గైర్హాజ‌రు ఎందుకో : బెంగాల్ బీజేపీలో ముదురుతున్న సంక్షోభం

ప‌శ్చిమ బెంగాల్ బీజేపీలో సంక్షోభం ముదిరిపోతున్న‌ది. ఎన్నిక‌లు జ‌రిగిన త‌ర్వాత సువేందు అధికారిని బీజేపీఎల్పీ నేత‌గా ప్ర‌క‌టించిన‌ప్ప‌టి నుంచి పార్టీలో ముస‌లం మొద‌లైంది.

June 15, 2021 / 01:38 PM IST

గైర్హాజ‌రు ఎందుకో : బెంగాల్ బీజేపీలో ముదురుతున్న సంక్షోభం

కోల్‌క‌తా : ప‌శ్చిమ బెంగాల్ బీజేపీలో సంక్షోభం ముదిరిపోతున్న‌ది. ఎన్నిక‌లు జ‌రిగిన త‌ర్వాత సువేందు అధికారిని బీజేపీఎల్పీ నేత‌గా ప్ర‌క‌టించిన‌ప్ప‌టి నుంచి పార్టీలో ముస‌లం మొద‌లైంది. సోమ‌వారం సాయంత్రం గ‌వ‌ర్న‌ర్‌తో భేటీ స‌మ‌యంలో దాదాపు 24 మంది బీజేపీ ఎమ్మెల్యేలు గైర్మాజ‌రుతో ఈ వాద‌నకు మ‌రింత బ‌లం చేకూరిందంటున్నారు రాజ‌కీయ నిపుణులు. వీరంతా తృణ‌మూల్ కాంగ్రెస్‌లో చేరేందుకు సిద్ధ‌మ‌య్యార‌నే ఊహాగానాలు కూడా తీవ్ర‌మ‌య్యాయి.

పశ్చిమ బెంగాల్ ఎన్నిక‌ల స‌మ‌యంలో తృణమూల్ కాంగ్రెస్ నుంచి బీజేపీలో చేరిన చాలా మంది తిరిగి సొంతింటికి వ‌చ్చేందుకు ఆస‌క్తి చూపుతున్న‌ట్లుగా తెలుస్తున్న‌ది. ఇటీవ‌ల ముకుల్‌రాయ్ టీఎంసీలో చేర‌డంతో బీజేపీ టికెట్‌పై గెలిచిన వారిలో చాలా మంది తిరిగి టీఎంసీ వైపు చూస్తున్న‌ట్లుగా ఊహాగానాలు జోరందుకున్నాయి. రాష్ట్ర‌ గవర్నర్ జగదీప్ ధంఖర్‌తో బెంగాల్ అసెంబ్లీలో ప్రతిపక్ష నాయకుడు సువేందు అధికారి, పార్టీ ఎమ్మెల్యేల ప్రతినిధి బృందం రాజ్ భవన్‌లో సోమవారం సాయంత్రం సమావేశమయ్యారు. ఈ సమావేశానికి దాదాపు 24 మంది ఎమ్మెల్యేలు దూరంగా ఉన్నారు. దీంతో వీరంతా టీఎంసీ చేర‌బోతున్నార‌నే వ‌దంతులు వినిపిస్తున్నాయి.

ఎన్‌డీటీవీ నివేదిక ప్రకారం, రాష్ట్రంలో జరుగుతున్న అనేక హింసాత్మక, తప్పుడు సంఘటనల గురించి గవర్నర్‌కు తెలియజేసేందుకు బీజేపీ నాయకుల బృందం గ‌వ‌ర్న‌ర్‌తో స‌మావేశ‌మైంది. ఈ సమావేశానికి 74 మంది బీజేపీ ఎమ్మెల్యేలకుగాను 24 మంది గైర్హాజ‌ర‌య్యారు. బీజేపీ ఎమ్మెల్యేలు సువేందును త‌మ నాయకుడిగా అంగీకరించడం లేద‌నేది కూడా దీనికి ఒక కారణమై ఉంటుంద‌ని నిపుణులు అంటున్నారు.