NDA | ఏదీ ఆ దూకుడు?.. ఎన్డీఏ 3.0 వంద రోజుల పాలనలో కనిపించని మెరుపులు!

ప్రధాని మోదీ నేతృత్వంలోని ఎన్డీఏ ప్రభుత్వానికి సోమవారానికి వంద రోజులు పూర్తయ్యాయి. గడిచిన పదేండ్లలో కనిపించిన దూకుడు ఇప్పటి ఎన్డీఏ 3.0 సర్కారులో కనిపించట్లేదన్నది కాదనలేని సత్యం. ఇటీవలి లోక్‌సభ ఎన్నికల్లో ఊహించని స్థాయిలో సీట్లు తగ్గిపోయిన ప్రభావమో, మిత్రపక్షాలపై ఆధారపడి ప్రభుత్వాన్ని నడుపుతుండటం వల్లనో కానీ ఏదైనా నిర్ణయంపై వ్యతిరేకత వస్తే ఎన్డీఏ ప్రభుత్వం పీఛేముడ్‌ అంటున్నది.

• ఎన్డీఏ సంకీర్ణ సర్కారుకు వంద రోజులు

NDA | (స్పెషల్‌ టాస్క్‌ బ్యూరో) హైదరాబాద్‌, సెప్టెంబర్‌ 16: నమస్తే తెలంగాణ: ప్రధాని మోదీ నేతృత్వంలోని ఎన్డీఏ ప్రభుత్వానికి సోమవారానికి వంద రోజులు పూర్తయ్యాయి. గడిచిన పదేండ్లలో కనిపించిన దూకుడు ఇప్పటి ఎన్డీఏ 3.0 సర్కారులో కనిపించట్లేదన్నది కాదనలేని సత్యం. ఇటీవలి లోక్‌సభ ఎన్నికల్లో ఊహించని స్థాయిలో సీట్లు తగ్గిపోయిన ప్రభావమో, మిత్రపక్షాలపై ఆధారపడి ప్రభుత్వాన్ని నడుపుతుండటం వల్లనో కానీ ఏదైనా నిర్ణయంపై వ్యతిరేకత వస్తే ఎన్డీఏ ప్రభుత్వం పీఛేముడ్‌ అంటున్నది. ధరల నియంత్రణ, ఉద్యోగాల కల్పన, బడ్జెట్‌ విషయంలోనూ సర్కారు తన మార్క్‌ను చూపించలేకపోయింది. వెరసి ఎన్డీఏ 3.0 వంద రోజుల పాలనలో ఎలాంటి మెరుపులు కనిపించకపోయినా.. ప్రభుత్వాన్ని కాపాడుకోవాలన్న భయం మాత్రం కనిపిస్తున్నదన్న అభిప్రాయాలు సర్వత్రా వ్యక్తమవుతున్నాయి.

మిత్రులను సంతోషపెట్టాలని..

ఎక్కడ అసమ్మతి వచ్చినా మొగ్గలోనే తుంచేయడం లేదా వ్యతిరేకించిన వారిని పక్కనపెట్టడమే పాలసీగా ఇప్పటివరకూ అనుసరించిన ప్రధాని మోదీ తన వైఖరిని మార్చుకొన్నట్టు కనిపిస్తున్నది. జమ్ముకశ్మీర్‌ అసెంబ్లీ ఎన్నికల కోసం విడుదల చేసిన అభ్యర్థుల తొలి జాబితాను వెనక్కి తీసుకోవడం ఇందులో భాగమే. అంతేకాదు. గడిచిన పదేండ్లలో సొంతమెజార్టీ ఉండటంతో మిత్రపక్షాలను లెక్కచేయని ప్రధాని మోదీ.. ఇప్పటి సంకీర్ణ సర్కారుకు కీలకంగా మారిన బీహార్‌, ఏపీకి బడ్జెట్‌లో పెద్దయెత్తున నిధులను మంజూరు చేయడం అందర్నీ ఆశ్చర్యపరిచింది. ఎన్డీఏ మిత్రులను సంతోషపెట్టి, సంకీర్ణ సర్కారును కాపాడుకోవడానికే మోదీ ఇలా చేశారని విశ్లేషకులు చెప్తున్నారు.

పాలసీల్లో యూటర్న్‌

• కేంద్ర ప్రభుత్వం ఇటీవల ప్రసార సేవల (నియంత్రణ) చట్టం చేయాలనుకుంది. ముసాయిదా రూపొందించి స్టేక్‌హోల్డర్లకు పంపించింది. అయితే, ఈ బిల్లు స్వతంత్ర జర్నలిస్టుల గొంతునొక్కేలా ఉందనే విమర్శలు వచ్చాయి. దీంతో కేంద్రం ఈ ముసాయిదా బిల్లును వెనక్కు తీసుకుంటున్నట్టు ప్రకటించింది.
• వక్ఫ్‌(సవరణ) బిల్లు విషయంలోనూ ఇలానే జరిగింది. వక్ఫ్‌ బోర్డు వ్యవస్థలో కీలక మార్పులు చేస్తూ మోదీ ప్రభుత్వం చట్టం చేయాలనుకుంది. అయితే, వక్ఫ్‌ బోర్డులో ముస్లిమేతరులను చేర్చేందుకు కేంద్రం ప్రయత్నిస్తున్నదని పెద్ద ఎత్తున విమర్శలు వచ్చాయి. అనేక పార్టీలు ఈ బిల్లును వ్యతిరేకించాయి. దీంతో బిల్లును జాయింట్‌ పార్లమెంటరీ ప్యానెల్‌ పరిశీలనకు ప్రభుత్వం పంపించాల్సి వచ్చింది.
• స్థిరాస్తుల అమ్మకాలపై వచ్చే లాభాలపై విధించే మూలధన లాభాల పన్నులో ఇండెక్సేషన్‌ ప్రయోజనం విషయంలోనూ వ్యతిరేకత రావడంతో కేంద్రం వెనక్కు తగ్గింది. ఇండెక్సేషన్‌ ప్రయోజనం లేని కొత్త విధానం, పాత పన్ను విధానంలో ఏదైనా ఎంచుకునే వెసులుబాటును ప్రజలకు కల్పించింది.
• ల్యాటరల్‌ ఎంట్రీ విషయంలోనూ ఇదే జరిగింది. 2018లోనూ ఈ విధానంలో కేంద్రం పలు నియామకాలు చేపట్టింది. అప్పుడు విమర్శలు వచ్చినా పట్టించుకోలేదు. ఇప్పుడు మాత్రం చిరాగ్‌ పాశ్వాన్‌ వంటి ఎన్డీఏలోని నేతలే వ్యతిరేకించడంతో వెనక్కు తగ్గక తప్పలేదు.