Yogendra Yadav | మోదీ కరిష్మా భ్రమే.. దక్షిణాది రాష్ర్టాల్లో కమలానికి రిక్తహస్తమే: యోగేంద్ర యాదవ్‌

ఈ లోక్‌సభ ఎన్నికల్లో బీజేపీని అధికారానికి దూరం చేయడం సాధ్యమయ్యే పనేనని ప్రముఖ రాజకీయ విశ్లేషకుడు యోగేంద్ర యాదవ్‌ అన్నారు. అయితే, ప్రతిపక్ష పార్టీలు ఆ దిశగా సరైన వ్యూహాలతో ముందుకు పోవట్లేదని పేర్కొన్నారు.

• మందిరం నినాదం ఈ ఎన్నికల్లో పనిచేయదు
• హిందీ బెల్ట్‌లో బీజేపీకి కొత్తగొచ్చే సీట్లు లేవు
• బెంగాల్‌, బీహార్‌, మహారాష్ట్ర, కర్ణాటక..
• ఈ 4 రాష్ర్టాలే ఫలితాలను నిర్ణయిస్తాయ్‌
• బీజేపీ ఓటమి సాధ్యమే:యోగేంద్ర యాదవ్‌

Yogendra Yadav | (స్పెషల్‌ టాస్క్‌ బ్యూరో) హైదరాబాద్‌, మే 8 (నమస్తే తెలంగాణ): ఈ లోక్‌సభ ఎన్నికల్లో బీజేపీని అధికారానికి దూరం చేయడం సాధ్యమయ్యే పనేనని ప్రముఖ రాజకీయ విశ్లేషకుడు యోగేంద్ర యాదవ్‌ అన్నారు. అయితే, ప్రతిపక్ష పార్టీలు ఆ దిశగా సరైన వ్యూహాలతో ముందుకు పోవట్లేదని పేర్కొన్నారు. మోదీ ఛరిష్మాతో ఈ ఎన్నికల్లో గట్టెక్కవచ్చని కొందరు బీజేపీ నేతలు భావిస్తున్నారని, అయితే, అదంతా ఓ భ్రమ మాత్రమేనని కొట్టిపారేశారు. పశ్చిమ బెంగాల్‌, బీహార్‌, మహారాష్ట్ర, కర్ణాటక రాష్ర్టాల ఫలితాలే ఢిల్లీలో ఎవరికి అధికారం దక్కబోతున్నదన్న విషయాన్ని నిర్ణయిస్తాయని తేల్చిచెప్పారు. ఈ మేరకు కన్నడ న్యూస్‌ వెబ్‌సైట్‌ ‘ఈదిన’కు ప్రత్యేక ఇంటర్వ్యూ ఇచ్చారు.

ఇంటర్వ్యూలో యోగేంద్ర యాదవ్‌ కీలక వ్యాఖ్యలు

• ఈ లోక్‌సభ ఎన్నికల అనంతరం దేశంలో స్పష్టమైన మార్పు వచ్చే అవకాశమున్నది. బీజేపీని అధికారం నుంచి దూరం చేయడం సాధ్యమేనని తొలి రెండు దఫాల్లో జరిగిన పోలింగ్‌ సరళిని చూస్తే అర్థమవుతున్నది.
• మోదీ కరిష్మాతో ఈ ఎన్నికల్లో నెట్టుకురావొచ్చని బీజేపీ పరీవారం అనుకొంటున్నది. అయితే, అదంతా ఓ భ్రమ. మోదీ మ్యాజిక్‌ ఈ ఎన్నికల్లో పనిచేసే అవకాశమేలేదు.
• రామమందిరాన్ని ఎన్నికల ప్రచారాస్త్రంగా బీజేపీ వాడుకోవాలనుకొంటున్నది. అయితే, మందిరం ఉన్న యూపీలోనే అక్కడి ప్రజలు ఆ విషయాన్ని ఎప్పుడో మరిచిపోయారు.
• దేశ ప్రజలను ప్రస్తుతం ఇబ్బందులకు గురిచేస్తున్న సమస్యలపైనే యావత్తు జాతి మాట్లాడుకొంటున్నది.
• గుజరాత్‌, రాజస్థాన్‌, మధ్యప్రదేశ్‌, హర్యానా, ఛత్తీస్‌గఢ్‌, ఢిల్లీ, యూపీ వంటి హిందీ బెల్ట్‌ రాష్ర్టాల్లో గరిష్ఠంగా ఎన్ని సీట్లు గెలుచుకోవాలో బీజేపీ 2019లోనే గెలిచింది.
• ఇప్పుడు ఆ రాష్ర్టాల్లో కొత్తగా గెలుచుకొనే సీట్లు లేదు. రైతుల ఆందోళన కారణంగా రాజస్థాన్‌, హర్యానా సరిహద్దు ప్రాంతాల్లో బీజేపీపై తీవ్ర వ్యతిరేకత పెరిగిపోయింది. హర్యానాలో బీజేపీ నేతలను అసలు ఊర్లలోనికే రానివ్వట్లే. అంటే ఆ రాష్ర్టాల్లో సీట్లు తగ్గొచ్చు.
• ఒడిశా నుంచి కేరళ వరకూ దక్షిణాది తీరప్రాంత రాష్ర్టాల్లో బీజేపీకి వచ్చే సీట్లేమీ లేవు.
• బెంగాల్‌, బీహార్‌, మహారాష్ట్ర, కర్ణాటక రాష్ర్టాలే వచ్చే లోక్‌సభ ఎన్నికల ఫలితాలను నిర్ణయిస్తాయి. ఈ రాష్ర్టాల్లో విపక్షాలు బలంగా ఉండటమే దీనికి కారణం. ఇక్కడ ప్రతిపక్షాలు మెజారిటీ సీట్లు సాధిస్తే.. మూడోసారి ప్రభుత్వం ఏర్పాటు చేయగలమన్న బీజేపీ ఆశలు నెరవేరకపోవచ్చు.