ఈ అధ్యయనం కోసం పరిశోధకులు యూకే బయోబ్యాంక్‌లో ఉన్న లక్ష 20 వేల మంది డాటాను విశ్లేషించారు. ఈ డాటా 2006 నుంచి 2010 వరకు, 39 నుంచి 73 సంవత్సరాల వరకు ఉంటుంది. ఈ వ్యక్తుల ఆరోగ్యంతో పాటు డీఎన్‌ఏ నమూనాలు కూడా డాటాలో లభించాయి.

మౌంట్ సినాయ్ హెల్త్ సిస్టం ఆప్తాల్మాలజీ పరిశోధన డిప్యూటీ చీఫ్ లూయిస్ ఆర్. పాస్క్వెల్ ప్రకారం, గ‌త‌ అధ్యయనాల్లో అధిక కెఫిన్ వాడకం ఒత్తిడిని పెంచుతుందని గుర్తించారు. కుటుంబంలో ఎవరైనా గ్లకోమా కలిగి ఉంటే, కెఫిన్ మ‌రింత‌ ప్రమాదాన్ని పెంచుతుంది. వీరి అధ్యయనం ప్ర‌కారం, అధిక కెఫిన్ తీసుకోవడం అంటే.. రోజుకు 480 మిల్లీగ్రాముల కంటే ఎక్కువ. రోజుకు 321 మి.గ్రా కంటే ఎక్కువ కెఫిన్ తీసుకోవడం వల్ల జన్యుపరంగా ఎక్కువ అవకాశం ఉన్న వారితో పోలిస్తే సాధార‌ణ ప్ర‌జ‌ల్లో గ్లకోమా ప్రమాదాన్ని 3.9 రెట్లు పెంచుతుంది.