UPS | యూపీఎస్‌ వచ్చేస్తోంది.. ఏప్రిల్‌ 1 నుంచి ఆ ఉద్యోగులకు ప్రయోజనాలు

కేంద్ర ప్రభుత్వ ఉద్యోగుల కోసం యూనిఫైడ్‌ పెన్షన్‌ స్కీమ్‌ (యూపీఎస్‌) అమలును మోదీ సర్కారు ప్రకటించింది. పదవీ విరమణ పొందినవారికి పింఛన్‌ హామీ, ఆర్థిక భద్రతలే లక్ష్యంగా పాత పెన్షన్‌ స్కీమ్‌ (ఓపీఎస్‌), జాతీయ పెన్షన్‌ సిస్టమ్‌ (ఎన్‌పీఎస్‌) రెండింటి ప్రయోజనాలను కలగలిపి ఈ యూపీఎస్‌ను కేంద్రం తీసుకొచ్చింది.

• ఏప్రిల్‌ 1 నుంచి కేంద్ర ప్రభుత్వ ఉద్యోగులకు అమలు

UPS | కేంద్ర ప్రభుత్వ ఉద్యోగుల కోసం యూనిఫైడ్‌ పెన్షన్‌ స్కీమ్‌ (యూపీఎస్‌) అమలును మోదీ సర్కారు ప్రకటించింది. పదవీ విరమణ పొందినవారికి పింఛన్‌ హామీ, ఆర్థిక భద్రతలే లక్ష్యంగా పాత పెన్షన్‌ స్కీమ్‌ (ఓపీఎస్‌), జాతీయ పెన్షన్‌ సిస్టమ్‌ (ఎన్‌పీఎస్‌) రెండింటి ప్రయోజనాలను కలగలిపి ఈ యూపీఎస్‌ను కేంద్రం తీసుకొచ్చింది. ఈ ఏడాది ఏప్రిల్‌ 1 నుంచి ఇది అమల్లోకి రానున్నది. అయితే అర్హులైనవారికి ఈ యూపీఎస్‌ ఎలాంటి పరిస్థితుల్లో వర్తిస్తుందో కూడా ఇందులో పేర్కొన్నారు.

పదవీ విరమణ

కనీసం పదేండ్లు ఎంపిక చేసిన సేవలు అందించి, ఆ తర్వాత రిటైరైన ఉద్యోగులకు యూపీఎస్‌ వర్తిస్తుంది.

ఎఫ్‌ఆర్‌ 56(జే) కింద రిటైర్మెంట్‌

పెనాల్టీ ప్రొవిజన్స్‌ కింద కాకుండా రిటైరైన ప్రభుత్వ ఉద్యోగులే అర్హులు.

వాలంటరీ రిటైర్మెంట్‌

కనీసం 25 ఏండ్లు పనిచేసి, ఆ తర్వాత స్వచ్చంధ పదవీ విరమణ తీసుకున్నవారికి రిటైర్మెంట్‌ వయసు వచ్చాకే పింఛన్‌.

ఇలాగైతే రాదు..

డిస్మిస్‌, ఉద్యోగం నుంచి తొలగించినవారు, రాజీనామా చేసినవారికి యూపీఎస్‌ను ఎంచుకొనే అవకాశం ఉండదు.

యూపీఎస్‌ ప్రయోజనాలు

• 25 ఏండ్లు లేదా అంతకుమించి క్వాలిఫైయింగ్‌ సర్వీస్‌ ఉన్న ఉద్యోగులకు రిటైర్మెంట్‌కు ముందు చివరి 12 నెలలు అందుకున్న వేతనంలోని సగటు బేసిక్‌ పేలో 50 శాతాన్ని నెలనెలా పింఛన్‌గా అందిస్తారు. సర్వీస్‌ 25 ఏండ్ల కంటే తక్కువగా ఉంటే పింఛన్‌ తగ్గుతుంది.
• క్వాలిఫైయింగ్‌ సర్వీస్‌లో 10 ఏండ్లు, అంతకుమించి ఉన్న ఉద్యోగులకు నెలకు కనీసం రూ.10,000 పింఛన్‌గా చెల్లిస్తారు. 25 ఏండ్లు పనిచేసి వాలంటరీ రిటైర్మెంట్‌ తీసుకున్నవారికి, పదవీ విరమణ వయసు వచ్చాకే పింఛన్‌ మొదలవుతుంది.
• పదవీ విరమణ అనంతరం పింఛన్‌దారుడు చనిపోతే.. ఆ పింఛన్‌లో 60 శాతం భార్య లేదా భర్తకి వస్తుంది.
• నిబంధనలకు లోబడి ఉద్యోగులకు డీఏ తరహాలోనే పింఛన్‌దారుడు, వారు లేకపోతే భాగస్వామికి డియర్‌నెస్‌ రిలీఫ్‌నూ చెల్లిస్తారు. పింఛన్‌ మొదలైతేనే వస్తుంది.
• అదనంగా పదవీ విరమణ సమయంలో క్వాలిఫైయింగ్‌ సర్వీస్‌లోని ప్రతీ ఆరు నెలల కాలానికి నెలవారీ బేసిక్‌ పే, డీఏలో 10 శాతం చొప్పున లెక్కించి ఎన్నేండ్లయితే అన్నేండ్లకు ఒకేసారి చెల్లిస్తారు. ఈ మొత్తం పింఛన్‌లో తగ్గించరు.