ఆలయాలకు వైభవం

• ఏడేళ్లలో భారీగా నిధులు కేటాయింపు, విడుదల
• రూ.200 కోట్లతో 700కు పైగా దేవాలయాల పునరుద్ధరణ
• అభివృద్ధిపై మంత్రి అల్లోల ఇంద్రకరణ్‌రెడ్డి ప్రత్యేక శ్రద్ధ

ఉమ్మడి రాష్ట్రంలో నిర్లక్ష్యానికి గురైన ఆలయాలు, స్వరాష్ట్రంలో కొత్త రూపు దిద్దుకున్నాయి. సీఎం కేసీఆర్‌ నేతృత్వంలో మంత్రి అల్లోల ఆధ్వర్యంలో పురాతన కొవెలలు పునరుద్ధరణకు నోచుకున్నాయి. రాష్ట్ర ప్రభుత్వం పెద్ద ఎత్తున నిధులు మంజూరుచేయగా, ఆలయాలన్నీ సర్వాంగ సుందరంగా మారాయి. ఆయా చోట్ల ప్రభుత్వం చేపడుతున్న అభివృద్ధి కార్యక్రమాలతో, భక్తులకు సదుపాయాలు సమకూరుతున్నాయి.

నిర్మల్‌, మార్చి 20(నమస్తే తెలంగాణ): ఉమ్మడి ఆంధ్రప్రదేశ్‌లో ఆలయాలు నిర్లక్ష్యానికి గురికాగా.. స్వరాష్ట్రంలో కొత్త రూపు సంతరించుకున్నాయి. సీఎం కేసీఆర్‌ నేతృత్వంలో పురాతన ఆలయాలు పునరుద్ధరణకు నోచుకోగా.. అల్లోల ఇంద్రకరణ్‌రెడ్డి దేవాదాయశాఖ మంత్రిగా బాధ్యతలు తీసుకున్నప్పటి నుంచి ఆలయాల పురోగతి అగ్రస్థానానికి చేరింది. 2014 ముందు ఒక్కో గుడికి దూపదీప నైవేద్యం కింద రూ. 2500 ఉండగా.. 2014 సంవత్సరం తర్వాత రూ.6 వేలకు పెంచారు. 155 ఆలయాలు మాత్రమే ధూపదీప నైవేద్యం కింద ఉండగా, ఆ సంఖ్య 329కి చేరింది. కామన్‌ గుడ్‌ఫండ్‌ (సీజీఎఫ్‌) కింద గతంలో 101 ఆలయాల అభివృద్ధికి కేవలం రూ.22.32 కోట్లు కేటాయించగా.. ప్రస్తుతం 712 దేవాలయాల పునరుద్ధరణకు రూ.105.24 కోట్లు కేటాయించింది.

• స్పెషల్‌ డెవలప్‌మెంట్‌ ఫండ్స్‌(ఎస్‌డీఎఫ్‌) కింద బాసర అభివృద్ధికి తెలంగాణ ప్రభుత్వం రూ.50 కోట్లు మంజూరు చేసింది. ఇందులో రూ.8 కోట్లతో పలు అభివృద్ధి పనులు చేపడుతున్నారు. అతిథి గృహాలు, భారీ షెడ్లు, ప్రహరీ నిర్మించారు.
• నిర్మల్‌లోని మహాలక్ష్మీ ఆలయాన్ని రూ.3 కోట్లతో సర్వాంగ సుందరంగా నిర్మిస్తున్నారు.
• అడెల్లి మహాపోచమ్మ ఆలయాభివృద్ధికి రూ.12 కోట్లు కేటాయించగా.. మొదటి విడుత కింద రూ.3 కోట్లు మంజూరయ్యాయి. వీటితో నూతన ఆలయాన్ని నిర్మించడంతోపాటు అతిథి గృహాలు, ఇతర మౌలిక సదుపాయాలు కల్పించనున్నారు.
• దిలావర్‌పూర్‌ మండలంలోని కాల్వ లక్ష్మీనరసింహస్వామి ఆలయ పునరుద్ధణకు రూ.2 కోట్లు కేటాయించగా.. ఈ నిధులతో ఆలయ నిర్మాణం, కల్యాణ మండపం, యాగశాల, ప్రహరీ, రాజగోపుర నిర్మాణాలు పూర్తయ్యాయి. ఇవే కాకుండా కదిలి పాపహరేశ్వరాలయం, నిర్మల్‌లోని నందిగుండం దుర్గామాత, గండిరామన్న సాయిబాబా, మంజులాపూర్‌ సాయిబాబా, దేవరకోట లక్ష్మీ వేంకటేశ్వరస్వామి ఆలయాల అభివృద్ధికి పునరుద్ధరణకు, ఇతర సదుపాయాల కల్పనకు కోట్లాది రూపాయలు మంజూరయ్యాయి. వీటితోపాటు చారిత్రక ఆలయాలకు కూడా మహర్దశ కల్పించింది.

ఆలయాల అభివృద్ధికి అధిక ప్రాధాన్యం

ప్రతి వ్యక్తిలో ఆధ్యాత్మిక భావన పెంపొందించడమే కాకుండా, మానసిక ప్రశాంతత, నైతిక విలువల పెంపుదల కోసం ఆలయాలు ఎంతో తోడ్పడు తాయి. ఉమ్మడి ఆంధ్రప్రదేశ్‌లో తెలంగాణ ప్రాంతంలోని అనేక ఆలయాలు నిర్లక్ష్యానికి గురయ్యాయి. తెలంగాణ ప్రభుత్వం భారీగా నిధులు విడుదల చేస్తున్నది. ముఖ్యమంత్రి కేసీఆర్‌ ప్రత్యేక చొరవ కారణంగానే ఆలయాలకు పూర్వవైభవం చేకూరుతున్నది.
– అల్లోల ఇంద్రకరణ్‌రెడ్డి, దేవాదాయ శాఖ మంత్రి