అమరావతి: చత్తీస్ఘడ్లో జరిగిన ఎదురుకాల్పుల్లో 22 మంది జవాన్లు వీరమరణం పొందిన విషయం తెలిసిందే. వారిలో ఇద్దరు ఆంధ్రప్రదేశ్ జవాన్లు ఉన్నారు. బీజాపూర్ ఎన్కౌంటర్లో ప్రాణాలు కోల్పోయిన ఆ ఇద్దరు జవాన్ల కుటుంబాలకు 30 లక్షల ఎక్స్ గ్రేషియా ప్రకటిస్తున్నట్లు ఆంధ్రప్రదేశ్ ప్రభుత్వం పేర్కొన్నది. దీనిపై ఏపీ సీఎం జగన్ ఓ ప్రకటన రిలీజ్ చేశారు. ఇద్దరు జవాన్ల మృతి పట్ల ఆయన సంతాపం తెలిపారు. అమరులైన జవాన్ల కుటుంబాలకు సీఎం జగన్ ప్రగాఢ సానుభూతి తెలిపారు. ఏపీకి చెందిన రౌతు జగదీశ్, శాఖమూరి మురళీ కృష్ణలు.. మావోల బుల్లెట్లకు నేలకూలారు. ఈ ఇద్దరూ విజయనగరం, గుంటూరు జిల్లాలకు చెందినవారు. విజయనగరం జిల్లా ఎస్పీ బీ రాజకుమారి .. ఇవాళ అమర జవాను ఇంటికి వెళ్లి కుటుంబసభ్యులను ఓదార్చారు.