సాగు సంక్షోభం.. రుణ ఉచ్చులో రైతు!

దేశంలో వ్యవసాయ రంగం సంక్షోభంలో చిక్కుకున్నది. ఈసారి నైరుతి రుతుపవనాలు బలహీనంగా ఉండటం, ఎల్‌ నినో కోరలు చాచడంతో అన్నదాతలు కుదేలయ్యారు. దీంతో రుణ ఉచ్చు నుంచి బయటపడే మార్గాలు కనిపించడం లేదు. ఈ నేపథ్యంలో 2028 మార్చి నాటికి షెడ్యూల్డ్‌ వాణిజ్య బ్యాంకుల్లో వ్యవసాయ రంగానికి చెందిన స్థూల మొండి బకాయిలు(జీఎన్‌పీఏ) సుమారు 5.3 శాతం నుంచి 5.6 శాతానికి చేరుకోవచ్చని గురువారం విడుదలైన ఒక నివేదిక పేర్కొంది.

• 2028 మార్చి నాటికి పెరగనున్న వ్యవసాయ మొండి బకాయిలు
• లోటు వర్షపాతంతో బ్యాంకులకు తగ్గనున్న రైతు రుణ చెల్లింపులు
• కేర్‌ ఎడ్జ్‌ రేటింగ్స్‌ నివేదిక అంచనా

న్యూఢిల్లీ, అక్టోబర్‌ 22: దేశంలో వ్యవసాయ రంగం సంక్షోభంలో చిక్కుకున్నది. ఈసారి నైరుతి రుతుపవనాలు బలహీనంగా ఉండటం, ఎల్‌ నినో కోరలు చాచడంతో అన్నదాతలు కుదేలయ్యారు. దీంతో రుణ ఉచ్చు నుంచి బయటపడే మార్గాలు కనిపించడం లేదు. ఈ నేపథ్యంలో 2028 మార్చి నాటికి షెడ్యూల్డ్‌ వాణిజ్య బ్యాంకుల్లో వ్యవసాయ రంగానికి చెందిన స్థూల మొండి బకాయిలు(జీఎన్‌పీఏ) సుమారు 5.3 శాతం నుంచి 5.6 శాతానికి చేరుకోవచ్చని గురువారం విడుదలైన ఒక నివేదిక పేర్కొంది. కేర్‌ ఎడ్జ్‌ రేటింగ్స్‌ నివేదిక ప్రకారం 2026 జూన్‌ నాటికి వ్యవసాయ జీఎన్‌పీఏ నిష్పత్తి 5.11 శాతంగా ఉంది.

షెడ్యూల్డ్‌ కామర్స్‌ బ్యాంకుల(ఎస్‌సీబీ) రుణాలలో వ్యవసాయ రంగం వాటా 12.9 శాతంగా ఉండగా మొత్తం ఎస్‌సీబీ జీఎన్‌పీఏలలో దాని వాటా 37.5 శాతంగా ఉంది. 2026 జూన్‌ నాటికి రూ.1.41 లక్షల కోట్లుగా ఉన్న వ్యవసాయ రంగ స్థూల నిరర్థక ఆస్తులు(జీఎన్‌పీఏ) 2027 మార్చి నాటికి రూ.1.47 లక్షల కోట్ల నుంచి రూ.1.53 లక్షల కోట్లకు, అలాగే 2028 మార్చి నాటికి రూ.1.9 లక్షల కోట్ల నుంచి రూ.2 లక్షల కోట్లకు పెరిగే అవకాశం ఉంది. రుతుపవనాల ప్రభావం 2027-28 ఆర్థిక సంవత్సరంలో(ఎఫ్‌వై28) బ్యాంకుల ఖాతాల్లో కనిపించే అవకాశం ఉంది. బలహీనమైన రుతుపవనాల కారణంగా 2028 మార్చి నాటికి వ్యవసాయ జీఎన్‌పీఏ నిష్పత్తికి 70 నుంచి 80 బేసిస్‌ పాయింట్లు అదనంగా చేరవచ్చు. 2026 నైరుతి రుతుపవనాల కాలంలో వర్షపాతం దీర్ఘకాలిక సగటులో 87 శాతానికి మాత్రమే పరిమితమైంది. ఈ వర్షపాత లోటు ప్రధానంగా బ్యాంకుల వ్యవసాయ రుణాల్లో అధిక వాటా కలిగిన రాష్ర్టాల్లోనే కేంద్రీకృతమై ఉంది.