తదుపరి సీజేఐగా జస్టిస్‌ సూర్యకాంత్‌!

53వ భారత ప్రధాన న్యాయమూర్తి (సీజేఐ) నియామక ప్రక్రియను కేంద్ర ప్రభుత్వం గురువారం ప్రారంభించింది. ప్రస్తుత సీజేఐ జస్టిస్‌ బీఆర్‌ గవాయ్‌ వచ్చే నెల 23న పదవీ విరమణ చేయనుండటంతో ఆయన తర్వాత సీనియర్‌ మోస్ట్‌ న్యాయమూర్తి జస్టిస్‌ సూర్యకాంత్‌ ఆ పదవిలో నియమితులయ్యే అవకాశం ఉంది.

• నియామక ప్రక్రియ ప్రారంభం
• వచ్చే నెల 23న జస్టిస్‌ గవాయ్‌ పదవీ విరమణ

న్యూఢిల్లీ: 53వ భారత ప్రధాన న్యాయమూర్తి (సీజేఐ) నియామక ప్రక్రియను కేంద్ర ప్రభుత్వం గురువారం ప్రారంభించింది. ప్రస్తుత సీజేఐ జస్టిస్‌ బీఆర్‌ గవాయ్‌ వచ్చే నెల 23న పదవీ విరమణ చేయనుండటంతో ఆయన తర్వాత సీనియర్‌ మోస్ట్‌ న్యాయమూర్తి జస్టిస్‌ సూర్యకాంత్‌ ఆ పదవిలో నియమితులయ్యే అవకాశం ఉంది. సంప్రదాయం ప్రకారం, తదుపరి సీజేఐ పేరును సిఫారసు చేయాలని పదవీ విరమణ చేయబోతున్న సీజేఐని కేంద్ర న్యాయ శాఖ మంత్రి కోరుతారు.

ప్రస్తుత సీజేఐ పదవీ విరమణ తేదీకి ఓ నెల ముందు నుంచి ఈ ప్రక్రియ ప్రారంభమవుతుంది. ఈ మేరకు కేంద్ర ప్రభుత్వం నుంచి ఓ లేఖ జస్టిస్‌ గవాయ్‌కి శుక్రవారం నాటికి చేరే అవకాశం ఉంది. సీజేఐ పదవీ విరమణ వయసు 65 సంవత్సరాలు. జస్టిస్‌ సూర్యకాంత్‌ సీజేఐగా నియమితులైతే, వచ్చే నెల 24న బాధ్యతలు చేపడతారు. 2027 ఫిబ్రవరి 9 వరకు, సుమారు 15 నెలలపాటు ఆ పదవిలో కొనసాగుతారు.