కస్టడీ చావులు 11,656.. ఆరేండ్లలో దేశంలో నమోదైన మరణాలు

• ఆరేండ్లలో దేశంలో నమోదైన మరణాలు
• సగటున కోటి జనాభాకు 85 కస్టడీ డెత్స్‌
• యూపీ టాప్‌.. రెండేండ్లలో 952 మంది మృతి
• లోక్‌సభలో వివరాలు వెల్లడించిన కేంద్రం

న్యూఢిల్లీ, జూలై 27: కస్టడీలో ఉన్నవారు అర్ధాంతరంగా కడతేరుతున్నారు. పోలీసు లాకప్‌లోనో, జైలుగోడల మధ్యో ప్రాణాలు కోల్పోతున్నారు. దేశంలో 2016 ఏప్రిల్‌ -2022 మార్చి మధ్య ఏకంగా 11,656 మంది కస్టడీలోనే మరణించారు. బుధవారం లోక్‌సభలో కేంద్ర హోంశాఖ సహాయ మంత్రి నిత్యానందరాయ్‌ ఈ వివరాలు వెల్లడించారు.

కస్టడీ మరణాల్లో ఎక్కువగా జ్యుడీషియల్‌ కస్టడీలో మరణించినవారే అత్యధికంగా ఉన్నారని తెలిపారు. మొత్తం మరణాల్లో జ్యుడీషియల్‌ కస్టడీలో మరణించినవారు 93 శాతం కాగా, పోలీస్‌ కస్టడీలో చనిపోయినవారు 7 శాతంగా ఉన్నట్టు వివరించారు. రాష్ర్టాల వారీగా పరిశీలిస్తే కస్టడీ మరణాల్లో 22 శాతంతో యూపీలో టాప్‌లో ఉన్నదని పేర్కొన్నారు. దేశవ్యాప్తంగా చోటుచేసుకొన్న కస్టడీ మరణాల్లో సగటున 1 కోటి జనాభాకు 85 మంది చనిపోయారని వెల్లడించారు.

రెండేండ్లలోనే యూపీలో 952 మంది మృతి

కస్టడీ మరణాల్లో బీజేపీ పాలిత ఉత్తరప్రదేశ్‌ టాప్‌లో ఉన్నది. లోక్‌సభలో కేంద్రం చెప్పిన వివరాల ప్రకారం.. 2020-2022 మధ్య దేశవ్యాప్తంగా 4,448 కస్టడీ మరణాలు చోటుచేసుకోగా, ఒక్క యూపీలోనే 952 మంది మరణించారు. తర్వాతి స్థానంలో బెంగాల్‌ ఉన్నది. అక్కడ 442 మంది చనిపోయారు.

2020లో కస్టడీ మరణాలు

• మొత్తం మరణాలు 1,887
• సహజ మరణాలు1,642
• అసహజ మరణాలు189

అసహజ మరణాల్లో..

• ఆత్మహత్య 156
• ప్రమాదం 8
• తోటీ ఖైదీల చేతుల్లో8
• కాల్పుల్లో 5
• ఉరి 4
• బయటివారి దాడిలో 3
• నిర్లక్ష్యం వల్ల 1