Watch: సరదాగా కారు నడిపిన పిల్లలు.. తర్వాత ఏం జరిగిందంటే?

Children Drive SUV | ఇద్దరు పిల్లలు సరదాగా కారు డ్రైవ్‌ చేశారు. అయితే కారుపై నియంత్రణ కోల్పోయారు. దీంతో వీధుల్లో ప్రమాదకరంగా అది దూసుకెళ్లింది. ఒక బైకర్‌, కొందరు పిల్లలు తృటిలో ప్రమాదం నుంచి తప్పించుకున్నారు. పలు బైకులు ధ్వంసమయ్యాయి.

July 20, 2025 / 08:55 PM IST

Watch: సరదాగా కారు నడిపిన పిల్లలు.. తర్వాత ఏం జరిగిందంటే?

చండీగఢ్‌: ఇద్దరు పిల్లలు సరదాగా కారు డ్రైవ్‌ చేశారు. (Children Drive SUV) అయితే కారుపై నియంత్రణ కోల్పోయారు. దీంతో వీధుల్లో ప్రమాదకరంగా అది దూసుకెళ్లింది. ఒక బైకర్‌, కొందరు పిల్లలు తృటిలో ప్రమాదం నుంచి తప్పించుకున్నారు. పలు బైకులు ధ్వంసమయ్యాయి. ఈ వీడియో క్లిప్‌ సోషల్‌ మీడియాలో వైరల్‌ అయ్యింది. హర్యానాలో ఈ సంఘటన జరిగింది. జూలై 16న ఉదయం 8 గంటలకు ఎస్‌యూవీ కారు అదుపులేకుండా రోడ్డుపై దూసుకెళ్లింది. ఆ కారు తొలుత ప్రమాదకరంగా మలుపు తిరిగింది. బైక్‌పై వెళ్తున్న వ్యక్తి దగ్గర నుంచి దూసుకెళ్లింది. అయితే అతడు తృటిలో తప్పించుకున్నాడు.

కాగా, ఆ వీధిలోని పార్క్‌ చేసిన బైకులపైకి ఆ కారు దూసుకెళ్లింది. అక్కడున్న పిల్లలు ఇది చూసి భయంతో పరుగులు తీశారు. చివరకు కారు టైర్ల ముందు ఒక బైక్‌ పడింది. ఒక ఇంటి మెట్ల వద్ద అది అడ్డుపడటంతో చివరకు ఆ కారు ఆగింది. ఆ తర్వాత దాని నుంచి ఇద్దరు బాలురు కిందకు దిగారు. ఆ కారును పిల్లలు డ్రైవ్‌ చేసినట్లు తెలుసుకుని స్థానికులు షాక్‌ అయ్యారు. ఎవరికీ ఎలాంటి ప్రమాదం జరుగకపోవడంతో వారంతా ఊరట చెందారు. అయితే పలు బైకులు ధ్వంసమయ్యాయి.

మరోవైపు ఆ ప్రాంతంలోని సీసీటీవీలో రికార్డైన ఈ వీడియో క్లిప్‌ సోషల్‌ మీడియాలో వైరల్‌ అయ్యింది. దీంతో ఆ పిల్లల పేరెంట్స్‌పై నెటిజన్లు ఆగ్రహం వ్యక్తం చేశారు. కారు డ్రైవ్‌ చేసేందుకు బాలుడిని ఎలా అనుమతించారని కొందరు మండిపడ్డారు. ఒకవేళ ప్రాణనష్టం జరిగితే ఎవరు బాధ్యత వహిస్తారని ప్రశ్నించారు. కారు డ్రైవ్‌ చేసిన బాలుడి పేరెంట్స్‌పై చర్యలు తీసుకోవాలని డిమాండ్‌ చేశారు.