MS Swaminathan | హరిత సూర్యుడి అస్తమయం.. దేశ వ్యవసాయరంగ  ముఖచిత్రం మార్చిన ఎంఎస్‌ స్వామినాథన్‌

పంటచేను వణికింది.. అన్నంగిన్నె తొణికింది. హరిత సూర్యుడు అస్తమించాడని మట్టిపువ్వు బెంగటిల్లింది. భారత హరిత విప్లవ పితామహుడు, ప్రముఖ వ్యవసాయ శాస్త్రవేత్త, పద్మవిభూషణ్‌ పురస్కార గ్రహీత ఎంఎస్‌ స్వామినాథన్‌ (98) కన్నుమూశారు.

• ఎంఎస్‌ స్వామినాథన్‌ ఇకలేరు.. బెంగటిల్లిన పంటచేలు
• భారత హరిత విప్లవ పితామహుడిగా ప్రఖ్యాతి
• దేశ వ్యవసాయరంగ  ముఖచిత్రం మార్చిన శాస్త్రవేత్త
• సాగు యాంత్రీకరణ, హైబ్రిడ్‌  వంగడాలతో కొత్త బాటలు

MS Swaminathan | పంటచేను వణికింది.. అన్నంగిన్నె తొణికింది. హరిత సూర్యుడు అస్తమించాడని మట్టిపువ్వు
బెంగటిల్లింది. భారత హరిత విప్లవ పితామహుడు, ప్రముఖ వ్యవసాయ శాస్త్రవేత్త, పద్మవిభూషణ్‌ పురస్కార గ్రహీత ఎంఎస్‌ స్వామినాథన్‌ (98) కన్నుమూశారు. గురువారం చెన్నైలోని తన నివాసంలో ఆయన తుదిశ్వాస విడిచారు.

ఆకలిచావులు చూస్తూ పెరిగిన స్వామినాథన్‌.. వ్యవసాయ పరిశోధనల వైపు దృష్టిసారించారు. సాగు బాగు కోసం సైన్సును మడిచేలకు మళ్లించి.. కరువు నేలలో సేద్యాన్ని సాధ్యం చేసి రైతు తలరాతలో నాలుగు మెతుకులు రాశారు. అధిక దిగుబడి విధానాల కోసం తపించి, యాంత్రీకరణతో సాగుభారాన్ని తప్పించారు. పంజాబ్‌ను గోధుమచేనుగా మార్చారు. సాగురంగంలో తెలంగాణ ఎదుగుదలను చూసి మురిసిన స్వామినాథన్‌.. రాష్ర్టాన్ని సందర్శిస్తానని ఇటీవలే ప్రకటించారు. అంతలోనే దివికి తరలివెళ్లారు.

చెన్నై, సెప్టెంబర్‌ 28: భారత వ్యవసాయరంగానికి కొత్త దారులు చూపి ‘హరిత విప్లవ పితామహుడిగా’ కీర్తి గడించిన ప్రముఖ వ్యవసాయ శాస్త్రవేత్త ఎంఎస్‌ స్వామినాథన్‌ (98) అస్తమించారు. చెన్నైలోని స్వగృహంలో గురువారం ఆయన తుదిశ్వాస విడిచారు. ఆయనకు ముగ్గురు కుమార్తెలు ఉన్నారు. డబ్ల్యూహెచ్‌వో మాజీ ప్రధాన శాస్త్రవేత్త సౌమ్యా స్వామినాథన్‌ ఈయన కూతురే. స్వామినాథన్‌ పరిశోధనలు భారత వ్యవసాయ రంగంలో పెను విప్లవాన్ని తీసుకొచ్చాయి. స్వామినాథన్‌ సృష్టించిన కొత్త వంగడాలు మూలంగా దేశంలో గోధుమ, వరి పంటల్లో దిగుబడి అమాంతం పెరిగింది. కోట్లమంది రైతులు పేదరికం నుంచి బయటపడ్డారు. స్వామినాథన్‌ పరిశోధనలు రైతాంగానికి కొత్త ఆదాయ మార్గాలను చూపించాయి.

ఆకలిపై విజ్ఞాన యుద్ధం

స్వామినాథన్‌ పరిశోధనలు దేశంలో ప్రజల ఆకలి, పౌష్టికాహార లోపంపై ప్రభుత్వం యుద్ధం చేసేందుకు ఇతోధికంగా తోడ్పడ్డాయి. 1960 దశకంలో స్వామినాథన్‌ హైబ్రిడ్‌ వంగడాలను సృష్టించారు. వీటి ఆధారంగా మొదట పంజాబ్‌లో ఆధునిక వ్యవసాయం మొదలుపెట్టారు. స్వామినాథన్‌ 1925 ఆగస్టు 7న తమిళనాడులోని కుంభకోణంలో జన్మించారు. ఆయన తండ్రి ఎంకే సాంబశివ ఒక సర్జన్‌, తల్లి పార్వతి తంగమ్మాళ్‌ గృహిణి. కోయంబత్తూరు (ప్రస్తుతం తమిళనాడు వ్యవసాయ విశ్వవిద్యాలయం) వ్యవసాయ కళాశాలలో ఆయన గ్రాడ్యుయేషన్‌ పూర్తిచేశారు. ప్రపంచ హరిత విప్లవ పితామహుడిగా పేరు గడించిన నార్మన్‌ ఈ బోర్లాగ్‌తో కలిసి కొత్త వంగడాలపై పరిశోధనలు నిర్వహించారు. ముఖ్యంగా గోధుమ పంటలో హైబ్రిడ్‌ వంగడాలను ఆవిష్కరించారు. అవి భారతీయ వ్యవసాయ ముఖచిత్రాన్నే మార్చేశాయి.

లెక్కలేనన్ని అవార్డులు

• అద్భుత పరిశోధనలతో కోట్లమంది పేదరికం నుంచి బయటపడేసిన స్వామినాథన్‌ను వరించని పురస్కారం లేదంటే ఆశ్చర్యం లేదు. ప్రపంచంలోని అనేక గొప్ప యూనివర్సిటీల నుంచి ఆయన ఏకంగా 84 గౌరవ డాక్టరేట్లను పొందారు.
• వ్యవసాయ పరిశోధనల్లో నోబెల్‌ ప్రైజ్‌గా పరిగణించబడే ‘వరల్డ్‌ ఫుడ్‌ ప్రైజ్‌’ను 1987లో ఆయన అందుకొన్నారు.
• భారత ప్రభుత్వం ఇచ్చే పద్మశ్రీ, పద్మభూషణ్‌, పద్మ విభూషణ్‌ అవార్డులు ఆయనకు లభించాయి.
• స్వామినాథన్‌ను ‘ఫాదర్‌ ఆఫ్‌ ఎకనమిక్‌ ఎకాలజీ’ అని యునైటెడ్‌ నేషన్స్‌ ఎన్విరాన్‌మెంట్‌ ప్రోగ్రామ్‌ కొనియాడింది.
• టైమ్‌ మ్యాగజీన్‌ ఆసియాలోనే అత్యంత ప్రభావశీలురైన 20 మందిలో స్వామినాథన్‌కు చోటు కల్పించింది.
• స్వామినాథన్‌ను హెచ్‌కే ఫిరోడియా అవార్డు, ది లాల్‌బహదూర్‌ శాస్త్రి నేషనల్‌ అవార్డు, ఇందిరాగాంధీ అవార్డు, రామన్‌ మెగసెసె అవార్డు, ఆల్బర్ట్‌ ఐన్‌స్టీన్‌ వరల్డ్‌ సైన్స్‌ అవార్డు తదితర పురస్కారాలెన్నో వరించాయి.

స్వామినాథన్‌ నిర్వహించిన పదవులు

• 1961-72 వరకు ఇండియన్‌ అగ్రికల్చరల్‌ రిసెర్చ్‌ ఇన్‌స్టిట్యూట్‌ డైరెక్టర్‌గా పనిచేశారు.
• 1972-79 మధ్యకాలంలో ఐసీఏఆర్‌ డైరెక్టర్‌ జనరల్‌గా ఉన్నారు.
• 1979 నుంచి 80 వరకు కేంద్ర వ్యవసాయశాఖ ముఖ్య కార్యదర్శిగా ఉన్నారు.
• 1980-82 మధ్య ప్రణాళికా సంఘం సభ్యుడి (సైన్స్‌ అండ్‌ అగ్రికల్చర్‌)గా, డిఫ్యూటీ చైర్మన్‌గా పనిచేశారు.
• 1982-88 మధ్య ఫిలిప్పీన్స్‌ ఇంటర్నేషనల్‌ రైస్‌ రిసెర్చ్‌ ఇన్‌స్టిట్యూట్‌ డైరెక్టర్‌ జనరల్‌గా సేవలందించారు.
• 2004లో రైతుల ఆత్మహత్యలు, సమస్యలను అధ్యయనం చేసేందుకు కేంద్రం నియమించిన కమిషన్‌కు చైర్మన్‌గా పనిచేశారు. ఈ కమిటీయే రైతులకు కనీస మద్దతు ధర ఇవ్వాలని సిఫారసు చేసింది.
• 1988లో స్వయంగా ఎంఎస్‌ స్వామినాథన్‌ రిసెర్చ్‌ ఫౌండేషన్‌ (ఎంఎస్‌ఎస్‌ఆర్‌ఎఫ్‌) ను స్థాపించి గ్రామీణ ప్రాంతాల్లో వ్యవసాయాభివృద్ధికి కృషిచేశారు.
• 2007-13 వరకు రాజ్యసభ సభ్యుడిగా పనిచేశారు.
• ఆహార భద్రతపై నియమించిన హై లెవెల్‌ ప్యాన్‌ ఆఫ్‌ ఎక్స్‌పర్ట్‌ (హెచ్‌ఎల్‌పీఈ)కి 2010-13 మధ్య చైర్మన్‌గా ఉన్నారు.