జాగృతి బీసీ పోరు.. దిగొచ్చిన సర్కారు

బీసీలకు 42 శాతం కోటా కోసం తెలంగాణ జాగృతి పోరాటం ఫలించింది. ఫూలే యునైటెడ్‌ ఫ్రంట్‌తో కలిసి ఎమ్మెల్సీ కల్వకుంట్ల కవిత సాగించిన ఉద్యమంతో సర్కారు దిగొచ్చింది. రాజకీయ, ఉద్యోగ, విద్యారంగాల్లో వేర్వేరుగా రిజర్వేషన్లు కల్పించాలని, లేదంటే చట్టపరమైన చిక్కులు తప్పవని ఏడాది కాలంగా చేస్తున్న డిమాండ్లకు ప్రభుత్వం తలొగ్గింది.

• ఎమ్మెల్సీ కవిత ఒత్తిడితో 42 శాతం బీసీ కోటాకు ఆమోదం
• ఏడాది కాలంగా బీసీ సంఘాలతో విస్తృత సమావేశాలు
• కృతజ్ఞతలు తెలుపుతున్న బీసీ సంఘాలు

హైదరాబాద్‌, మార్చి 7 (నమస్తే తెలంగాణ ) : బీసీలకు 42 శాతం కోటా కోసం తెలంగాణ జాగృతి పోరాటం ఫలించింది. ఫూలే యునైటెడ్‌ ఫ్రంట్‌తో కలిసి ఎమ్మెల్సీ కల్వకుంట్ల కవిత సాగించిన ఉద్యమంతో సర్కారు దిగొచ్చింది. రాజకీయ, ఉద్యోగ, విద్యారంగాల్లో వేర్వేరుగా రిజర్వేషన్లు కల్పించాలని, లేదంటే చట్టపరమైన చిక్కులు తప్పవని ఏడాది కాలంగా చేస్తున్న డిమాండ్లకు ప్రభుత్వం తలొగ్గింది. ఈ నేపథ్యంలోనే అసెంబ్లీలో వేర్వురు బిల్లులు ప్రవేశపెట్టాలని రాష్ట్ర క్యాబినెట్‌ నిర్ణయించింది.

రాష్ట్రవ్యాప్త పర్యటనలు.. సంఘాలతో సమావేశాలు

అసెంబ్లీ ఎన్నికలకు ముందు కాంగ్రెస్‌ పార్టీ కామారెడ్డి డిక్లరేషన్‌లో ఇచ్చిన హామీ మేరకు బీసీ రిజర్వేషన్లను 42 శాతానికి పెంచాలని, అసెంబ్లీ ఆవరణలో జ్యోతిబాఫూలే విగ్రహాన్ని ఏర్పాటు చేయాలని ఎమ్మెల్సీ కవిత ఏడాది కాలంగా పోరాటం కొనసాగిస్తున్నారు. ఇందులో భాగంగా రాష్ట్రవ్యాప్తంగా విస్తృతంగా పర్యటించారు. బీసీ సంఘాల నాయకులు, మేధావులతో సమావేశాలు నిర్వహించారు. బలహీనవర్గాల్లో చైతన్యం కల్పించడంలో సఫలీకృతులయ్యారు. బీసీలకు స్థానిక, ఉద్యోగ, విద్యారంగాల్లో కలిపి 42 శాతం కోటా ఇస్తే న్యాయపరమైన చిక్కులు ఎదురవుతాయని పదేపదే అనేక వేదికలపై నొక్కిచెప్పారు. స్థానిక సంస్థల్లో రిజర్వేషన్ల కల్పన రాష్ట్రపరిధిలో ఉంటుందని, విద్య, ఉద్యోగ రంగాల్లో కేంద్రం ఆమోదం అవసరమని బలంగా చెప్పుకొచ్చారు. ఈ పరిస్థితుల్లో మూడింటికి కలిపి రిజర్వేషన్లు కల్పిస్తే మొదటికే మోసపోవాల్సి వస్తుందని నిరంతరం హెచ్చరించారు. ఇందిరాపార్క్‌ వేదికగా జరిగిన మహాధర్నాలోనూ బలంగా తన వాణిని వినిపించారు. గత ఫిబ్రవరి నాలుగున శాసనమండలి సమావేశంలోనూ ఇదే విషయాన్ని స్పష్టంచేశారు. నాలుగురోజుల క్రితం పోస్ట్‌కార్డుల ఉద్యమాన్ని ప్రారంభించారు. ఫలితంగా కాంగ్రెస్‌ ప్రభుత్వం వేర్వేరు బిల్లులు తీసుకురావాలని నిర్ణయించింది. కాగా, బీసీ ప్రత్యేక కోటా కోసం కవిత సాగించిన పోరాటంపై బీసీ సంఘాల నాయకులు హర్షంవ్యక్తం చేస్తున్నారు.

బీసీలకు రిజర్వేషన్ల కోటా పెంపుకోసం తెలంగాణ జాగృతి ఉద్యమ ప్రస్థానం..

• 21 జనవరి 2024: అసెంబ్లీ ఆవరణలో జ్యోతిబాఫూలే విగ్రహం ఏర్పాటు చేయాలని స్పీకర్‌ గడ్డం ప్రసాద్‌కు వినతిపత్రం సమర్పణ.
• 26 జనవరి 2024: హైదరాబాద్‌లో బీసీ సంఘాలతో రౌండ్‌టేబుల్‌ మీటింగ్‌
• 05 ఫిబ్రవరి 2024: యునైటేడ్‌ ఫూలే ఫ్రంట్‌ ఆవిర్భావం
• 06 ఫిబ్రవరి 2024: జాగృతి, యునైటేడ్‌ ఫూలే ఫ్రంట్‌ ఆధ్వర్యంలో కరీంనగర్‌, వరంగల్‌లో రౌండ్‌ టేబుల్‌ సమావేశాలు
• 07 ఫిబ్రవరి 2024: వికారాబాద్‌లో రౌంట్‌టేబుల్‌ మీటింగ్‌
• 11 ఫిబ్రవరి 2024: యునైటెట్‌ ఫ్రంట్‌ ఆధ్వర్యంలో పత్రికా సమావేశం
• 11 మార్చి 2024: నల్లగొండలో రౌండ్‌ టేబుల్‌ మీటింగ్‌
• 11 ఏప్రిల్‌ 2024: సోమాజిగూడ ప్రెస్‌క్లబ్‌లో యునైటెడ్‌ ఫూలే ఫ్రంట్‌ కో కన్వీనర్‌ శివశంకర్‌ ఆధ్వర్యంలో కులగణన, బీసీ రిజర్వేషన్లు, కామారెడ్డి డిక్లరేషన్‌ అమలుపై విస్తృతస్థాయి సమావేశం
• 25 నవంబర్‌ 2024: ప్రభుత్వం ఏర్పాటు చేసిన డెడికేషన్‌ కమిషన్‌కు జాగృతి ఆధ్వర్యంలో సమగ్ర నివేదిక సమర్పణ.
• 2 డిసెంబర్‌ 2024: హైదరాబాద్‌లో పద్మశాలీ కుల సంఘం నేతలతో సమావేశం
• 06 డిసెంబర్‌ 2024: హైదరాబాద్‌లో జోగి కుల సంఘం నేతలతో సమావేశం
• 07 డిసెంబర్‌ 2024: హైదరాబాద్‌లో మేదరి కుల సంఘం నేతలతో సమావేశం
• 11 డిసెంబర్‌ 2024: హైదరాబాద్‌లో వడ్డెర కుల సంఘం నేతలతో సమావేశం
• 12 డిసెంబర్‌ 2024: హైదరాబాద్‌లో వంశరాజ్‌, సగర, ఉప్పర, రజక సంఘాల నేతలతో సమావేశం
• 12 డిసెంబర్‌ 2024: హైదరాబాద్‌లో బీసీ కులసంఘాల నేతలతో విస్తృతస్థాయి సమావేశం
• 24 డిసెంబర్‌ 2024: హైదరాబాద్‌లోవిశ్వకర్మ, ముదిరాజ్‌ కులస్తులతో మీటింగ్‌
• 26 డిసెంబర్‌ 2024: హైదరాబాద్‌లో శాలివాహన, ఆరెకటిక కులస్తులతో మీటింగ్‌
• 26 డిసెంబర్‌ 2024: హైదరాబాద్‌లో బీసీ కుల సంఘాలతో ఉద్యమ కార్యాచరణపై సమావేశం, చర్చలు
• 27 డిసెంబర్‌ 2024: హైదరాబాద్‌లో ఉమ్మడి నిజామాబాద్‌ బీసీ కుల సంఘాల ఆధ్వర్యంలో పూసల, ముదిరాజ్‌, పద్మశాలీ, మొండిబండ, రజక, నాయీబ్రాహ్మణ, కురుమ, యాదవ, గౌడ్‌, దాసరి, జంగమ, నకాశి, రెడ్డిక, వీరశైవ, మున్నూరుకాపు, పెరుక, మేరి సంఘం నాయకులతో సమావేశం.
• 03 జనవరి 2025: స్థానిక ఎన్నికల్లో 42 శాతం బీసీ కోటా సాధనకోసం ఇందిరాపార్క్‌ ధర్నాచౌక్‌ వద్ద మహాధర్నా.
• 23 జనవరి 2025: కామారెడ్డి డిక్లరేషన్‌ అమలు చేయాలని ముఖ్యమంత్రి రేవంత్‌రెడ్డికి ఎమ్మెల్సీ కవిత లేఖ.
• 15 ఫిబ్రవరి 2025: తెలంగాణ జాగృతి ఆధ్వర్యంలో ఖమ్మంలో బీసీ సంఘం నేతల రౌండ్‌టేబుల్‌ సమావేశం.
• 28 ఫిబ్రవరి 2025: తెలంగాణ జాగృతి ఆధ్వర్యంలో నాగర్‌కర్నూల్‌లో బీసీ సంఘం నేతల రౌండ్‌టేబుల్‌ సమావేశం.