Manipur | మణిపూర్‌ సీఎం బీరెన్ సింగ్‌ రాజీనామాపై హైడ్రామా.. సోషల్‌మీడియాలో చించేసిన లేఖ వైరల్‌

Manipur | మణిపూర్‌ సీఎం బీరెన్‌ సింగ్‌ రాజీనామాపై శుక్రవారం హైడ్రామా చోటు చేసుకుంది. రాష్ట్రంలో కొద్దిరోజులుగా ఏర్పడిన ఉద్రిక్త పరిస్థితుల నేపథ్యంలో శాంతిభద్రతల వైఫల్యానికి బాధ్యత వహిస్తూ బీరెన్‌ సింగ్‌ సీఎం పదవికి రాజీనామా చేస్తారని ఉదయం నుంచి ప్రచారం జరిగింది.

Manipur | మణిపూర్‌ సీఎం బీరెన్‌ సింగ్‌ రాజీనామాపై శుక్రవారం హైడ్రామా చోటు చేసుకుంది. రాష్ట్రంలో కొద్దిరోజులుగా ఏర్పడిన ఉద్రిక్త పరిస్థితుల నేపథ్యంలో శాంతిభద్రతల వైఫల్యానికి బాధ్యత వహిస్తూ బీరెన్‌ సింగ్‌ సీఎం పదవికి రాజీనామా చేస్తారని ఉదయం నుంచి ప్రచారం జరిగింది. కానీ రాజీనామా నిర్ణయంపై బీరెన్‌ సింగ్ వెనక్కి తగ్గారు. ప్రస్తుతం ఉన్న క్లిష్ట పరిస్థితుల దృష్ట్యా సీఎం పదవికి రాజీనామా చేయబోవడం లేదని ట్విట్టర్‌ ద్వారా క్లారిటీ ఇచ్చారు.

At this crucial juncture, I wish to clarify that I will not be resigning from the post of Chief Minister.

— N.Biren Singh (@NBirenSingh) June 30, 2023

సీఎం పదవికి బీరెన్‌ సింగ్‌ రాజీనామా చేస్తారని ఉదయం నుంచి వార్తలు వచ్చాయి. దీంతో ఆయన మద్దతుదారులు పెద్ద ఎత్తున ఇంఫాల్‌లోని సీఎం నివాసానికి చేరుకున్నారు. తన నిర్ణయం మార్చుకోవాలని పెద్ద ఎత్తున నినాదాలు చేశారు. తన నివాసం నుంచి కాన్వాయ్‌లో బయటకు వచ్చిన బీరెన్‌ సింగ్‌ను మహిళా కార్యకర్తలు అడ్డుకున్నారు. దీంతో ఆయన తిరిగి నివాసం లోపలికి వెళ్లారు. ఆ తర్వాత కొద్దిసేపటికే తాను రాజీనామా చేయబోవడం లేదని ట్విట్టర్‌ ద్వారా స్పష్టం చేశారు. ఈ క్రమంలోనే చించేసిన రాజీనామా లేఖ ఒకటి సోషల్‌ మీడియాలో వైరల్‌గా మారింది. తన నిర్ణయాన్ని మార్చుకోవాలని రిక్వెస్ట్‌ చేసిన మహిళా మద్దతుదారులే బీరెన్‌ సింగ్‌ చేతుల్లో నుంచి రాజీనామా లేఖను తీసుకుని చించేసినట్లు తెలుస్తోంది.

మైతేయ్‌, కుకీల మధ్య రిజర్వేషన్ల విషయంలో ఏర్పడిన వివాదం చినికి చినికి గాలివానలా మారింది. మే 3వ తేదీన జరిగిన గిరిజన సంఘీభావ ర్యాలీ హింసాత్మకంగా మారడంతో రాష్ట్రంలో ఉద్రిక్త పరిస్థితులు నెలకొన్నాయి. దాదాపు 50 రోజులుగా జరుగుతున్న ఈ అల్లర్లలో 100 మందికిపైగా ప్రాణాలు కోల్పోయినా ఇంకా ఈ గొడవలు సద్దుమణగలేదు.