సప్లిమెంట్లు.. సపరేటు!

ఈ మధ్యకాలంలో చాలామంది ‘సప్లిమెంట్లు’ తీసుకుంటున్నారు. ఆహారంతో శరీరానికి తగినన్ని పోషకాలు అందక.. మాత్రలను ఆశ్రయిస్తున్నారు. అయితే, మహిళల వయసును బట్టి.. పోషకాల అవసరాలు వేరు వేరుగా ఉంటాయని నిపుణులు చెబుతున్నారు. టీనేజర్లతో పోలిస్తే.. మెనోపాజ్‌కు చేరిన మహిళల శరీర తత్వం వేరుగా ఉంటుందని అంటున్నారు.

ఈ మధ్యకాలంలో చాలామంది ‘సప్లిమెంట్లు’ తీసుకుంటున్నారు. ఆహారంతో శరీరానికి తగినన్ని పోషకాలు అందక.. మాత్రలను ఆశ్రయిస్తున్నారు. అయితే, మహిళల వయసును బట్టి.. పోషకాల అవసరాలు వేరు వేరుగా ఉంటాయని నిపుణులు చెబుతున్నారు. టీనేజర్లతో పోలిస్తే.. మెనోపాజ్‌కు చేరిన మహిళల శరీర తత్వం వేరుగా ఉంటుందని అంటున్నారు. కాబట్టి, సప్లిమెంట్లు కూడా సపరేటుగా తీసుకోవాలని సలహా ఇస్తున్నారు.

• టీనేజీ అమ్మాయిలకు ఐరన్‌, కాల్షియం ఎక్కువ అవసరం. నెలసరి సమయంలో వీరు రక్తం ఎక్కువగా కోల్పోతారు. కాబట్టి, ఐరన్‌.. రక్తహీనతను తగ్గిస్తుంది. అదే సమయంలో కాల్షియం.. ఎముకల అభివృద్ధిని ప్రోత్సహిస్తుంది.
• పెళ్లయిన మహిళలకు ఫోలిక్‌ యాసిడ్‌, ఒమేగా-3 ఫ్యాటీ యాసిడ్స్‌, విటమిన్‌ డి చాలా అవసరం. ముఖ్యంగా.. గర్భధారణ కోసం న్యూరల్‌ ట్యూబ్‌ లోపాల నివారణకు ఫోలిక్‌ యాసిడ్‌ ఎక్కువగా తీసుకోవాలి. ఇక హార్మోన్ల సమతుల్యతకు ఒమేగా-3 సహాయపడుతుంది. కాల్షియం శోషణకు విటమిన్‌ డి.. సహకరిస్తుంది. రోగ నిరోధక శక్తిని బలపరుస్తుంది.
• గర్భధారణ సమయంలో ఐరన్‌, డీహెచ్‌ఏ, ఫోలిక్‌ యాసిడ్‌తోపాటు అయోడిన్‌తో కూడిన ప్రీనేటల్‌ మల్టీవిటమిన్లను తీసుకోవడం మంచిది. ఇవి గర్భస్థ శిశువులో మెదడు పెరుగుదలకు తోడ్పడతాయి. ప్రసవ సమస్యలను నివారించడంలో సాయపడతాయి.
• పెరిమెనోపాజ్‌, మెనోపాజ్‌ దశలో ఉన్న మహిళల్లో ఎముకల సాంద్రత తగ్గడం, మానసిక స్థితిలో మార్పులు రావడం, అలసట పెరగడం వంటి సమస్యలు చుట్టుముడతాయి. ఇలాంటి సమయంలో విటమిన్‌ బి, డి, కాల్షియం, మెగ్నీషియం చాలా అవసరం.
• ఇక వృద్ధులు విటమిన్‌ బి12, డి3తోపాటు కాల్షియం సప్లిమెంట్లు తీసుకోవాలి. ఇవి బోలు ఎముకల వ్యాధిని ఎదుర్కోవడంలో సాయపడతాయి. నాడీవ్యవస్థ ఆరోగ్యానికి హామీ ఇస్తాయి.