కిసాన్‌ క్రెడిట్‌ కార్డు పరిమితి ఇక 5 లక్షలు

కేంద్ర బడ్జెట్‌లో వ్యవసాయ రంగానికి సంబంధించి కీలక ప్రకటనలు వెలువడ్డాయి. దేశంలో వృద్ధికి వ్యవసాయమే మొదటి చోదకశక్తి అని పేర్కొన్న కేంద్ర ఆర్థిక మంత్రి నిర్మలా సీతారామన్‌.. బడ్జెట్‌లో వ్యవసాయానికి ప్రాధాన్యం ఇచ్చినట్టు తెలిపారు. ఇప్పటివరకు రూ.3 లక్షలుగా ఉన్న కిసాన్‌ క్రెడిట్‌ కార్డు(కేసీసీ) రుణ పరిమితిని రూ.5 లక్షలకు పెంచుతున్నట్టు ప్రకటించారు.

• కిసాన్‌ క్రెడిట్‌ కార్డు పరిమితి ఇక 5 లక్షలు
• అన్ని జిల్లాల్లో డే కేర్‌ క్యాన్సర్‌ సెంటర్లు
• కోటి మంది గిగ్‌ వర్కర్లకు హెల్త్‌కేర్‌ ప్లాన్‌
• సంస్కరణలు అమలు చేస్తే రాష్ర్టాలకు రుణం
• బీహార్‌కు పెద్దపీట.. ఏపీకి వరాల జల్లు
• బీమా రంగంలో 100 శాతం ఎఫ్‌డీఐలు
• డిజిన్వెస్ట్‌మెంట్‌ లక్ష్యం 47 వేల కోట్లు!
• వచ్చే వారం కొత్త ఆదాయపన్ను బిల్లు
• వ్యవసాయానికి ఆరు పథకాలు అమలు
• బడ్జెట్‌లో ప్రకటించిన కేంద్ర ప్రభుత్వం
• వంద జిల్లాల్లో ధన్‌-ధాన్య కృషి యోజన

న్యూఢిల్లీ, ఫిబ్రవరి 1: కేంద్ర బడ్జెట్‌లో వ్యవసాయ రంగానికి సంబంధించి కీలక ప్రకటనలు వెలువడ్డాయి. దేశంలో వృద్ధికి వ్యవసాయమే మొదటి చోదకశక్తి అని పేర్కొన్న కేంద్ర ఆర్థిక మంత్రి నిర్మలా సీతారామన్‌.. బడ్జెట్‌లో వ్యవసాయానికి ప్రాధాన్యం ఇచ్చినట్టు తెలిపారు. ఇప్పటివరకు రూ.3 లక్షలుగా ఉన్న కిసాన్‌ క్రెడిట్‌ కార్డు(కేసీసీ) రుణ పరిమితిని రూ.5 లక్షలకు పెంచుతున్నట్టు ప్రకటించారు.

• వ్యవసాయ ఉత్పాదకత తక్కువగా ఉన్న, సగటు కన్నా తక్కువ రుణ పరామితుల ఉన్న వంద వ్యవసాయ జిల్లాల్లో వ్యవసాయాన్ని ప్రోత్సహించేందుకు ప్రధానమంత్రి ధన్‌-ధాన్య కృషి యోజన అనే కొత్త పథకాన్ని ప్రారంభించనున్నట్టు చెప్పారు. రాష్ట్ర ప్రభుత్వాల భాగస్వామ్యంతో చేపట్టనున్న ఈ పథకం ద్వారా 1.7 కోట్ల మంది రైతులకు ప్రయోజనం కలుగుతుందని, వ్యవసాయ ఉత్పాదకత పెరుగుతుందని, పంట వైవిధ్యం పెరుగుతుందని తెలిపారు.
• గ్రామీణ ప్రాంతాల్లో నిరుద్యోగ సమస్యను, వలసలను తగ్గించేందుకు కేంద్రం ‘రూరల్‌ ప్రాస్పెరిటీ అండ్‌ రిసైలియెన్స్‌’ అనే కార్యక్రమాన్ని చేపట్టనున్నది. గ్రామీణ మహిళలు, యువ రైతులు, గ్రామీణ యువత, చిన్న, సన్నకారు రైతులు, భూమి లేని కుటుంబాలకు ఉపాధి అవకాశాలు కల్పించడమే ఈ కార్యక్రమం లక్ష్యం.
• కంది, మినప, ఎర్ర కందిపప్పు దినుసుల ఉత్పత్తిలో దేశం స్వయం సమృద్ధి సాధించేందుకు కేంద్రం ఆరేండ్ల పాటు ప్రత్యేక కార్యక్రమాన్ని చేపట్టనున్నది. ఒప్పందం చేసుకున్న రైతుల నుంచి నాఫెడ్‌, ఎన్‌సీసీఎఫ్‌ నాలుగేండ్ల పాటు ఈ పప్పు దినుసులను కొనుగోలు చేయనున్నాయి.
• దేశంలో టెక్స్‌టైల్‌ రంగానికి మద్దతుగా పత్తి ఉత్పత్తిని పెంచడానికి, పొడవైన పత్తి రకాలను ప్రోత్సహించేందుకు ఐదేండ్ల పాటు ప్రత్యేక కార్యక్రమాన్ని చేపట్టనుంది.
• మఖానా(తామర గింజలు) ఉత్పత్తి ప్రధానంగా జరిగే బీహార్‌లో ఉత్పత్తి, ప్రాసెసింగ్‌, మార్కెటింగ్‌ను ప్రోత్సహించేందుకు ప్రత్యేక మఖానా బోర్డును కేంద్రం ఏర్పాటు చేయనుంది.
• అండమాన్‌ అండ్‌ నికోబార్‌, లక్ష్యద్వీప్‌పై ప్రధాన దృష్టిలో దేశంలో మత్య్స ఉత్పత్తిని సుస్థిరపర్చడానికి కేంద్రం కొత్త కార్యాచరణను రూపొందించనుంది.
• అస్సాంలోని నమ్రూప్‌లో 12.7 లక్షల టన్నుల వార్షిక సామర్థ్యంలో కొత్త యూరియా ఉత్పత్తి కేంద్రాన్ని ప్రభుత్వం నిర్మించనుంది.
• కూరగాయలు, పండ్లు, చిరుధాన్యాల ఉత్పత్తి, సరఫరా వ్యవస్థను సమర్థవంతం చేసేందుకు కేంద్రం కొత్త కార్యక్రమాన్ని చేపట్టింది.

సబ్సిడీలకు స్వల్పంగా పెరిగిన కేటాయింపులు

ఆహార, ఎరువుల సబ్సిడీలకు కేటాయింపులను కేంద్ర ప్రభుత్వం స్వల్పంగా పెంచింది. 2025-26 ఆర్థిక సంవత్సరానికి గానూ ఈ సబ్సిడీలకు రూ.3.71 లక్షల కోట్లు కేటాయిస్తున్నట్టు కేంద్ర బడ్జెట్‌లో ఆర్థిక మంత్రి నిర్మలా సీతారామన్‌ ప్రకటించారు.

ప్రస్తుత ఆర్థిక సంవత్సరం కంటే ఈ కేటాయింపులు 0.70 శాతం అధికం. వచ్చే ఆర్థిక సంవత్సర ఆహార సబ్సిడీ కోసం బడ్జెట్‌లో రూ.2,03,420 కోట్లు కేటాయించారు. 2024-25 సవరించిన అంచనా రూ.1,97,420 కోట్ల కంటే ఇది స్వల్పంగా అధికం. వచ్చే ఏడాది ఎరువుల సబ్సిడీ కోసం రూ.1.67 లక్షల కోట్లు కేటాయించారు. ప్రస్తుత ఆర్థిక సంవత్సరంలో సవరించిన అంచనా 1.71 లక్షల కోట్ల కంటే ఇది కొంత తక్కువ.