భార‌త్‌లో 5 జీ ట్రయల్స్‌కు మార్గం సుగ‌మం

ఇంట‌ర్నెట్‌పై ప‌నిచేసే వారికి శుభ‌వార్త‌. భార‌త‌దేశంలో 5 జీ ట్ర‌య‌ల్స్ పూర్త‌య్యాయి. రిలయన్స్ జియో, భారతి ఎయిర్‌టెల్, వొడాఫోన్-ఐడియా సంస్థ‌ల‌కు 5 జీ స్పెక్ట్రంను టెలికాం విభాగం (డీఓటీ) కేటాయించింది

May 28, 2021 / 03:38 PM IST

భార‌త్‌లో 5 జీ ట్రయల్స్‌కు మార్గం సుగ‌మం

న్యూఢిల్లీ : ఇంట‌ర్నెట్‌పై ప‌నిచేసే వారికి శుభ‌వార్త‌. భార‌త‌దేశంలో 5 జీ ట్ర‌య‌ల్స్ పూర్త‌య్యాయి. రిలయన్స్ జియో, భారతి ఎయిర్‌టెల్, వొడాఫోన్-ఐడియా సంస్థ‌ల‌కు 5 జీ స్పెక్ట్రంను టెలికాం విభాగం (డీఓటీ) కేటాయించింది. స్పెక్ట్రం కేటాయింపుతో దేశంలో 5 జీ ట్రయల్స్‌కు మార్గం సుగమం అయింది.

టెలికాం కంపెనీలకు 700 మెగాహెర్ట్జ్, 3.5 గిగాహెర్ట్జ్, 26 గిగాహెర్ట్జ్ బ్యాండ్ల స్పెక్ట్రంను డీఓటీ కేటాయించింది. డీఓటీ వైర్‌లెస్ ప్లానింగ్ అండ్ కోఆర్డినేషన్ కమిటీ మూడు టెలికాం కంపెనీలకు 5 జీ ఎయిర్‌వేస్‌ 100, 800, 10 యూనిట్లను కేటాయించింది. ఈ 5 జీ ట్రయల్ ఎయిర్‌వేస్‌ను 6 నెలల స‌మ‌యానికి కేటాయించారు. టెలికాం కంపెనీలు పట్టణాల‌తో పాటు గ్రామీణ, సెమీ అర్బన్ ప్రాంతాల్లో ట్రయల్స్ నిర్వ‌హించాల్సి ఉంటుంది. డీఓటీ వర్గాల సమాచారం ప్రకారం, పంజాబ్, హర్యానా, చండీగఢ్‌లో ట్రయల్స్ కోసం స్పెక్ట్రం కేటాయించలేదు.

5 జీ ట్రయల్ స్పెక్ట్రం కేటాయింపు రిలయన్స్ జియో, భారతి ఎయిర్‌టెల్‌కు చాలా ముఖ్యమైనది. ఈ రెండు సంస్థలకు 5 జీ-రెడీ నెట్‌వర్క్ ఉన్న‌ది. కరోనా మహమ్మారి స‌మ‌యంలో ఈ రెండు సంస్థల డాటా వినియోగం బాగా పెరిగింది. స్పెక్ట్రం కేటాయింపు ఈ రెండు సంస్థలకు 5 జీ సేవలను త్వరగా ప్రారంభించేందుకు సహాయపడుతుంది.

13 దరఖాస్తుల‌కు ఆమోదం

ఈ నెల ప్రారంభంలో 5 జీ ట్రయల్ కోసం 13 దరఖాస్తులను డీఓటీ ఆమోదించినట్లు ఒక నివేదిక తెలిపింది. విచారణ కోసం డీఓటీకి మొత్తం 16 దరఖాస్తులు వచ్చాయి. అయితే, హువావే, జెడ్‌టీఈ వంటి చైనా కంపెనీలను 5 జీ ట్రయల్‌కు దూరంగా పెట్టారు. ట్రయల్ అప్లికేషన్ ఆమోదంలో డీఓటీ వివిధ షరతులను పెట్టింది. ట్రయల్స్ కోసం మాత్రమే ఎయిర్‌వేవ్‌ను ఉపయోగించడం ఇందులో ముఖ్య‌మైన ష‌ర‌తు. ఈ కంపెనీలు షరతులను ఉల్లంఘిస్తే తీవ్ర పరిణామాలను ఎదుర్కోవలసి ఉంటుందని కేంద్రం హెచ్చ‌రించింది.

రిలయన్స్ జియో, యూఎస్ టెక్నాలజీ సంస్థ క్వాల్కమ్‌తో కలిసి అమెరికాలో తన 5 జీ టెక్నాలజీని విజయవంతంగా పరీక్షించింది. క్వాల్‌కామ్, రిలయన్స్ అనుబంధ సంస్థ రెడిసిస్‌తో కలిసి 5 జీ టెక్నాలజీపై కృషి చేస్తున్నామని, దీనిని త్వరలో భారతదేశంలో ప్రారంభించవచ్చని రిలయన్స్ జియో ప్రెసిడెంట్‌ మాథ్యూ ఒమన్ తెలిపారు. ప్రస్తుతం, యుఎస్ఎ, దక్షిణ కొరియా, ఆస్ట్రేలియా, స్విట్జర్లాండ్, జ‌ర్మ‌నీ వంటి దేశాల నుంచి 5 జీ కస్టమర్లు ప్రపంచవ్యాప్తంగా 1 జీబీపీఎస్ ఇంటర్నెట్ స్పీడ్ సదుపాయాన్ని పొందుతున్నారు. శ్రీలంక, ఒమన్, ఫిలిప్పీన్స్, న్యూజిలాండ్ వంటి చిన్న దేశాల్లో కూడా 5 జీ సేవ‌లు ల‌భిస్తున్నాయి.