విమానం రద్దయితే 10 వేలు

సాంకేతిక సమస్య అని, ఇంకేదో కారణం చెప్పి విమానాలు రద్దు చేసే సందర్భాలు కోకొల్లలు.

• బోర్డింగ్‌కు నిరాకరిస్తే 20 వేలు
• టికెట్స్‌ను తక్కువ క్లాస్‌కు మార్చినాపరిహారం చెల్లించాల్సిందే
• డీజీసీఏ నిబంధనలు.. త్వరలో అమల్లోకి

న్యూఢిల్లీ, డిసెంబర్‌ 23: సాంకేతిక సమస్య అని, ఇంకేదో కారణం చెప్పి విమానాలు రద్దు చేసే సందర్భాలు కోకొల్లలు. దీనివల్ల ప్రయాణికులు తీవ్ర ఇబ్బందులు ఎదుర్కొంటున్నారు. విమానయాన సంస్థలు ఇలా ఇష్టారీతిన విమానాలను రద్దు చేయటంపై డైరెక్టరేట్‌ జనరల్‌ ఆఫ్‌ సివిల్‌ ఏవియేషన్‌ (డీజీసీఏ)కు పెద్ద ఎత్తున ఫిర్యాదులు అందటంతో అప్రమత్తమైంది.

ప్రయాణికుల సౌకర్యార్థం కొత్తగా మార్గదర్శకాలు తీసుకురాబోతున్నది. విమానం రద్దు చేస్తే విమానయాన సంస్థలు రూ.10 వేల వరకు ప్రయాణికుడికి పరిహారం చెల్లించేలా నిబంధనలు తీసుకొస్తున్నది. అటు.. ఎక్కువ క్లాస్‌ టికెట్‌ బుక్‌ చేసుకొన్న ప్రయాణికుల సమ్మతి లేకుండా తక్కువ క్లాస్‌కు మార్చితే వారికి విమానయాన సంస్థలు పరిహారం చెల్లించేలా నిబంధన తేనున్నది.

మార్గదర్శకాలు ఇవీ:

• విమానం రద్దు చేస్తే సదరు సంస్థలు.. రెండు వారాల ముందుగానే ప్రయాణికులకు సమాచారం ఇచ్చి, వేరే విమానంలో సీటు కేటాయించాలి.
• 2 వారాల నుంచి 24 గంటలలోపు రద్దు చేస్తే ప్రయాణ సమయానికి రెండు గంటల్లోపు వేరే విమానం సిద్ధం చేయాలి. లేకపోతే టికెట్‌ రుసుము ప్రయాణికుడికి చెల్లించాలి.
• 24 గంటలలోపైతే.. టికెట్‌ రుసుముతో పాటు, పరిహారం చెల్లించాలి. 2 గంటల కంటే ఎక్కువ సమయమైతే అత్యధికంగా (వన్‌ వే ఫేర్‌ + ఇంధన ఖర్చు) రూ.10 వేలు, 1-2 గంటల మధ్య అయితే అత్యధికంగా రూ.7,500, 1 గంటలోపైతే అత్యధికంగా రూ.5 వేలు చెల్లించాలి.
• బుకింగ్‌ కన్ఫర్మ్‌ అయ్యి, బోర్డింగ్‌కు అనుమతించకపోతే ప్రయాణ సమయానికి గంటలోపు వేరే విమానం సిద్ధంగా ఉంచాలి.
• 24 గంటలలోపు వేరే విమానాన్ని సిద్ధం చేయాల్సి వస్తే అత్యధికంగా రూ.10 వేలు ప్రయాణికుడికి విమాన సంస్థలు చెల్లించాలి.
• 24 గంటలు దాటితే అత్యధికంగా రూ.20 వేలు చెల్లించాలి.
• తక్కువ క్లాస్‌ టికెట్‌ కేటాయిస్తే ప్రయాణికుడికి టికెట్‌ చార్జీలు, ట్యాక్స్‌తో సహా చెల్లించాలి. తదుపరి అందుబాటులో ఉన్న క్లాసులో విమాన సంస్థ ఉచిత ప్రయాణం కల్పించాలి.