ఫ్లిప్‌కార్ట్‌, జొమాటో వ్యవస్థాపకుల నుంచి, 270 మంది ఐఏఎస్‌ల దాకా..!

ఇండియన్‌ ఇన్‌స్టిట్యూట్‌ ఆఫ్‌ టెక్నాలజీ, ఢిల్లీ(ఐఐటీ-ఢిల్లీ)కి చెందిన దాదాపు 10,000 మంది పూర్వ విద్యార్థులు బ్యాంకింగ్‌, ఇంజినీరింగ్‌ రంగాల్లో నాయకత్వ స్థానాల్లో ఉన్నారు. ఫ్లిప్‌కార్ట్‌, జొమాటో వ్యవస్థాపకుల నుంచి ఐఏఎస్‌ అధికారుల వరకు ఐఐటీ-ఢిల్లీకి చెందిన పూర్వ విద్యార్థులు ఉన్నారు.

• ప్రపంచవ్యాప్తంగా విస్తరించిన ఐఐటీ-ఢిల్లీ పూర్వ విద్యార్థులు

న్యూఢిల్లీ, జనవరి 28 : ఇండియన్‌ ఇన్‌స్టిట్యూట్‌ ఆఫ్‌ టెక్నాలజీ, ఢిల్లీ(ఐఐటీ-ఢిల్లీ)కి చెందిన దాదాపు 10,000 మంది పూర్వ విద్యార్థులు బ్యాంకింగ్‌, ఇంజినీరింగ్‌ రంగాల్లో నాయకత్వ స్థానాల్లో ఉన్నారు. ఫ్లిప్‌కార్ట్‌, జొమాటో వ్యవస్థాపకుల నుంచి ఐఏఎస్‌ అధికారుల వరకు ఐఐటీ-ఢిల్లీకి చెందిన పూర్వ విద్యార్థులు ఉన్నారు. ఈ వివరాలను ఐఐటీ-ఢిల్లీ తన మొట్టమొదటి పూర్వ విద్యార్థుల నివేదికలో వెల్లడించింది. దేశంలోను, వెలుపల తన 65,000 పైచిలుకు పూర్వ విద్యార్థులు పారిశ్రామిక, ప్రభుత్వ, విద్యా రంగాల్లో నిర్వహిస్తున్న కీలక పాత్రకు సంబంధించిన వివరాలను సంస్థ తెలియచేసింది.

• 270 మంది ఐఏఎస్‌ అధికారులుసహా 650 మందికిపైగా పూర్వ విద్యార్థులు ప్రభుత్వ సంస్థల్లో సేవలందిస్తున్నారు.
• మేధోవలస పోకడలకు భిన్నంగా వీరిలో దాదాపు 70 శాతం మంది భారత్‌లోనే పనిచేస్తుండగా 1,000 మందికిపైగా పూర్వ విద్యార్థులు బడా కార్పొరేట్‌ కంపెనీల్లో కీలక పదవుల్లో ఉన్నారు.
• దాదాపు 40,000 మంది తమ పూర్వ విద్యార్థులు భారత్‌లో స్థిరపడగా 17,000 మంది అమెరికా, ఇతర దేశాల్లో నివసిస్తున్నారు.
• 2,500 మందికిపైగా పూర్వ విద్యార్థులు అంకుర కంపెనీల స్థాపకులుగా, సహ స్థాపకులుగా లేదా నాయకులుగా ఉన్నారు.
• ప్రముఖ విద్యా సంస్థల్లో ఫ్యాకల్టీగా 50 మందికిపైగా పనిచేస్తుండగా 270 మంది ఐఏఎస్‌ అధికారులుగా కొనసాగుతున్నారు.
• టెక్నాలజీ-ఐటీ సర్వీసులు, బ్యాంకింగ్‌-ఫైనాన్స్‌, తయారీ, ఇంజినీరింగ్‌ వంటి కీలక రంగాలతోపాటు కన్సల్టింగ్‌, ఇంధన, మౌలిక సదుపాయాలు, ప్రొఫెషనల్‌ సర్వీసులు వంటి రంగాల్లో తమ పూర్వ విద్యార్థులు కీలక బాధ్యతలు నిర్వహిస్తున్నట్లు సంస్థ తెలిపింది.