విద్వేషానికి చావు దెబ్బ

కర్ణాటక ఎన్నికల్లో అధికారంలో ఉన్న బీజేపీ చిత్తుగా ఓడింది. కమలం ఓటమిపై పలువురు అనేక కారణాలు వెల్లడిస్తున్నా, ప్రాథమికంగా ఓటర్లందరూ విద్వేషాన్ని రెచ్చగొట్టే పార్టీకి బుద్ధి చెప్పారన్నది సుస్పష్టం. మతం, కులం, దైవం ఇలా పలు అంశాల్లో విద్వేష వ్యాప్తికి తీవ్రంగా ప్రయత్నించిన బీజేపీని ఓటర్లు తేరుకోలేని విధంగా దెబ్బతీశారని రాజకీయ మేధావులు చెబుతున్నారు.

• ఇదే కన్నడ ప్రజల తీర్పు
• కమలం పార్టీకి దిమ్మదిరిగే షాక్‌ ఇచ్చిన ఓటర్లు
• ఉత్తరాది వ్యూహం ఇక్కడ పనిచేయదని నిరూపణ
• మోదీ, షా విద్వేష ప్రసంగాలపై ఈసీ ధృతరాష్ర్టుడి పాత్ర!

బెంగళూరు, మే 14: కర్ణాటక ఎన్నికల్లో అధికారంలో ఉన్న బీజేపీ చిత్తుగా ఓడింది. కమలం ఓటమిపై పలువురు అనేక కారణాలు వెల్లడిస్తున్నా, ప్రాథమికంగా ఓటర్లందరూ విద్వేషాన్ని రెచ్చగొట్టే పార్టీకి బుద్ధి చెప్పారన్నది సుస్పష్టం. మతం, కులం, దైవం ఇలా పలు అంశాల్లో విద్వేష వ్యాప్తికి తీవ్రంగా ప్రయత్నించిన బీజేపీని ఓటర్లు తేరుకోలేని విధంగా దెబ్బతీశారని రాజకీయ మేధావులు చెబుతున్నారు. గత ఎన్నికల్లో అతిపెద్ద పార్టీగా ఎన్నికల్లో గెలిచిన కమలం ఈ ఎన్నికల్లో ఓడిపోవడానికి గల కారణాలను ఇలా విశ్లేషించారు…

• అధికారంలోకి వస్తే భజరంగ్‌ దళ్‌ను నిషేధిస్తామని కాంగ్రెస్‌ చేసిన ప్రకటనను పట్టుకుని విద్వేషాన్ని రెచ్చగొట్టే ప్రయత్నాన్ని కమలనాథులు ముమ్మరం చేశారు. ప్రజల సంక్షేమ పథకాలు, సమస్యలను ప్రస్తావించకుండా హిందుత్వ సెంటిమెంట్‌ను రెచ్చగొట్టి ఓట్లు రాబట్టే వ్యూహం ఉత్తరాదిలో పనిచేసిందేమో గానీ దక్షిణాదిన బెడిసికొట్టింది. తాము సంక్షేమాన్ని కోరుకున్నామే తప్ప విద్వేషాన్ని, దైవం పేరిట మత రాజకీయాలను కాదని కన్నడ ఓటర్లు తమ తీర్పు ద్వారా చెప్పారు.
• విపక్షాలు అధికారంలో ఉన్న రాష్ర్టాలపై కేంద్రంలోని బీజేపీ సర్కారు.. సీబీఐ, ఈడీ, ఐటీ ద్వారా దాడులు చేసి వారిని బలహీనపర్చేందుకు నిత్యం ప్రయత్నాలు కొనసాగించడం అందరూ గమనించారు. దర్యాప్తు సంస్థల దుర్వినియోగం గురించి ఉన్నత న్యాయస్థానాల్లో సైతం కేసులు నడిచాయి. కర్ణాటక ఎన్నికలకు నోటిఫికేషన్‌ వెలువడి ప్రచారం కూడా చేస్తున్న సమయంలో వీటి ద్వారా విపక్ష నేతలపై దాడులు చేయించింది. తాజాగా సీబీఐ డైరెక్టర్‌గా నియమితులైన ప్రవీణ్‌ సూద్‌ ఎన్నికల్లో అధికార పార్టీ తొత్తుగా పని చేసి విపక్షాలను వేధించడంలో సత్తా చాటినందుకే ఆ పదవి బహుమతిగా వచ్చిందన్న విమర్శలు అప్పుడే ప్రారంభమయ్యాయి.
• సాధారణంగా ఎన్నికల సమయంలో విపక్షాలు కాని, అధికార పక్షం కానీ చేసే ఫిర్యాదులపై ఎన్నికల సంఘం స్పందించి చర్యలకు ఉపక్రమిస్తుంది. అయితే కర్ణాటక ఎన్నికల్లో విచిత్రంగా ఎన్నికల సంఘం ధృతరాష్ట్ర పాత్రను సమర్థంగా పోషించినట్టు విశ్లేషకులు చెప్తున్నారు. ఎన్నికల ప్రచారంలో ప్రధాని మోదీ, కేంద్ర హోం మంత్రి అమిత్‌ షా ఎన్నోసార్లు విద్వేష, వివాదాస్పద, మతపర అంశాలపై వ్యాఖ్యలు, విమర్శలు చేసినా, ఎన్నికల సంఘం పక్షపాతంగా వ్యవహరించిందని ఆరోపిస్తున్నారు. ఓటు వేసేటప్పుడు జై బజరంగ్‌ బలి నినాదం చేయాలని ప్రధాని మోదీ పిలుపునిచ్చినా.. కేరళ స్టోరీ వివాదం గురించి రెచ్చగొట్టే వ్యాఖ్యలు చేసినా, ముస్లింల రిజర్వేషన్ల గురించి ప్రస్తావించినా ఈసీకి కనిపించలేదు, వినిపించలేదు.
• ఎన్నికల బాండ్ల ద్వారా రూ.వేల కోట్ల నిధులను సేకరించిన బీజేపీ.. వాటిని ఎన్నికల్లో విచ్చలవిడిగా ఖర్చు చేసి అధికార దుర్వినియోగానికి పాల్పడినట్టు ఆరోపణలు ఉన్నాయి. ఇలా ఊరూపేరూ లేని బాండ్ల ద్వారా రాజకీయ పార్టీలు నిధులు సేకరించడాన్ని ప్రశ్నిస్తూ దాఖలైన కేసుల విచారణ సుప్రీం కోర్టులో సాగుతుండగానే వాటిని లెక్క చేయకుండా బీజేపీ నిధులు సేకరించింది.
• ప్రధాని హోదాలో మోదీ ఒక ప్రాంతంలో పర్యటిస్తే ఎన్నో కోట్లు ఖర్చవుతుంది. కర్ణాటక ఎన్నికల్లో మోదీ ఒక సామాన్య నేత తరహాలో రోజుల తరబడి ప్రచారం, రోడ్‌షోలు నిర్వహించారు. దీనికైన వేల కోట్ల ఖర్చు ప్రజాధనం కాదా? కానీ, వీటిపై కార్పొరేట్‌ మీడియా ఏనాడూ ప్రశ్నించలేదు.
• కాంగ్రెస్‌ అధికారంలోకి వస్తే అల్లర్లే జరుగుతాయి అని అమిత్‌ షా, మీ ఓటు వేసిన తర్వాత బజరంగ్‌ బలి అని నినదించాలన్న మోదీ పిలుపును ఓటర్లు లెక్క చేయలేదు.
• మణిపూర్‌లో రాజుకున్న రిజర్వేషన్ల చిచ్చు 60 మంది ప్రాణాలను బలితీసుకున్నా, 35 వేల మందికి పైగా నిరాశ్రయులైనా కేంద్రంలోని పెద్దలు ఏ మాత్రం చలించలేదు. జమ్ముకశ్మీర్‌లో ఐదుగురు ఆర్మీ జవాన్లు ఉగ్రవాదుల చేతిలో హతమైనా ఎన్నికలే ముఖ్యమన్నట్టు వీరు వ్యవహరించారు. లైంగిక వేధింపులపై బీజేపీ ఎంపీపై ఆందోళన చేస్తూ పలువురు రెజ్లర్లు నిరసన వ్యక్తం చేస్తున్నా తమకు సంబంధం లేదన్నట్టుగానే కమలం మొండివైఖరి అవలంబించింది. ఇవి ఓటర్లపై ప్రభావం చూపాయి.
• కర్ణాటకలో ప్రతి అభివృద్ధి పనికి 40 శాతం కమీషన్‌ తీసుకుంటున్నదన్న ఆరోపణలు బీజేపీని దెబ్బతీశాయి. అవినీతి, అక్రమాలను ప్రధాని మోదీ పెద్దగా వ్యతిరేకించరంటూ ఆ పార్టీకే చెందిన మాజీ గవర్నర్‌ సత్యపాల్‌ మాలిక్‌ చేసిన ఆరోపణలు సైతం గట్టి ప్రభావాన్ని చూపాయి. ఈ పరిణామాలు కర్ణాటక ప్రజలను ఆలోచింపజేశాయి.

స్పీకర్లందరూ ఇంటిదారే
కర్ణాటక అసెంబ్లీ ఎన్నికల ఫలితాల ద్వారా పలు ఆశ్చర్యకర విషయాలు వెలుగుచూశాయి. వాటిలో అసెంబ్లీలో గత ప్రభుత్వాలలో స్పీకర్లుగా వ్యవహరించిన వారెవరూ ఈ ఎన్నికల్లో గెలవకపోవటం. ప్రస్తుత అసెంబ్లీ స్పీకర్‌ విశ్వేశ్వర్‌ హెగ్డే కగేరి సహా మరో ముగ్గురు మాజీ స్పీకర్లు ఈ ఎన్నికల్లో పరాజయం పాలయ్యారు. ఆరుసార్లు ఎమ్మెల్యేగా చేసిన బీజేపీకి చెందిన కగేరి ఉత్తర కన్నడలోని సిర్సి నుంచి పోటీ చేసి ఓడిపోయారు. జేడీఎస్‌-కాంగ్రెస్‌ సంకీర్ణ ప్రభుత్వంలో 2018-19 మధ్య స్పీకర్‌గా ఉన్న కాంగ్రెస్‌ సీనియర్‌ నేత కేఆర్‌ రమేశ్‌ కుమార్‌, 2009-13 మధ్య బీజేపీ ప్రభుత్వంలో స్పీకర్‌గా చేసిన బీజేపీ నేత కేజీ బోపయ్య, మాజీ సీఎం, 2008-09 మధ్య యెడియూరప్ప ప్రభుత్వంలో స్పీకర్‌గా పనిచేసిన జగదీశ్‌ శెట్టర్‌ కూడా ఓటమి పాలయ్యారు. అలాగే స్పీకర్‌ కగేరి అందుబాటులో లేనప్పుడు సభా వ్యవహారాలు చేసిన కుమార బంగారప్ప కూడా ఈ ఎన్నికల్లో ఓడారు.