దివ్యాంగులంతా పరీక్షల్లో స్ర్కైబ్‌ సహాయం తీసుకోవచ్చు

ఇక నుంచి దివ్యాంగులంతా పరీక్షలు రాయడానికి స్ర్కైబ్‌ల సహాయాన్ని తీసుకోవచ్చని సుప్రీంకోర్టు స్పష్టం చేసింది. 40 శాతం నిర్దిష్ట వైకల్యం(బెంచ్‌మార్క్‌) ఉందా, లేదా అనే అంశంతో సంబంధం లేకుండా స్ర్కైబ్‌ సహాయం పొందవచ్చని తెలిపింది.

• బెంచ్‌ మార్క్‌ వైకల్యంతో సంబంధం లేదు
• సుప్రీంకోర్టు తీర్పు.. మార్గదర్శకాలు జారీ

న్యూఢిల్లీ, ఫిబ్రవరి 3: ఇక నుంచి దివ్యాంగులంతా పరీక్షలు రాయడానికి స్ర్కైబ్‌ల సహాయాన్ని తీసుకోవచ్చని సుప్రీంకోర్టు స్పష్టం చేసింది. 40 శాతం నిర్దిష్ట వైకల్యం(బెంచ్‌మార్క్‌) ఉందా, లేదా అనే అంశంతో సంబంధం లేకుండా స్ర్కైబ్‌ సహాయం పొందవచ్చని తెలిపింది. బెంచ్‌మార్క్‌ వైకల్యం ఉన్న వ్యక్తులకు ఉండే ప్రయోజనాలను పరిమితులు లేకుండా పీడబ్ల్యూడీ అభ్యర్థులు అందరికీ అమలు చేయాలని స్పష్టం చేసింది.

గుల్షన్‌ కుమార్‌ అనే వ్యక్తి దాఖలు చేసిన ప్రజా ప్రయోజన వ్యాజ్యంపై విచారించిన జస్టిస్‌ జేబీ పార్దివాలా, జస్టిస్‌ ఆర్‌ మహదేవన్‌ ధర్మాసనం ఈ మేరకు సోమవారం కీలక తీర్పు వెలువరించింది. కేంద్రానికి పలు మార్గదర్శకాలను సైతం జారీ చేసింది. వీటిని రెండు నెలల్లో అమలు చేయాలని ఆదేశించింది.

కేంద్రానికి మార్గదర్శకాలు

• బెంచ్‌మార్క్‌ వైకల్యం ఉన్న వారికి ఉండే అన్ని ప్రయోజనాలను ఎలాంటి పరిమితులు విధించకుండా దివ్యాంగులైన(పీడబ్ల్యూడీ) అభ్యర్థులు అందరికీ వర్తింపజేయాలి.
• 2022 ఆగస్టు 10న జారీ చేసిన ఆఫీస్‌ మెమోరాండంను పునఃపరిశీలించాలి. ఆంక్షలను తొలగించి సహేతుక పద్ధతిలో సడలింపులు ఇవ్వాలి.
• అభ్యర్థులు కేంద్రాన్ని సంప్రదించేందుకు వీలుగా ఫిర్యాదుల పరిష్కార పోర్టల్‌ను ఏర్పాటు చేయాలి.
• దరఖాస్తు చేసిన తర్వాత స్ర్కైబ్‌ సర్టిఫికెట్‌ చెల్లుబాటును పొడిగించాలి.
• అభ్యర్థులు స్ర్కైబ్‌తో పరిచయం చేసుకోవడానికి పరీక్షకు ముందే సమయం ఇవ్వాలి.