FASTag | 3 వేలు.. 200 ట్రిప్పులు.. రేపటి నుంచి అమల్లోకి ఫాస్టాగ్‌ వార్షిక పాస్‌

స్వాతంత్య్ర దినోత్సవం నుంచి దేశంలో ఫాస్టాగ్‌ టోల్‌ చెల్లింపు విధానంలో పెనుమార్పులు చోటుచేసుకోనున్నాయి.

FASTag | న్యూఢిల్లీ, ఆగస్టు 13: స్వాతంత్య్ర దినోత్సవం నుంచి దేశంలో ఫాస్టాగ్‌ టోల్‌ చెల్లింపు విధానంలో పెనుమార్పులు చోటుచేసుకోనున్నాయి. తరచూ ప్రయాణించే వారికి మరింత సులభ, చౌక హైవే ప్రయాణాన్ని కల్పించేందుకు కొత్తగా ఫాస్టాగ్‌ వార్షిక పాసును నేషనల్‌ హైవేస్‌ అథారిటీ ఆఫ్‌ ఇండియా(ఎన్‌హెచ్‌ఏఐ) ఆగస్టు 15 నుంచి ప్రవేశపెట్టనున్నది. ప్రైవేట్‌ కారు, జీపు, వ్యాను యజమానుల కోసం రూపొందించిన ఈ వార్షిక ప్రీపెయిడ్‌ పాసు పదేపదే రీచార్జింగ్‌ సమస్యను నివారించడంతోపాటు టోల్‌ ప్లాజాల వద్ద ట్రాఫిక్‌ రద్దీని తగ్గించగలదని ఎన్‌హెచ్‌ఏఐ భావిస్తోంది.

ఎవరికి వర్తిస్తుంది?

• ప్రైవేట్‌ కార్లు, జీపులు, వ్యాన్లకు మాత్రమే వర్తిస్తుంది.
• ఎన్‌హెచ్‌ఏఐ నిర్వహించే జాతీయ హైవేలు, ఎక్స్‌ప్రెస్‌వేలపైన టోల్‌ చార్జీలు చెల్లించేందుకు ఒకేసారి డబ్బు చెల్లించి ఫాస్టాగ్‌ వార్షిక పాసును తీసుకోవచ్చు.
• ఈ పథకం కింద వాహన యజమానులు ఒకేసారి రూ. 3,000 చెల్లించాలి. ఏడాదిపాటు ఎన్‌హెచ్‌ఏఐ నిర్దేశించిన జాతీయ రహదారులలో 200 వరకు టోల్‌ ప్లాజాలను దాటవచ్చు. ఒకవేళ గరిష్ఠ పరిమితి(200 టోల్‌ క్రాసింగ్‌లు) ఏడాదిలోపలే ముగిసిపోతే ఆటోమేటిక్‌గా సాధారణ విధానంలోకి ఫాస్టాగ్‌ మారిపోయి డబ్బు చెల్లించి టోల్‌ దాటవలసి ఉంటుంది.

ప్రయోజనం ఏంటి?

• పదేపదే ఆన్‌లైన్‌ రీచార్జీలు చేసుకునే సమస్య ఉండదు. టోల్‌ వద్ద వేగంగా క్లియరెన్స్‌ లభిస్తుంది. టోల్‌ ప్లాజాల వద్ద బారులు తీరాల్సిన అవసరం తప్పుతుంది.
• తరచూ ఒకే మార్గంలో ప్రయాణించే వాహన యజమానులు ఒకదానికొకటి సమీపంలో ఉండే టోల్‌ ప్లాజాల వద్ద వెయిటింగ్‌ సమస్యను ఎదుర్కొంటున్నారు. అటువంటి వారికి ఈ వార్షిక ఫాస్టాగ్‌ పాసు ప్రయోజనకరంగా ఉంటుంది.
• కొత్తగా ఫాస్టాగ్‌ కొనాల్సిన అవసరం లేకుండా ప్రస్తుతం వాహనంపై అతికించిన ఫాస్టాగ్‌తోనే ఇది అనుసంధానం అవుతుంది.

పాసు ఎలా కొనాలి?

• వార్షిక ఫాస్టాగ్‌ పాసు కొనేందుకు వాహనదారులు తమ వాహన నంబరు, ఫాస్టాగ్‌ ఐడీ ఉపయోగించి రాజ్‌మార్గ్‌ యాత్ర యాప్‌ లేదా ఎన్‌హెచ్‌ఏఐ/ఎంఓఆర్‌టీహెచ్‌ వెబ్‌సైట్‌లోకి లాగిన్‌ అవ్వాలి. తమ ఫాస్టాగ్‌ యాక్టివ్‌గా, సక్రమంగా ఇన్‌స్టాల్‌ అయి ఉందో లేదో ధ్రువీకరించుకోవాలి. యూపీఐ, డెబిట్‌ లేదా క్రెడిట్‌ కార్డు లేదా నెట్‌ బ్యాంకింగ్‌ ద్వారా ఆన్‌లైన్‌లో రూ. 3,000 చెల్లించాలి. ఆగస్టు 15న పాసు యాక్టివేట్‌ అవుతుంది. యూజర్లకు ఎస్‌ఎంఎస్‌ ద్వారా కన్ఫర్మేషన్‌ మెసేజ్‌ అందుతుంది.
• ఫాస్టాగ్‌ వార్షిక పాసు ఇతరులకు బదిలీ కాదు. రిజిస్టర్డ్‌ వాహనానికి మాత్రమే పనిచేస్తుంది. అంతేగాక డబ్బు వాపసు చేయబడదు, ఒకసారి కొనుగోలు చేస్తే మళ్లీ డబ్బు వాపసు వచ్చే అవకాశం ఉండదు. పాసు ఆటోమేటిక్‌గా రెన్యూ కాదు. దాని గడువు తీరిన తర్వాత మళ్లీ కొనుగోలు చేయాల్సి ఉంటుంది.

ఏ రూట్లలో పనిచేస్తుంది?

• ఎన్‌హెచ్‌ఏఐ లేదా రోడ్డు రవాణా, హైవేల మంత్రిత్వశాఖ నిర్వహించే నేషనల్‌ హైవేలు, ఎక్స్‌ప్రెస్‌వేలు, ఢిల్లీ-ముంబై ఎక్స్‌ప్రెస్‌వే, ముంబై-నాసిక్‌, ముంబై-సూరత్‌, ముంబై-రత్నగిరి మార్గాలలో మాత్రమే ఈ పాసు పనిచేస్తుంది.
• రాష్ట్ర ప్రభుత్వాలు లేదా మున్సిపల్‌ సంస్థలు నిర్వహించే రాష్ట్ర హైవేలు లేదా టోల్‌ రోడ్లపై ఈ పాసు చెల్లదు. దీన్ని బట్టి ముంబై-ఫుణె ఎక్స్‌ప్రెస్‌వే, సమృద్ధి మహామార్గ్‌, అటల్‌ సేతు, ఆగ్రా-లక్నో ఎక్స్‌ప్రెస్‌వే, బెంగళూరు-మైసూరు ఎక్స్‌ప్రెస్‌వే, అహ్మదాబాద్‌-వడోదర ఎక్స్‌ప్రెస్‌వే వంటి రోడ్లలో రెగ్యులర్‌ టోల్‌ చార్జీలు చెల్లించాల్సిందే.