న్యూఢిల్లీ : 2003లో సల్మాన్ ఖాన్ మూవీ తేరే నామ్లోని సూపర్ హిట్ సాంగ్స్ ఇప్పటికీ మారుమోగుతూనే ఉన్నాయి. ఈ సినిమాలోని పాటలు అప్పట్లో ఎంతో పాపులర్ అయ్యాయి. ఈ మూవీలోని పాటలను చెత్త సేకరించే వ్యక్తి శ్రావ్యంగా పాడుతున్న వీడియోను ఆ సినిమా డైరెక్టర్ సతీష్ కౌశిక్ సోషల్ మీడియాలో షేర్ చేశారు.
ఈ వీడియోను ఆన్లైన్లో షేర్ చేసినప్పటి నుంచి 34,000 మందికిపైగా వీక్షించారు. ఈ వైరల్ క్లిప్లో చెత్త ఏరుకునే వ్యక్తి వీధుల్లో క్యోం కిసీ కో సాంగ్ను పాడుతుండటం కనిపించింది. చేతిలో మైక్రోఫోన్తో పాత పాటను అతడు ఆలపించడం ఆకట్టుకుంటుంది.
What a public adulation of the song from Tere Naam even after 20 years . Proud of this film pic.twitter.com/TkLnKaQJWe
— satish kaushik (@satishkaushik2) February 8, 2023
తేరే నామ్లో సల్మాన్ ఖాన్, భూమికా చావ్లాపై చిత్రీకరించిన ఈ పాటను ఉదిత్ నారాయణ్ పాడారు. ఈ బాలీవుడ్ సాంగ్ను శ్రావ్యంగా ఆలపించిన వ్యక్తిపై నెటిజన్లు ప్రశంసల జల్లు కురిపించారు. 20 ఏండ్ల తర్వాత కూడా తేరేనామ్ పాటలపై ప్రజలు కనబరిచే ప్రేమ చూస్తుంటే ఈ సినిమా పట్ల గర్వంగా ఉందని పోస్ట్కు క్యాప్షన్ ఇచ్చారు.
సాన పెట్టని నైపుణ్యం ఇదని ఓ యూజర్ కామెంట్ చేయగా, భారత్లో నైపుణ్యాలకు కొదవ లేదని మరో యూజర్ రాసుకొచ్చారు. హెచ్ఆర్ మ్యూజిక్, ఉదిత్, అల్కాజీలకు ఇంతటి మధురమైన పాట అందించినందుకు థ్యాంక్స్ అని మరో యూజర్ కామెంట్ చేయగా అద్భుతమైన సాంగ్ను మరోసారి వినిపించారని, ఈ సినిమాను రీరిలీజ్ చేయాలని దర్శకుడిని మరో యూజర్ కోరారు.