చ‌రిత్ర‌లో ఈరోజు : ఉప‌హార్‌ అగ్నిప్ర‌మాదంలో 59 మంది మృతి

దేశ రాజ‌ధాని న‌గ‌రం ఢిల్లీలోని ఉప‌హార్ సినిమా థియేట‌ర్‌లో1997 లో స‌రిగ్గా ఇదే రోజున‌ అగ్నిప్ర‌మాదం సంభ‌వించి 59 మంది చ‌నిపోయారు. ఈ సంఘ‌ట‌న జ‌రిగి నేటికి 24 సంవ‌త్స‌రాలు గ‌డిచిపోయాయి

June 13, 2021 / 03:39 PM IST

చ‌రిత్ర‌లో ఈరోజు : ఉప‌హార్‌ అగ్నిప్ర‌మాదంలో 59 మంది మృతి

దేశ రాజ‌ధాని న‌గ‌రం ఢిల్లీలోని ఉప‌హార్ సినిమా థియేట‌ర్‌లో1997 లో స‌రిగ్గా ఇదే రోజున‌ అగ్నిప్ర‌మాదం సంభ‌వించి 59 మంది చ‌నిపోయారు. ఈ సంఘ‌ట‌న జ‌రిగి నేటికి 24 సంవ‌త్స‌రాలు గ‌డిచిపోయాయి. దీనిపై విచారించిన కోర్టు బాధితుల‌కు రూ.18 కోట్ల ప‌రిహారం చెల్లించాల‌ని ఆదేశిస్తూ 12 మందికి రెండేండ్ల జైలు శిక్ష విధించింది.

‘బోర్డర్’ చిత్రం ఢిల్లీలోని ఉప‌హార్ సినిమా థియేట‌ర్‌తోపాటు దేశ‌వ్యాప్తంగా విడుదలైంది. సాయంత్రం ప్రదర్శనకు సినిమా హాల్ నిండిపోయింది. స‌గం సినిమా పూర్తవుతున్న స‌మ‌యంలో సినిమా హాల్ గ్రౌండ్ ఫ్లోర్‌లో ట్రాన్స్‌ఫార్మర్‌లో మంటలు చెలరేగాయి. మంటలు హాల్ మొత్తాన్ని ముంచెత్తాయి. కొందరు కాలిన గాయాలతో, మరికొందరు ఊపిరి ఆడకుండా మరణించారు. ఈ ప్రమాదంలో 59 మంది ప్రాణాలు విడ‌వ‌గా.. 100 మందికి పైగా గాయపడ్డారు. హాల్ పార్కింగ్ స్థలంలో ఉంచిన కార్లు కూడా కాలి బూడిదయ్యాయి. ఆ రోజు ఉద‌యం 7 గంట‌ల‌కు తొలుత మంట‌లు చెల‌రేగ‌గా అదుపులోకి తెచ్చారు. మ‌ధ్యాహ్నం వ‌ర‌కు ట్రాన్స్‌ఫార్మ‌ర్ మ‌ర‌మ్మ‌తులు పూర్తిచేశారు. అయితే, ఆయిల్ లీకేజీల‌ను అక్క‌డి సిబ్బంది ప‌ట్టించుకోలేదు. ఒక్క‌సారిగా ట్రాన్స్‌ఫార్మ‌ర్ పేల‌డం, మంట‌లు వ్యాపించ‌డం చ‌క‌చ‌కా జ‌రిగిపోయాయి.

ఈ ఘ‌ట‌న‌కు సంబంధించి ఉపహార్ సినిమా థియేట‌ర్‌ యజమాని సుశీల్ అన్సాల్, అతని కుమారుడు ప్రణవ్ అన్సల్‌ను పోలీసులు అరెస్ట్ చేశారు. కేసు దర్యాప్తును సీబీఐకి అప్పగించారు. మొత్తం 16 మందిపై సీబీఐ కోర్టులో చార్జిషీట్ దాఖలు చేసింది. బాధితులకు రూ.18 కోట్ల నష్టపరిహారం చెల్లించాలని 2003 లో కోర్టు ఆదేశించింది. 2007 లో సుశీల్, గోపాల్ అన్సాల్ సహా 12 మంది నిందితులను కోర్టు దోషిగా నిర్ధారించి అందరికీ రెండేండ్ల‌ జైలు శిక్ష విధించింది.