100% వీవీప్యాట్ల లెక్కింపు కుదరదు

లోక్‌సభ ఎన్నికలు జరుగుతున్న వేళ ‘ఈవీఎం-వీవీప్యాట్ల లెక్కింపు’నకు సంబంధించి సుప్రీంకోర్టు కీలక తీర్పు వెలువరించింది. ఎలక్ట్రానిక్‌ ఓటింగ్‌ మెషీన్‌ (ఈవీఎం)లలో పోలైన అన్ని ఓట్లను మొత్తం వీవీప్యాట్ల స్లిప్పులతో (100% స్లిప్పులతో) సరిపోల్చాలంటూ దాఖలైన అన్ని పిటిషన్లను సుప్రీంకోర్టు కొట్టేసింది.

• ఎన్నికల వేళ సుప్రీంకోర్టు కీలక తీర్పు
• ఈవీఎంలపై పిటిషన్లు కొట్టివేత
• బ్యాలెట్‌ పద్ధతిలో ఎన్నికలు జరపాలన్న పిటిషన్‌నూ తిరస్కరించిన ధర్మాసనం
• సింబల్‌ లోడింగ్‌ యూనిట్లను కనీసం 45 రోజులు స్ట్రాంగ్‌రూమ్‌లలో ఉంచాలి
• అభ్యర్థులు కోరుకుంటే ఈవీఎంల తనిఖీ
• ఈసీకి సుప్రీం ధర్మాసనం కీలక ఆదేశాలు

న్యూఢిల్లీ, ఏప్రిల్‌ 26: లోక్‌సభ ఎన్నికలు జరుగుతున్న వేళ ‘ఈవీఎం-వీవీప్యాట్ల లెక్కింపు’నకు సంబంధించి సుప్రీంకోర్టు కీలక తీర్పు వెలువరించింది. ఎలక్ట్రానిక్‌ ఓటింగ్‌ మెషీన్‌ (ఈవీఎం)లలో పోలైన అన్ని ఓట్లను మొత్తం వీవీప్యాట్ల స్లిప్పులతో (100% స్లిప్పులతో) సరిపోల్చాలంటూ దాఖలైన అన్ని పిటిషన్లను సుప్రీంకోర్టు కొట్టేసింది. బ్యాలెట్‌ పద్ధతిలోనే మళ్లీ ఎన్నికలు నిర్వహించాలని కోరుతూ దాఖలైన మరో పిటిషన్‌ను కూడా న్యాయస్థానం తోసిపుచ్చింది. ఈ మేరకు జస్టిస్‌ సంజీవ్‌ ఖన్నా, జస్టిస్‌ దీపాంకర్‌ దత్తాతో కూడిన ద్విసభ్య ధర్మాసనం శుక్రవారం తీర్పును వెలువరించింది.

విచారణ సందర్భంగా ధర్మాసనం కీలక వ్యాఖ్యలు

• ఈవీఎంలతో వీవీప్యాట్‌ స్లిప్పులన్నింటినీ పోల్చి చూడాల్సిన పని లేదు. స్లిప్పులను తీసుకుని ఓటరు మరో బాక్స్‌లో వేయాల్సిన అవసరం కూడా లేదు.
• ప్రొటోకాల్స్‌, సాంకేతికంగా ఈవీఎంల పనితీరు తదితర అంశాలను క్షుణ్నంగా పరిశీలించి.. అధికారులను అడిగి అన్ని వివరాలను తెలుసుకున్నాకే ఇది చెప్తున్నాం.
• ఈవీఎంలతో వీవీప్యాట్‌ స్లిప్పులను వందశాతం సరిపోల్చాలని వచ్చిన పిటిషన్లు సరికాదు.
  ఎన్నికల కమిషన్‌కు సుప్రీం కీలక ఆదేశాలు
• ఈవీఎంలలో ఎన్నికల గుర్తులను లోడ్‌ చేశాక ఆ యూనిట్‌ను సీల్‌ చేయాలి. అనంతరం వీటిని కంటైనర్లలో భద్రంగా పెట్టాలి.
• ఫలితాలు వెలువడిన కనీసం 45 రోజుల వరకు ఈవీఎంలతో పాటు, వీవీప్యాట్లను స్ట్రాంగ్‌ రూమ్‌లలో భద్రపర్చాలి.
• ఎన్నికల్లో రెండు, మూడు స్థానాల్లో నిలిచిన అభ్యర్థులు ఈవీఎంలపై అనుమానాలు వ్యక్తం చేస్తే, వాటిని తనిఖీ చేసుకోవచ్చు.
• ఈవీఎంలలోని మైక్రోకంట్రోలర్‌లో బర్న్‌ చేసిన మెమొరీని ఈవీఎం తయారీదారులైన ఇంజినీర్ల సాయంతో అభ్యర్థులు ఈ తనిఖీలు నిర్వహించుకోవచ్చు.
• కంట్రోల్‌ యూనిట్‌లోని 5 శాతం ఈవీఎంలను, వీవీప్యాట్లను సరిపోల్చుకొని ఈ విధంగా తనిఖీ చేయించుకోవచ్చు.
• ఇందుకుగానూ ఫలితాలు వెలువడిన ఏడు రోజుల్లోగా ఫీజు చెల్లించి ఫిర్యాదుదారులు రాతపూర్వకంగా వినతి ఇవ్వాల్సి ఉంటుంది.
• ఫిర్యాదుదారే దీనికి అయ్యే ఖర్చును భరించాలి.
• ఒకవేళ ఈవీఎంలు ట్యాంపర్‌ అయినట్టు ఈ తనిఖీల్లో తేలితే.. అభ్యర్థులు చెల్లించిన ఫీజును తిరిగి ఇచ్చేయాలి.

కాంగ్రెస్‌ క్షమాపణ చెప్పాలి: మోదీ

సుప్రీంకోర్టు తీర్పుపై ప్రధాని నరేంద్ర మోదీ స్పందించారు. కాంగ్రెస్‌ నేతృత్వంలోని విపక్షానికి ఇది చెంపపెట్టు అని వ్యాఖ్యానించారు. ఈవీఎంలపై అపనమ్మకాన్ని సృష్టించినందుకు క్షమా పణ లు చెప్పాలని డిమాండ్‌ చేశారు.