Rahul Gandhi | చెత్త అర్బన్‌ ప్లానింగ్‌కు ప్రజలు భారీ మూల్యం చెల్లిస్తున్నారు : రాహుల్‌ గాంధీ

Rahul Gandhi | ఢిల్లీలోని ఓల్డ్‌ రాజేంద్రనగర్‌లోని కోచింగ్‌ ఇన్‌స్టిట్యూట్‌లో జరిగిన ప్రమాదంపై ప్రతిపక్ష నేత రాహుల్‌ గాంధీ విరుచుకుపడ్డారు. బేస్‌మెంట్‌లో నీటి ఎద్దడి కారణంగా ముగ్గురు విద్యార్థులు మృతికి సంతాపం తెలిపారు. పేలవమైన టౌన్‌ ప్లానింగ్‌, ఇన్‌స్టిట్యూట్ల బాధ్యతారాహిత్యానికి ప్రజలు మూల్యం చెల్లిస్తున్నారన్నారు. 

Rahul Gandhi | ఢిల్లీలోని ఓల్డ్‌ రాజేంద్రనగర్‌లోని కోచింగ్‌ ఇన్‌స్టిట్యూట్‌లో జరిగిన ప్రమాదంపై ప్రతిపక్ష నేత రాహుల్‌ గాంధీ విరుచుకుపడ్డారు. బేస్‌మెంట్‌లో నీటి ఎద్దడి కారణంగా ముగ్గురు విద్యార్థులు మృతికి సంతాపం తెలిపారు. పేలవమైన టౌన్‌ ప్లానింగ్‌, ఇన్‌స్టిట్యూట్ల బాధ్యతారాహిత్యానికి ప్రజలు మూల్యం చెల్లిస్తున్నారన్నారు. ఢిల్లీలోని ఓ భవనంలోని బేస్‌మెంట్‌లో నీరు చేరి పోటీ పరీక్షలకు సిద్ధమవుతున్న విద్యార్థులు మృతి చెందడం చాలా దురదృష్టకరమని రాహుల్ గాంధీ ట్వీట్‌లో పేర్కొన్నారు. గతంలో వర్షాలకు విద్యుదాఘాతంతో ఓ విద్యార్థి మృతి చెందిన విషయం తెలిసిందే. మృతుల కుటుంబాలకు ఆయన సంతాపం తెలిపారు. మౌలిక సదుపాయాల లేమి వ్యవస్థ వైఫల్యమేనన్నారు. బాధ్యతారాహిత్యానికి ప్రతి స్థాయిలో జనం ప్రాణాలను కోల్పోతున్నారన్నారు. సురక్షితమైన, సౌకర్యవంతమైన జీవితం ప్రతి పౌరుడి హక్కు అని రాహుల్‌ పేర్కొన్నారు.

వారు సురక్షితంగా జీవించే వాతావరణం కల్పించాల్సిన బాధ్యత ప్రభుత్వంపై ఉందన్నారు. కోచింగ్‌ సెంటర్‌లో జరిగిన ఘటనపై కాంగ్రెస్‌ నేత పవన్‌ ఖేరా ప్రభుత్వం, ఎంసీడీపైనా ప్రశ్నలు సంధించారు. ఇది ప్రకృతి వైపరీత్యం కాదని.. మానవ నిర్మిత విషాదమన్నారు. బేస్‌మెంట్‌లో కోచింగ్ సెంటర్ ఎలా నడుస్తోంది? వారికి లైసెన్స్ ఉందా? ఈ ప్రశ్నలకు మాకు సమాధానాలు లేవన్నారు. ఒకరినొకరు ప్రశ్నించుకోవడం, ఆరోపణలు చేసుకోవడం చాలా తేలిక అని.. దాంతో సామాన్యులు ఇబ్బందులు పడుతున్నారు. కోచింగ్ సెంటర్‌లోని బేస్‌మెంట్‌లో నీరు నిండిపోవడంతో ఒక విద్యార్థి, ఇద్దరు విద్యార్థినులు మృతి చెందిన విషయం తెలిసిందే. మృతులను శ్రేయా యాదవ్, తాన్యా సోని, నవీన్ డెల్విన్‌గా గుర్తించారు. ఘటన నేపథ్యంలో కోచింగ్ సెంటర్ యజమాని, కోఆర్డినేటర్‌ను పోలీసులు అదుపులోకి తీసుకున్నారు. పోలీసులు వారిద్దరినీ విచారిస్తున్నారు.