అమెరికా పార్ల‌మెంట్‌లో అంబేడ్క‌ర్‌కు నివాళులు

డాక్ట‌ర్ బీఆర్ అంబేడ్క‌ర్‌ 130 వ జయంతితోపాటు బైషాఖీ పండుగ‌ ప్రాముఖ్యతను అంగీకరిస్తూ అమెరికా పార్లమెంటులో ఈ తీర్మానాన్ని సమర్పించారు.

April 15, 2021 / 07:18 PM IST

అమెరికా పార్ల‌మెంట్‌లో అంబేడ్క‌ర్‌కు నివాళులు

వాషింగ్టన్ : డాక్ట‌ర్ బీఆర్ అంబేడ్క‌ర్‌ 130 వ జయంతితోపాటు బైషాఖీ పండుగ‌ ప్రాముఖ్యతను అంగీకరిస్తూ అమెరికా పార్లమెంటులో ఈ తీర్మానాన్ని సమర్పించారు. ఈ సంద‌ర్భంగా అంబేడ్క‌ర్‌కు అమెరికా పార్ల‌మెంట్ ఘ‌నంగా నివాళుల‌ర్పించింది. డాక్టర్ అంబేద్కర్ జయంతి ప్రతిపాదనను వరుసగా రెండవ సంవత్సరం యుఎస్ ప్రతినిధుల సభలో ప్రవేశపెట్టారు. అంబేడ్క‌ర్‌ గొప్ప రాజ్యాంగ వాస్తుశిల్పిగా గుర్తు చేసుకున్నారు.

తీర్మానం సమర్పించిన తరువాత.. అంబేడ్క‌ర్ అటు భార‌త‌దేశానికి, ఇటు అమెరికాకు.. రెండింటికి స్ఫూర్తిదాయకం అని ఎంపీ రో ఖ‌న్యా ట్వీట్ చేశారు. డాక్టర్ అంబేద్కర్ చేసిన గొప్ప పనిని గుర్తుచేసుకుంటూ మరోసారి ప్రతినిధుల సభలో తీర్మానాన్ని తీసుకువస్తున్నాను. సమానత్వం, న్యాయం, స్వేచ్ఛపై డాక్టర్ అంబేడ్క‌ర్ అభిప్రాయాలు పౌరులందరికీ సమాన హక్కులను బోధిస్తాయన్నారు.

ఇదే సంద‌ర్భంగా బైషాఖీ పండుగ సందర్భంగా భారతదేశానికి సంబంధించిన రెండవ తీర్మానాన్ని తీసుకువచ్చారు. ఈ ప్రతిపాదనను తీసుకువచ్చినప్పుడు కాలిఫోర్నియా ఎంపీ జాన్ గార్మెండి మాట్లాడారు. బైషాఖీకి చారిత్రక, సాంస్కృతిక, మతపరమైన ప్రాముఖ్యత ఉన్న‌ద‌ని, సిక్కులతో పాటు హిందువులు, బౌద్ధ సమాజానికి ఇది చాలా ముఖ్యమైన ప‌ర్వ‌దిన‌మ‌ని చెప్పారు. బైషాఖీని అమెరికాలో సిక్కులు, హిందువులు విస్తృతంగా జరుపుకుంటారు. పెద్ద ఊరేగింపులు నిర్వహిస్తారు.

డాక్టర్ అంబేద్కర్ మా ప్రేరణ: జైస్వాల్

డాక్టర్ భీమ్‌రావ్ అంబేడ్క‌ర్‌ 130 వ జయంతి సందర్భంగా భారతదేశ కాన్సుల్ జనరల్ రణధీర్ జైస్వాల్ న్యూయార్క్‌లో ఘ‌నంగా నివాళులు అర్పించారు. డాక్టర్ అంబేడ్క‌ర్ ఒక సామాజిక సంస్కర్తగా మనకు ఎల్లప్పుడూ స్ఫూర్తిదాయకంగా ఉంటారని అన్నారు. ఈ కార్యక్రమాన్ని న్యూయార్క్‌కు చెందిన శ్రీ గురు రవిదాస్ సభ నిర్వహించింది.