రైల్వే ప్రయాణికులకు క్రెడిట్‌ కార్డు

• ఎన్పీసీఐ, బీవోబీలతో కలిసి ఐఆర్‌సీటీసీ విడుదల

న్యూఢిల్లీ, ఫిబ్రవరి 21: నేషనల్‌ పేమెంట్స్‌ కార్పొరేషన్‌ ఆఫ్‌ ఇండియా (ఎన్పీసీఐ), బ్యాంక్‌ ఆఫ్‌ బరోడా ఫైనాన్షియల్‌ సొల్యూషన్స్‌ లిమిటెడ్‌ (బీఎఫ్‌ఎస్‌ఎల్‌)లతో కలిసి సోమవారం రైల్వే ప్రయాణికుల కోసం ఇండియన్‌ రైల్వే క్యాటరింగ్‌ అండ్‌ టూరిజం కార్పొరేషన్‌ (ఐఆర్‌సీటీసీ) ప్రత్యేకంగా ఓ కో-బ్రాండెడ్‌ క్రెడిట్‌ కార్డును పరిచయం చేసింది. రైళ్లలో ఎక్కువగా ప్రయాణించేవారికి గరిష్ఠంగా ఆదా చేసేలా ఈ ‘ఐఆర్‌సీటీసీ బీవోబీ రూపే కాంటాక్ట్‌లెస్‌ క్రెడిట్‌ కార్డు’ను తీసుకొచ్చినట్టు ఈ సందర్భంగా అధికారులు తెలిపారు. ఇంధనం, పప్పు దినుసులనూ ఈ కార్డుపై కొనుక్కోవచ్చని, జేసీబీ నెట్‌వర్క్‌ ద్వారా ఏటీఎంలు, అంతర్జాతీయ వ్యాపారుల వద్ద కూడా దీన్ని వినియోగించవచ్చన్నారు. తద్వారా రివార్డు పాయింట్లను పొందవచ్చు. కాగా, కార్డుదారులు తమ లాయల్టీ నంబర్‌ (కార్డుపై ఉంటుంది)ను వారి ఐఆర్‌సీటీసీ లాగిన్‌ ఐడీతో అనుసంధానం చేసుకుంటే ఐఆర్‌సీటీసీ వెబ్‌సైట్‌ లేదా మొబైల్‌ యాప్‌పై రివార్డు పాయింట్లను రిడీమ్‌ కూడా చేసుకోవచ్చు. రోజూ ఐఆర్‌సీటీసీ వెబ్‌సైట్‌పై రైల్వే టిక్కెట్లను బుక్‌చేస్తున్నవారు 6.6 కోట్ల మంది ఉన్నారని ఎన్పీసీఐ సీవోవో ప్రవీణ రాయ్‌ తెలిపారు. నిత్యం 7-7.5 లక్షలకుపైగా టిక్కెట్‌ బుకింగ్స్‌ జరుగుతున్నాయని చెప్పారు. ఈ కార్డు వీరందరికీ లాభిస్తుందన్న ఆమె.. కరోనా నేపథ్యంలో తగ్గిన రైలు ప్రయాణం కూడా పెరిగేందుకు దోహదపడగలదన్న ఆశాభావాన్ని వ్యక్తం చేశారు.

క్రెడిట్‌ కార్డు లాభాలివి..

• ఐఆర్‌సీటీసీ వెబ్‌సైట్‌ లేదా మొబైల్‌ యాప్‌ ద్వారా 1ఏసీ, 2ఏసీ, 3ఏసీ, సీసీ లేదా ఈసీ బుకింగ్స్‌ కోసం ఖర్చుచేసే ప్రతి రూ.100కు 40 రివార్డు పాయింట్లు
• అన్ని రైలు టిక్కెట్ల బుకింగ్స్‌పై కస్టమర్లకు 1 శాతం లావాదేవీ ఫీజు తగ్గింపు
• కార్డు జారీ అయిన 45 రోజుల్లోగా ఒకేసారి వెయ్యి రూపాయలు అంతకంటే ఎక్కువ విలువైన కొనుగోళ్లు జరిపితే వెయ్యి బోనస్‌ రివార్డు పాయింట్లు
• కిరాణా సరుకులు, డిపార్ట్‌మెంటల్‌ స్టోర్లలో ఖర్చుచేసే ప్రతీ రూ.100 కొనుగోళ్లపై 4 రివార్డు పాయింట్లు. ఇతర కేటగిరీల్లో 2 రివార్డు పాయింట్లు
• దేశవ్యాప్తంగా పెట్రోల్‌ బంకుల్లో జరిపే లావాదేవీలపై ఇంధన సర్‌చార్జీ 1 శాతం రద్దు